¹ Shawulu pãngyãa a wu nungnivɔɔ. Alaɓiko kpãareni vɛ̃ɛni yupa a shɔng dũngniyi yuu ɓe yii sii a Urushelima; shɔng dũngniyi yii sɔɔ saate walikãng a waa kaa Yahuda ɓɔɔ Samariya, a yaa jaarɔɔkeniyi ko shee. ² Shɔng zaanilaayi yii gbãa Istifanu asɔɔ tase vikiyato aru wuni. ³ Shawulu bee dɔ̃rɔng aruɓe daa lese shɔng dũngniyi. Ɓoo yee ɓɔɔ yee, wu gɔ̃ɔke veeye ɓɔɔ sooye ni walikãng, asɔɔ ɓaayi dɔɔ a gãayãa. ⁴ Ni ɓemi walikãng shɔng dũngniyi ɓe yii saate ɓe yii kntĩng ni waaniyãa ruulaa. ⁵ Filibu lɔɔ dii ɓundang Samariya asɔɔ waayãa aru Kirisi. ⁶ Mɔɔ ɓee shɔngzengyi yising teshoo ɓatata a viɓe Filibu ng shãng ɓe; ni sĩngsĩng goro yii tãa wu, yii sɔɔ ze vitaseni ɓe pele ɓe. ⁷ Vĩnivĩvĩ suruyi yii ke a vusu shɔngzeng vɛ̃ɛni ɓe yii sii yiike yii ɓe, a kaa yãa vɔɔ ni kaaka yiriyãa, ɓɔɔ shɔng bii bãani ɓɔɔ shɔngdɔɔɓayi vɛ̃ɛni yii kpaa ganteni. ⁸ Arugoko puruyato shang vɛ̃ɛni a ɓundang ɓi. ⁹ Vizeniwuko shɔngveeyeɓɔɔ ani a ɓundang ɓi wu rĩng ni Simani, ɓe sii pele paa; sii zaa shɔng Samariyayi bii ni wu ɓi shɔngzeng tɔ̃ɔving. ¹⁰ Shɔng Samariya walikãng, bɔrɔ ni wodot, yii teshoo a wuni; yii sɔɔ shãngni, "Shɔng ɓemi wu ɓi Laa kaakanaa ɓe shɔng ɓaani Bɔrɔngbɔ." ¹¹ Yii dũng wu yãa aruviya pele vizaanibi ye tɛ̃tɛ̃ ni wu peleni paa. ¹² Vizeniwuko alaɓe yii azɔngye a Filibu alaɓe ng waayãa poloruu tɔ̃ɔving aru Laa roonikpanti ɓɔɔ tɔti a Yeso Kirisi rĩng, shɔng sɔɔ pele yii baptizima, veeye ɓɔɔ sooyeyi walikãng. ¹³ Simani ni wu yuu azɔng jɔ, atũmpu ɓe shɔng pele wu baptizimaye sɔɔ wɔ̃ngni Filibu dongoro. Alaɓe ze vizaanibi ye ɓɔɔ bɔrɔngbɔ vishongni de kntĩngni, sɔɔ pele vinungmangka. ¹⁴ Hãmi alaɓe jaarɔɔkeniyi ɓe yii a Urushelima yii tãaye ni shɔng Samariya yii tee ruu Laa ye, yii shongsheyii Bituru ɓɔɔ Yɔhana. ¹⁵ Alaɓe yii ɛye, yii gɔ̃ɔrelaa a yii yuu aruɓe yii daa tee Suru Laa. ¹⁶ Aruviya alaɓini, Suru Laa sii de lɔɔ ɓa a shɔngɓɔɔ a yii titi yuu ɓa; yii sii dong pele baptizima ko shee a Daayere Yeso rĩng. ¹⁷ Alaɓiko Bituru ɓɔɔ Yɔhana yii shĩngshe yii naa a yuu, yii sɔɔ kpaa Suru Laa. ¹⁸ Alaɓe Simani zeye ni shɔng kpaa Suru Laa alaɓe jaarɔɔkeniyi yii shĩng naa ye a shɔng yuu, a aa yii saka. ¹⁹ A tɔɔni, "Nɔ ang kaakanaa peleni vĩmita, jɔ, aruɓe shɔngɓe nang shĩngsheyi naaye jɔ a yuu yii daa kpaa Suru Laa ɓe." ²⁰ Vizeniwuko Bituru gãale wuni, "Mɔ saka wu lese ta ni mɔni, aruviya a mɔ lereni mɔng kpaa Laa viani kɔtɔ ni saka. ²¹ Mɔ viɓɔɔ ɓa kɔ ruuɓɔɔ ɓa a vusu ruuɓemi ɓa, aruviya mɔ sĩngsĩng ɓa ɓatata ni Laa ni ɓa. ²² Arugoko mɔ yaa mɔ ruu kpɛ̃rɛvava ɓemi, mɔ sɔɔ gɔ̃ɔre Daayere Laa, aruɓe daa yaase mɔ ruvĩni ɓe a mɔ sĩngsĩng kɔtɔ. ²³ Aruviya N zeye mɔ a vusu vilangni viki sĩngsĩng ɓɔɔ maani ɓe ɓa dangɓa." ²⁴ Simani kaseyãa a tɔɔni, "Gɔ̃ɔreng Daayere ta, aruɓe viɓe mɔɔ shãngɓemi daa wɔ̃ng ɓa ang yuu ɓa." ²⁵ Alaɓe yii taseye yii sɔɔ shãng Daayere yãa ye, Bituru ni Yɔhana yii sɔɔ zuse Urushelima, yii de waa Laa poloruu tɔ̃ɔving ni a jekooyi vɛ̃ɛni ɓe shɔng Samariyayi. ²⁶ Hãmi Daayere jaashoni shãng yãa ni Philipi a gãale wuni, "Yupata mɔ sɔɔ waa kaa dɔ̃rɔng ɓe wa asɔɔ lɔɔ dii Urushelima asɔɔ tuuke Gaza." (Dɔ̃rɔng ɓemi a vusu jĩngti.) ²⁷ Yupa asɔɔ waake. Milepĩn, shɔngveeyeɓɔɔ ani amɔni ɓe ke a Yitopiya, wuɓi shɔng kaakanaa vɛ̃ɛni a Kandake, ɓe sokpang ɓee shɔng Yitopiyayi. Wu ko yiise wu vinaa walikãng. Ɛ Urushalima wu gbãarelaa. ²⁸ Wɔ̃ng a wu yuu gbangsaka alaɓe de zuse yee ni, sing ɓaale labini ɓe shɔngshoni Ishayaa. ²⁹ Suru shãngshe Filibu ni, "Waata mɔ kpaa bii maani ni gbangsaka ɓemi." ³⁰ Arugoko Filibu sɔɔ yuuke a waa wu bii, asɔɔ tãa wu ng ɓaale labini shɔngzeni Ishayaa, a shãngni, "Mɔ too viɓe mɔng ɓaale ɓemi ye ya?" ³¹ Alaɓiko sɔɔ tɔɔni, "N daa too nukoviya, naɓa shɔngɓɔɔ taseng ɓa?" A ɓaa Filibu yãa wu vɔ̃ngta wu wɔ̃ng ni wuni a yuu gbangsaka. ³² Hãmi kaati labini ɓe shɔng Yitopiya sing ɓaale ɓemi wu ko, "Shɔng waa ni wuni ana mɛrɛ ɓe shɔng waare shɔngyeeni ɓe, ana jaamɛrɛ a wu shɔng yeleni wu shengti bii, ananko de puu wu yãa ɓa. ³³ Awu kpãareni shɔng too wu peletɔ̃ɔving akaati. Ɓiwe daa gãa wu shangni shãari weya? Aruviya shɔng too wu surubi a koodanga." ³⁴ Arugoko shɔng kaakanaa ɓi yɛ̃ɛ Filibu, asɔɔ tɔɔni, "N gɔ̃ɔre mɔ, gãaleng ta ɓiwe shɔngzeni ng shãng aru ni, aru wu yuu ya, kɔ aru shɔngɓɔɔ tok?" ³⁵ Filibu gaa shãng ni yãa, a gaa ni labini ɓemi a waase wu poloruu tɔ̃ɔving aru Yesu. ³⁶ Laɓe yii de waani a dɔ̃rɔng, yii ɛ amɔngɓe mɛɛ ani pota shɔng kaakanaa ɓemi sɔɔ shãngni, "Zepĩn, mɛɛ amɔngɓemi ni. Ɓivi daa zãareng peleni baptizima viya?" ³⁷ Filibu gãale wu ni, "Shɔng pele mɔ baptizima kɔtɔ mɔ na azɔngye yato goro." A kase niː "N azɔngye a Yeso Kirisi ni wuɓi Laa Jaa. ³⁸ Arugoko shɔng Yitopiya ɓi shĩngke shɔng shiire gbangsaka. Filibu ɓɔɔ shɔng kaakanaa, yii lɔɔ dii yoo, Filibu sɔɔ pele wu Baptizima. ³⁹ Alaɓe yii keye a vusu mɛɛ, Daayere Suru sɔɔ too Filibu akaati, shɔng kaakanaa ɓi de sɔɔ ze wu tɔɓa, asɔɔ yii wu dɔ̃rɔng ni puruyato. ⁴⁰ Vizeniwuko Filibu sɔɔ kee a Azotus a waa ni dɔ̃rɔng kaa ɓini, a waa poloruu tɔ̃ɔving a ɓundangɓiyi walikãng awa laɓe ɓoo Kayiseriya.