¹ Yuubɔrɔ Firisi shãngni, "Viɓemi yii nungoko ya?" ² Istifanu shãngni, "Mazungyi, Madaayi, nɔ weeshoo pĩnː Laa ɓe wuko bɔrɔ ke a wo dabong Ibirayi bii alaɓe wu a Mɛɛsopotamiya, aɓe sii wɔ̃ng ɓa Haran ɓa. ³ Ang gãale wuni, 'Yaa mɔ tipi ta ni mɔ shɔng bii yii, mɔ waa tipi ɓe N daa tase mɔ ɓe.' ⁴ "Alaɓiko a yupa a tipi Shalidansi asɔ wɔ̃ng a Haran; Amɔni, alaɓe yebi vɔɔye ɓe, Laa ese wu tipi mi, mɔngɓe nɔ wɔ̃ng hãmi. ⁵ De awu viɓɔ ɓa ni ɓi wuko wu vii vɔɔ ɓa, de awu ɓa kɔ mɔng ɓe daa shing dɔɔ ɓa. Aruviya vaase wu - kɔ alaɓe Ibirayi wu jaa ɓa - ɓe daa awu anaa vii vɔɔ ɓa ɓɔɔ wu jetãari ɓe ying e awu tũmpu. ⁶ Laa sĩng gãale wu ruu anaa ɓemi, ning wu lákoo mi ying wɔ̃ng pota a tipi gaa, ni shɔng koo ɓi ying riseyi anaa foo, ying kpãreyi ɓe saa laa bãati. ⁷ 'N ɓoore koo ɓe yii kpãreyi ɓe yoori,' Laa shãngke, 'A tũmpu ɓi ying eke yii dɔ̃ɔreng a mɔngɓini.' ⁸ Amɔni Laa sɔɔ a Ibirayi ruu maaniyã ɓe sha yeeni, Ibirayi sɔɔ ye Ishaaku asɔɔ yerewu sha a diki nawadɛ̃ɛro; Ishaaku sɔɔ ye Yakubu, Yakubu sɔɔ ye gãasi jaa kop-atu-ziti ɓe yikɔ yii yebong. ⁹ "Aruviya yebongɓi yii kaa gn ni Yusu, yii malewu a Masar; aruviya Laa sii ni wuni ¹⁰ a sɔɔ kpɛ̃ngsewu awu vusu kpãareni. A tãa Yusu gn kɔni a awu zeni a kpanti Firiana waatĩng, kpanti Masar, wuko sɔɔ rɔɔwu shɔng ladong gɔmna ɓe Masar ɓɔɔ wu vusu yee walikãng. ¹¹ "Hãmi shɔng pele wɔ̃ko loo ni kpãreni ɓe e a tipi Masar ɓɔɔ Kan'ana, wo daayi sɔɔ de kpa vishãng ba. ¹² Alaɓe Yakubu tãaye ni vishãng ani a Masar, sɔɔ shong wo daayi a yii kn ni ɓe shɔɔni. ¹³ Ayi wani ɓee ziti Yusu tasewu yuu a zũngɓiyi bii, Firiana sɔɔ zee Yusu zũngɓi yii zɔng. ¹⁴ Yusu sɔɔ shong zũngɓiyi ni yii sɔɔ yii waa ɓaa yeɓi yãa ni wu e Masar, ni wu shɔng bii yini walikãng, yii walikãng yii lá taati atu kop atu maani. ¹⁵ Ananko Yakubu sɔɔ waa Masar, asɔ vɔɔyi, ni wo daa yini. ¹⁶ Shɔng seyi ke a wareyi koo Shekem asɔ gbãyi a yusaa ɓe Ibirayi woo ning saka a Hamo yii jaayi ɓe a Shekem. ¹⁷ "Alaɓe diki vaaseniyãa kpaye ɓe, vaaseniyãa ɓe Laa vaase Ibirayi ɓe, shɔngzengyi bong a shang a Masar, ¹⁸ wu waa laɓe shɔng kese kpanti ɓɔɔ ɓe Masar, kpanti ɓe de ze Yusuu zɔ̃ng ɓa. ¹⁹ A lake wo shɔngyi a kpãarewo daa yii, wu shinyi ke yii wɔse yii jaa kpatakpayi aru ɓe yii daa wɔ̃ng ɓa ni suru bii ni ɓa ɓe. ²⁰ "Alaɓi ko shɔng ye Muusa; wu kɔvɛ̃ɛ kpɛrere a Laa tĩng shɔng sɔɔ shaarewu ɓee shele taati a yebi yee. ²¹ Alaɓe shɔng shingwu ye a gaa ɓe, Firiana jaa sooye sɔɔ zeewuke a towu a bonse wu a riisewu anaa wu jaa. ²² Muusa kpa manteni a zeni vii walikãng ɓee koo Masar, asɔɔ wɔ̃ngni kaaka awu yãa shãngni ɓɔɔ vipeleni. ²³ "Alaɓe kpa saa laziti ye ɓe a e awu sĩngsĩng ni wu ze zũngɓiyi, jetãri ɓee Isreyila. ²⁴ A zeke shɔng kpãare shɔng Isreyila, Muusa sɔɔ rayi ke a kpɛngseyi a sɔɔ nung shɔng Masar ɓe ng kpãre wumi vɔɔː ²⁵ awu lereni zũngɓi yii daa zekɔtɔ ni Laa, ni wu kaa naa, ng ayi kpɛngseni kɔtɔ, yii de sɔ zeba. ²⁶ Ni gandi ɓɔɔ ang ke ayi bii aɓe yide nung bangni, beeke wu wɔ̃ngseyi ɓatata, a shãng ni, 'Veeye yii, nɔ zũngyi; aruvi nɔng nung bang viya?' ²⁷ Shɔng ɓe wukɔ bee yãa ni wu shɔng yãa kaasi dɔ̃ɔwu ni kati, a tɔni, 'Ɓi we rɔɔmɔ shɔng Iadong ɓɔɔ shɔng ɓooreni yoori a wo yuu weya? ²⁸ Mɔ kase mɔ nung vɔɔ anaaɓe mɔ dĩng nung shɔng Masar mi ya?' ²⁹ Muusa yuke alaɓe tãa ruuɓemi ye ɓe; asɔɔ rii shɔng zanti a koo Madaya, a mɔngɓe rii yejaa ɓee jaa ziti. ³⁰ "A tũmpu saa láziti ɓe tukeye, Laa jaashoni ke awu bii a kɔpɔ Sinai, anaa rɛtɛ yaa a vusu jĩngti. ³¹ Alaɓe Muusa ze yaa ɓi ye, a wɔ̃ngsewu vii zaani bii, aɓe waaye wu zee ɓe, Daayere yiri yãa e a wuni, a shãngni, ³² 'Mikon Laa ɓee nɔ daayi, ɓɔɔ Laa ɓee Ibirayi, ɓɔɔ Ishaaku, ɓɔɔ Yakubu.' Muusa zaavɔɔ vɛɛni a de zee viɓɔɔ ɓa. ³³ "Daayere gãalewu ni, 'Zɔ̃mɔ ko dɔɔ ɓe amɔ dɔɔta, aru mɔngɓe mɔ shiimi ɓi mɔng tɔ̃ving. ³⁴ N ze kpãareni ɓe ng jaa ying kpãare a koo Masar ye; N tãayi kaani ye, arugoko N eke ng kpenseyi; hãmi eta, N shongmɔ a Masar.' ³⁵ "Muusa ɓemi ɓe shɔng ɓɛ̃wu, ɓe yii shãng ni, 'Ɓi we rɔɔmɔ shɔng ladong kɔ shɔng yoori ɓooni weya?' - Ɓi wuko ɓe Laa shong wuke ni wu wɔ̃ng shɔng ladong ɓɔɔ shɔng kpɛngseni shɔng. Laa shongwu ni naa jaashonni Laa ɓe ke awu bii a jĩngti. ³⁶ Muusa keseyi a vusu Masar, atũmpu ɓe pele vii zaani bii ye zɔng-zɔng ɓɔɔ vii taseni a Masar ɓɔɔ a rãani wapo, ɓɔɔ a vusu jĩngti aɓe saa lá ziti. ³⁷ "Ɓi Muusa ɓiko ɓe gãale shɔng Isreyila, 'Laa ng yuse nɔ shɔngzeni a titi zũngwa yii, shɔngzeni ɓe anaa miko.' ³⁸ Ɓemi ɓi shɔngɓe wu sii a titi jĩngti ni Laa shɔngshongni yii ɓe shãng yãa ni wuni a kɔpɔ Sinai, ɓe wuni wo daa yini, wukɔ sɔɔ te Laa yãa shãngni a sɔɔ awo. ³⁹ "Wo dabong yii ɓɛ̃ɛwu tãani yãa; yii sɔɔ dɔ̃ɔwu ni gaa ayi titi, a yii sĩngsĩng a zuse Masar. ⁴⁰ Alaɓi yii shãngshe Haruna ni, 'Gontewo laa ɓe daa dũngni woni ta. Aru Muusa mi, ɓe kese wo a koo Masar, wo de ze viɓe kn tĩng ni wuni ɓa.' ⁴¹ Yii sɔɔ gonte vidũngni a dikiwayi a ese vishareni a ã vidũngni, yii sɔɔ tãa tɔ̃ving aru viɓe yii gonte ɓe. ⁴² Laa riiseyi tũmpu a shĩngyi ke ni yii gbãre seng ɓe yii a lapa, anaa ɓe shɔng binke a labini shɔngzeniyi, 'Nɔ eseng vii ani ɓɔɔ vishareni ɓee saa lá ziti a jĩngti, yee Isreyila ya? ⁴³ Nɔ te sɔngpɔlɔng ɓee Molek ɓɔɔ ni seng ɓee nɔ laa Refam, nung susuru ɓe nɔ pele nɔ gbãareyiː arugoko N waare nɔ fefe a koo Babila.' ⁴⁴ "Wo daa yii sɔngpɔlɔng ani ɓee taseni a vusu jĩngti, anaaɓe Laa kɔseyiyãa aɓe shãng yãa ni Muusa ni ɓe, ni wu wɔ̃ng seyi anaa ɓe ze ɓe. ⁴⁵ A tumpu ɓi, wo daa yii, a lá Joshuwa, yii te sɔngpɔlɔng asɔɔ ese ni yini alaɓe yii te tipi ɓi ɓe. Laa te tipi ɓi a shɔng kooyi naa a keseyi a wo daayi waatĩng. sɔngpɔlɔng ɓi wɔ̃ng tipi ɓi a waa la Dawuda, ⁴⁶ ɓe kpa panti a Laa tĩng, a beeke kɔ daa kpa mɔng wɔ̃ngni kɔtɔ ɓee Yakubu yee. ⁴⁷ Ɓi Sulemanu ko maa Laa yee. ⁴⁸ "Aruviya, Shɔng Yurangko wɔ̃ngɓa a yee ɓe shɔng maa ni naa ɓa, anaa shɔngzeni shãng ɓr, ⁴⁹ 'Koolapa wuko ng ladong Kpanti, koodanga ɓi wuko ng mɔng dɔɔ naani. Mɔng maareng zɔng yee ɓewe ya? Daayere shãngke, kɔ ɓi mɔng ɓewe ng mɔng wɔ̃keni weya? ⁵⁰ 'N naa de pele zɔng viɓemi ɓa walikãng ɓaya?' ⁵¹ "Nɔ ɓe nɔ shɔng yuu lakeni, shɔngɓe de yi ruu tɔ̃ving ɓa a sĩngsĩng ɓa ɓɔɔ shoo, nɔ bɛ̃ɛ Suru tɔ̃ving a ládɔɔgandi mi; nɔ pelevi anaa nɔ daa yii pele ɓe. ⁵² Ɓi shɔngzeni ɓewe nɔ daa yii de kpãarewu ɓa weya? Yii nungke shɔngzeni ɓe yii e a tĩng aru shɔng tɔ̃ving eni; nɔ sɔɔ riiye hãmi shɔngɓe nɔ a shɔng asɔɔ wɔ̃ng shɔngɓe yii nungwu vɔɔ tɔti, ⁵³ Nɔ shɔngɓe nɔ te rudani ɓe Laa jaashoni yii rɔɔ tɛ̃tɛ̃ ɓe, nɔ de sɔɔ dũng ɓa." ⁵⁴ Hãmi alaɓe shɔng ladong yii tãa ruumi ye, yii lese yato a sɔɔ shaa tãari a Istifanu. ⁵⁵ Wu bibi, ɓe yini Suru Tɔ̃ving ɓe, a peng nung a vusu koolapa a ze Laa bongni; a zee Yeso shiiye a Laa kaa naashang. ⁵⁶ Istifanu shãngni, "Ze pĩn, N ze koolapaye puni, ɓɔɔ jaa shɔngzeng shiiye a Laa naashang." ⁵⁷ Amɔng ɓiko shɔng ladongyi yii kukeyi shoo, yii sɔɔ kaa yãa ni kaaka, yii ewu bii ni vii goro. ⁵⁸ Yii gɔ̃ɔwu ni kaaka a kesewu a ɓundang ɓi a gaawu loleni ni tara. Shɔng ani yãa yii tɛ̃ɛyi fara a shɔngɓɔɔ dɔɔ shɔng ɓawu rĩngni Shawulu. ⁵⁹ Alaɓe yii de lole Istifanu ni tara, de ɓa yãani Daayere a shãngni, "Daayere Yeso, teng suru bii ta." ⁶⁰ Asɔɔ tɛ̃ɛ gbĩnti a tipi a sɔɔ kaa yãa ni kaaka, "Daayere, mɔ na yise ruvĩni mi ɓa ayi yuu ɓa." Aɓe shãng yãa mi ye, a roo nungrong.