¹ Alaɓe Bituru yini Yɔhana yii de shãng yãa ni shɔngzeng yini, Firisi yii ɓɔɔ yuubɔrɔ jaka Laa ɓɔɔ shɔng Sadukiyi e ayi bii. ² Yii yɔɔre yuu vɛ̃ɛni aru Bituru yini Yɔhana ying mante shɔng ang shãng Yeso yuuni paa a yuusa. ³ Yii yiyike a kuyi a waa mɔng gandi ɓɔɔ, alaɓe sii ni lareng. ⁴ Aruviya shɔngzeng vɛɛni ɓe yii tãa ruumi yii azɔng, veeye ɓe yii azɔng ɓe yii waa labɔng maani kɔtɔ. ⁵ A gandi ɓɔɔ shɔng ladong yii, shɔngbɔrɔ yii, ɓɔɔ shɔng labini zeeni yii muse a yãawe a Urushalima. ⁶ Hanana, bɔrɔ Firisi sii wu amɔni, ɓɔɔ Kayafa, ɓɔɔ Yɔhana ɓɔɔ Elizanda, ni shɔng gãasi ɓe yii yubɔrɔ firisi shɔng bii yiɓe. ⁷ Alaɓe yii shĩng Bituru yini Yɔhana ayi titi ɓe, a yɛ̃ɛyi ni, "Ni kaaka ɓewe, kɔ a rĩng ɓewe, nɔ pele viɓemi weya?" ⁸ Bituru yiyeni Suru Laa, a gãale yini, nɔ shɔng ladongyi ɓee shɔngzeng yii, ɓɔɔ shɔngbɔrɔ yii, ⁹ Wona a maaseni lami aru vii tɔ̃ving ɓe shɔng pele shɔng vɔɔ mi, ni dɔɔrɔng ɓewe shɔng mi gante ke, ¹⁰ Wu wɔ̃ng ta vii zeeni walikãng ni shɔng Isre'ila yini shɔng ɓe shii a nɔ tĩng tɔ̃ving a Yeso Kirisi ɓe Nazara rĩng, ɓe nɔ ɓawu naa la, ɓe Laa yusewu paa a yuusa. ¹¹ Yeso Kirisi ɓi wuko tara ɓe nɔ shɔng mani mɔng bɛ̃ɛ ɓe, ɓe wɔ̃ng ye wuko tara ɓe mɔng maani kati. ¹² Kpani kpengseni ɓa a shɔng ɓɔɔ yii bii ɓa, aru rĩng ɓɔɔ ɓa a koodangɓa ɓe shɔng a shɔngzeng ɓe wo daa kpa kpengseni ni ɓa." ¹³ Alaɓe yii zee Bituru ni Yɔhana ɓange ye a sɔɔ zeeke yii kɔvɛ̃, yii de ɓale lá ɓa, ayi bii zaani, aɓe yi zeeye Bituru yini Yɔhana yii wɔ̃ngye ni Yeso ni. ¹⁴ Aruviya yii zee shɔngɓe shɔng gantewu mi shini ying, yii ruu ɓɔɔ ɓe yii daa shãng aru viɓemi ɓa. ¹⁵ Alaɓe yii shãngshe jaarɔɔkeni mi yii yãa ye ni yii yaa mɔng tuuya mi ta, yii shãng ayi nung. ¹⁶ A tɔni, "Woda pele vii ni shɔng mi yini viya? Aru ni yii kaa bii yii pele vii bii zaani ye, ɓemi ɓi vii taseni kɔ a we bi weya ɓe yii wɔ̃ng a vusu Urushalima, woda bɛ̃ɛ ɓa. ¹⁷ Aru yii daa kn tĩng ɓa ni wangni a shɔng bii ɓa, wo gɔ̃ɔyi yuushoo ta yina shãng tɔɓa a shɔngɓɔɔ bii ni rĩng ɓemi ni ɓa. ¹⁸ Yii ɓayi yãa ni vusu a waseyi yãa ni yina kn tĩng tɔɓa ni shãngni kɔ manteni ni Yeso rĩng ɓa. ¹⁹ A mɔni Bituru ɓɔɔ Yɔhana yii kase ni, "Lii kɔtɔ wo tãa nɔ yãa shani kɔ wo tãa Laa ɓe, Nɔ ɓoo yoori ta. ²⁰ Wo daa zenung yani shãngni viɓeyi ɓe wo ze a tãa mi ɓa." ²¹ A tumpu ɓe yii waatĩng ye ni gɔ̃ni Bituru ɓɔɔYɔhana shoo ye, yii yayi yii wayi. Yii de kpa ruu ɓe yii daa ɓooreyi yoori ɓa, aruviya shɔngzeng ɓe yii a mɔni walikãng ying dɔɔre Laa aru viɓe waatĩng ɓe. ²² Shɔngɓe kpa tɔ̃ving bii ganteni mi sii wu saa jãa laziti kɔtɔ. ²³ A tumpu ɓe shɔng yayi naa ye ɓe, Bituru ɓɔɔ Yɔhana yii sɔɔ e shɔng gãasi yii bii a gãale yii walikãng viɓe shɔngbɔrɔ firisi ɓɔɔ shɔngbɔrɔyi yii gãleyi ɓe. ²⁴ Alaɓe yii tãa ye ɓe, ying ɓaa yiri yãa a Laa ni kaaka ni sĩngsĩng gɔrɔ a tɔni, "Daayere, mɔ pele koolapa ni koodanga ni mɛɛ wapo, ni viɓe walikãng a vusu ɓe. ²⁵ Mɔ shãng yãa ni Suru Kpelenkpe a mɔ jaashoni yãa, wo Daa Dawuda, "Aru vi Shɔng ɓe yii de ze Laa ɓa ying lese yato viya, ɓɔɔ shɔngzeng ying sɔɔ lere a yuu vi nanka ɓemi viya?" ²⁶ Mɔ tɔni, 'Shɔng kpanti koodanga yii ɓase yuu a yãawe, ɓɔɔ shɔng ladongyi yii ɓase a yãawe aru Daayere, ɓɔɔ aru wu Kirisi. ²⁷ Ananko, Hiridu ɓɔɔ Buntus Bilatu, a yãawe ni shɔngɓe yii de ze Laa ɓa ɓɔɔ shɔng Isre'ila, muse a yãawe a ɓundang ɓemi aru mɔ jaashɔng tɔ̃ving Yeso, ɓe mɔ rɔɔwu ɓe. ²⁸ Yii muse a yãawe yii pele viɓe mɔ naa ni mɔ sĩngsĩng ɓe sii mɔ kase ng kn tĩng a tĩng ɓe. ²⁹ Hãmi, Daayere, mile gɔ̃ɔni shoo mɔ amɔ jashoni dɔ̃ɔrɔng shãngni mɔ ruu ni kaaka bii. ³⁰ Kese mɔ naa ta mɔ gante mɔ tase vii taseni bii zaani a mɔ jaa tɔ̃ving Yeso rĩng. ³¹ Alaɓe yii gɔ̃ɔreye ɓe, mɔng ɓe yii muse ani ɓe de ziteni, yii walikãng yii yini suru tɔ̃ving a shãng ruu Laa ni kaaka bii ni. ³² Shɔng vɛɛni ɓe yii azɔng ɓe yii a sĩngsĩng goro a suru bii goro. Shɔngɓɔɔ de tɔɔɓa ni vinaa ɓemi ɓiwu ɓee ɓa, aruviya yii vii walikãng zɔng goro. ³³ Ni kaaka ni jaarɔɔkeni yii shãng ruu taseni aru yuni paa ɓee Daayere Yeso, panti bɔrɔ ayi yuu walikãng. ³⁴ Shɔnɓɔɔ ɓa ayi titi ɓe wu viɓɔɔ ɓa ani ɓa, aru shɔngɓe mɔng langni ani ɓɔɔ, shɔngɓe yii yee ani yii male a ese saka viɓe yii male ɓe ³⁵ a e tee a jaarɔɔkeni yii dɔɔ, shɔng vase anaɓe shɔng ɓeweya kase ɓe. ³⁶ Yusuu, ɓe jaarɔɔkeni yii bawu ni Barnaba (Wuko shɔng riise ni jaa maaseni sĩngsĩng), shɔng Lawi, ɓe a Sipurusi, ³⁷ maale wu mɔng langni ɓe ɓiwu ɓe a ese saka ɓi a shĩng a jaarɔɔkeni yii dɔɔ.