¹ Hãmi a vusu dikiɓemiyi, alaɓe jaadɔɔyi yii de shangni, yãawɔ̃meni sɔɔ yupa a shɔng Yahuda ɓee Garasiyayi bii a yuu shɔng Ibraniyi, aruviya ying pele yii soovɔɔyi ɓa tɔ̃ɔving ɓa amɔng vaaseni viyiseni naa a dɔɔ gandimi. ² Shɔngzeng kop atu ziti ɓemiyi yii ɓaa mɔɔ jaadɔɔyi asɔɔ shãngni "De liiɓa wo yaa ruu Laa aruɓe wo daa pele shoni teburu ɓa. ³ Arugoko mazungyi, nɔ rɔɔ, shɔngzengyi nawatati a nɔ titi, shɔngzeng tɔ̃ɔving yii, ɓe yii yiini Suru ɓɔɔ kpɛ̃ni, ɓe wo daa aa yii vishoni ɓemi a naa ɓe. ⁴ Wo bibi, wong watĩng ni gɔ̃ɔreni ɓɔɔ shoni ɓee ruulaa." ⁵ Mɔɔ walikãng yii tãa tɔ̃ɔving yãa shãngni ɓemi. Arugoko yii sɔɔ rɔɔ Istifanu, shɔngveeye ɓe yiini gnshĩngni ɓɔɔ Suru Laa, ɓɔɔ Filibu, ɓɔɔ Borɔkɔrasi, ɓɔɔ Nikano, ɓɔɔ Tima, ɓɔɔ Barmina, ɓɔɔ Nikolosi, shɔng Antakiya ɓe rii shɔng dũngni ɓe. ⁶ Shɔng dũngniyi yii ɛse shɔngɓemiyi a jaarɔɔkeniyi watĩng, ɓe yii gɔ̃ɔrelaa a yii yuu asɔɔ shĩngshe yii naa a yuu. ⁷ Arugoko ruu Laa kntĩng ni bɔɔni mɔng, gãani jaadɔɔyi a Urushelima sɔɔ shang vɛ̃ɛni, ɓɔɔ firisiyi vɛ̃ɛni yii sɔɔ rii shɔng dũngni ɓe gnshini. ⁸ Hãmi Istifanu, wuni yiini ɓee pãnti ɓɔɔ kaakanaa, sing pele vii zaani bii ɓɔɔ vitaseni a shɔngzengyi titi. ⁹ Vizeniwuko alaɓiko shɔngɓɔɔ yii yupa a shɔng jaakalaa ɓe shɔng ɓaani jaakalaa ɓee Shɔngkeseni, ɓee Kiranisi ɓɔɔ Alezandarayi, ɓɔɔ gãasiyi ɓe yii a Kilikiya ɓɔɔ Asiya. Shɔngɓemiyi yii yuse Istifanu ni yãa kongseni. ¹⁰ Vizeniwuko yii de zenung ɓa yii shii ni wu kpɛ̃ɛni ɓɔɔ Suru ɓe Istifanu shãng yãa ni ɓa. ¹¹ Alaɓiko yii sɔɔ ɓungse shɔngɓɔɔ yii naa aru yii tɔɔni, "Wo tãa Istifanu ng shãngyãa dãani a Musa yuu ɓɔɔ Laa." ¹² Yii yuse shɔngzeng sĩngsĩng, ɓɔɔ yubɔrɔyi, ɓɔɔ shɔnglabiniyi, yii sɔɔ kpaa Istifanu a yii wuke asɔɔ ɛse wu a shɔng ladongyi watĩng. ¹³ Yii ɛse shɔng yãajĩngniyi, ɓe yii tɔɔni, "Shɔngveeye ɓemi de yaa shãngni yãa nangka ɓa a yuu mɔng ɓolongɓo ɓemi ɓɔɔ rudangni ɓa. ¹⁴ Aruviya wo tãa wuye amɔngɓe tɔɔni Yeso shɔng Nazara ɓemi ng lese mɔngɓemi kɔtɔ wu sɔɔ kɔse langsi ɓe Musa yaase wo ɓe." ¹⁵ Shɔngɓe yii wɔ̃ng amɔng shɔng ladongyi walikãng yii shĩng nung a wu bii asɔɔ ze wu watĩng riiye ana jaashoni watĩng.