¹ Alaɓe Bituru ni Yɔhana yii de wa jaakalaa ni a la gɔ̃ɔreni, a la nungkopbɛ̃goro. ² Amɔni shɔngɓɔɔ ɓe shɔng yewu dɔɔ ɓa shɔng towu a ware wu yɔ̃rɔng jaakalaa ɓe shɔng ɓani lini. Yii waa shĩng wu amɔni a la dɔɔ gandi aruɓe daa gɔ̃ɔre vi a shɔngɓe ying ɓoo jaakalaa naa. ³ Alaɓe zee Bituru ɓɔɔ Yɔhana ying ɓoo jaakalaa, a gɔ̃ɔre vii a yii naa. ⁴ Bituru, dɔɔse wu nung a bii ni Yɔhana, a shãngni "Mile wo pĩng" ⁵ Shɔngdɔɔɓa ɓi ng mile yii, ang tegn ni lɔɔ daa kpaa viɓɔɔ kɔtɔ a yii naa. ⁶ Vizeniwuko Bituru tɔɔni "N maa Siliva ɓɔɔ zinari ɓaniɓa, viɓe N maa ani, N aa mɔ wuko. A vusu Yeso Kirisi ɓee Nazara rĩng, kĩngta." ⁷ A yii wu ni naa nashang, Bituru yuse wu paa, ɓanijangɓaseniɓa wu dɔɔ ɓɔɔ tuudɔɔ kpaa kaaka. ⁸ Jeng ni paa, shɔng dɔɔɓa ɓi sɔɔ yupa a gaa knni; asɔɔ ɓoo vusu jaakalaa ni Bituru ɓɔɔ Yɔhana, de knni, de jengreni de sɔɔ dɔɔ Laa ni. ⁹ Shɔngzengyi walikãng yii zee wu de knni de sɔɔ dɔɔ Laa ni. ¹⁰ Yii tooni ɓi wuko wɔ̃ng a gɔ̃ɔrevi a liini yɔ̃rɔng ɓee jaakalaa; Yii sɔɔ yii ni bii zaani ɓɔɔ vinungmangka aru viɓe watĩng ni wuni ɓe. ¹¹ Alaɓe dong yii Bituru ɓɔɔ Yɔhana naa ɓe, shɔngzengyi walikãng yii yuke a yãawe a waa yii bii a vusu mɔngɓe shɔng ɓaani Sulemanu ɓe, ni bii zaani vɛ̃ɛni. ¹² Alaɓe Bituru zee viɓemiye, a kase shɔngɓiyi yãa ni, "Nɔ veeye Israilayi, aruvi bii zaanɔ viya? Aruvi nɔng dɔɔse wo nung a bii viya, woni ɓi wo kaaka naa kɔ wo zaani vɔɔ Laa ko shĩng wu kn yaa? ¹³ Laa ɓee Ibirayi, ɓɔɔ Ishaku, ɓɔɔ Yakuubu, ɓɔɔ Laa ɓee wo daayi, wu ko bɔngse wu jaashoni Yeso. Ɓi wu ko shɔngɓe nɔ aa wu asɔɔ bɛ̃ɛ wu a Bilatu tĩng, alaɓe sii kaseke wu yaa wu naa ɓe. ¹⁴ Nɔ bɛ̃ɛ Tɔ̃ɔving ɓɔɔ shɔng Ɓolongɓo Goro ɓemi, nɔ sɔɔ gɔ̃ɔreke shɔng aa nɔ shɔng nungnishɔng vɔɔ. ¹⁵ Nɔ nung shɔng Ãani surubi vɔɔ, ɓe Laa yuse wu paa a yusa-wo ko wo zee viɓe watĩng ɓe. ¹⁶ Ɓi aru shĩngnign a wu rĩng, wu rĩng shĩng shɔngɓemi, ɓe nɔng mile wumi asɔɔ zee wu, ni kaaka. Shĩngnign ɓe a Yeso kaa bii wu ko aa wu tɔ̃ɔving ganteni a nɔ waatĩng walikãng. ¹⁷ Hãmi, mazungyi, N zeeye ni nɔ pele viɓemi a vusu zeknti, anaɓe nɔ yurangkoyi yii pele ɓe. ¹⁸ Vizeniwuko viɓe Laa shãng ni yãa shɔngzeniyi walikãng, ni Kirisi ng kpãare ɓe, watĩng ye hãmi nungoko. ¹⁹ Arugoko, nɔ yaanɔruvini ta, nɔ zuse ke, aruɓe shɔng daa sɔɔke nɔ ruvĩni ɓe, ²⁰ aruɓe la sɔ̃nitɔ̃ɔving daa ɛ a Daayere watĩng; ɓɔɔ aruɓe daa shong Kirisi ɓe shɔng rɔɔwu aru nɔni, ɓe wu ko Yeso. ²¹ Ɓi wu ko Goro koolapa daa teewu wuwa la sɔɔreniviyi walikãng, ɓe aru wu ko Laa shãng tɛ̃tɛ̃ a kooling ni wu ɓolongɓo shɔngzeniyi yãa. ²² Nungoko Muusa shãngni, 'Daayere Laa ng yuse shɔngzeni ɓɔɔ ana miko a zungwayi titi. Nɔ teeshoo a viɓe ng gãale nɔ walikãng. ²³ Ng watĩngke aruɓe shɔngɓe na de weshoo ɓa shɔngzeni waa ɓa shɔng lese wu dongo a titi shɔngzengyi.' ²⁴ Ananko, ɓɔɔ shɔngzeniyi walikãng ɓe gaa ni Samela ɓɔɔ shɔngɓe yii ɛ a wu tũmpu, yii shãng yãa asɔɔ daakeyãa aru diki ɓemiyi. ²⁵ Nɔ ko nɔ jaa shɔngzeniyi ɓɔɔ ɓee polo maaniyãa ɓe Laa pele ni yebɔngwayini, anaɓe gãale Ibirayi, 'Amɔ layee ko yee walikãng ɓee koodanga ying tee zuuku.' ²⁶ Atũmpu ɓe Laa yuse wu jaashoni paa ye ɓe, a shong wu a nɔni shɔɔni, aruɓe daa tɛ̃ɛrɛ nɔ pãnti wu shĩng nɔ walikãng nɔ yaa nɔ kpãrevava."