¹ Alaɓe diki Fentekɔsi e ye ɓe, yii sii walikãng a yãwe mɔng goro. ² Ɓani jãng ɓaseni ɓa yiri ɓɔɔ anaa zuuni bɔrɔ zãsi ke a lapa, a yi vusu yee ɓe yii wɔ̃ng ani ɓe walikãng. ³ Alaɓiko viɓɔɔ anaa rɛɛtɛ yaa vase a yii yuu, a wɔng a shɔng ɓeweya yuu. ⁴ Yii walikãng yii yini suru tɔ̃ɔving yii gaa shãngni yãa ni rɛɛtɛ ɓɔɔyi, anaa ɓe suru ayi ɓe. ⁵ Hami shɔng Yahuda ɓɔɔ ɓe yii sii wɔ̃ng a Urushalima, shɔng Laa yii, a koo walikãng ɓe a tipi ɓemi. ⁶ Alaɓe yii tãa yiri yãa ɓemi, mɔɔ ɓe yii e ye mɔni yii wunteyi aruviya ɓeweya tãayi ying shãng ni yii yãakoo. ⁷ A wɔnseyi vibi zaani yii shãng ni, "Nungoko, shɔngɓemi ɓa shɔng ɓe yii sing shãng yãa Galili ɓaya? ⁸ Pele nukovi wong tãayi viya, shɔng ɓeweya a yãakoo ɓe shɔng yewo ɓe viya? ⁹ Shɔng Fariti ɓɔɔ shɔng Madani, ɓɔɔ Elama, ɓɔɔ shɔng tipi Bagadaza, ɓɔɔ Yahuda yii, ɓɔɔ shɔng Kafadokiyi ɓɔɔ Fantasi ɓɔɔ Asiya, ¹⁰ Firiji ɓɔɔ Bamfili, a Maasar ɓɔɔ gãasi Libiya ɓe mɔng Suur, ɓɔɔ shɔng zanti ɓee Roma, ¹¹ Shɔng Yahudayi ɓɔɔ shɔng ɓe yii ɓoo koo Yahuda, Karitayi ɓɔɔ Larabayi, wo tãayi ke ying shãngni wo yãako aru bɔrɔngbɔ vii peleni ɓee Laa." ¹² Yii walikãng wɔ̃ngseyi vii bii zaani yii wungte; Ying shãngshe wee ni, "Ɓemi taseki viya?" ¹³ Shɔngɓɔɔ ying baaseyi ang shãng ni, "Yii puuye ni mɛɛ rɛɛni la polo ni." ¹⁴ Bituru shii ni kop atu goromi ni, a too yiri yãa a shãngshe yii ni, "Shɔng Yahudayi ɓɔɔ shɔng walikãng ɓe yii wɔ̃ng a Urushalima ɓe, nɔ ze viɓemi ke; nɔ tee shoo ang ruu. ¹⁵ Aru shɔngɓemi yii de ɓoo ɓa mɛɛ rɛɛni la anaa nɔ shãngmi ɓa, aru ɓi la tati ɓee diki ko shee. ¹⁶ Ɓemi ɓi viɓe shɔngzeni Yowel sii shãng ɓe koː ¹⁷ 'Ing wɔ̃ng a diki ɓe koo ing sɔ̃ɔyãa ɓe,' Laa shãng ni, 'N wɔse ing Suru a sɛ̃ɛ bii walikãng. Nɔ jaa veeyi ni jaa sooye yii ying shãng yãazeni, nɔ jaa jekasayi ying ze ruu suru, ɓɔɔ nɔ kɔ̃ɔti shɔngbɔrɔyi ying lɔre lɔreni. ¹⁸ Ananko ang jaashoniyi ɓɔɔ ing jaashoni sooye yii a diki waayi N tɛ̃ɛreyi ing Suru, ying shãng yãa zeni ¹⁹ N tãase nɔ vii bii zaani vɛ̃ɛni a paa lapa ɓɔɔ vii taseni a dii tipi, kpaa, yaa, ɓɔɔ ɓuni zĩngri yaa. ²⁰ Lá ing rii tĩngri shele ing sɔɔ kpaa alaɓe bɔrɔngbɔ diki ɓee Daayere e ye. ²¹ Ing wɔ̃ng shɔngɓe na ɓaa Daayere rĩng ye ing kpa kpenseni.' ²² Shɔng Isrela, tãa ruumi pĩngː Yeso shɔng Nazara ɓi shɔngzeng ɓe Laa anɔ wu ni bɔrɔ vii peleni ɓe zaani bii ɓe Laa pele ni wu kaa bii anɔ titi, anaa ɓe nɔni nɔ yuu nɔ zeye ɓe. ²³ Shɔngɓemi shɔng awu ni Laa kaseni ni wuzeni; nɔ bibi, ni nɔ naa ruvini, nɔ nung wu vɔɔ ni ɓani naa a la jisheni. ²⁴ Aru Laa yusewu paa, akati a kesewu a vɔɔ naa, aruviya vɔɔ daa zenung yini wuni ɓa. ²⁵ Dawuda shãng aru wuni, 'N ze Daayere a la dɔɔ gandimi ang waatĩng, aru wu ang kaa naashang aru ɓe ing daa gise ɓa ɓe. ²⁶ Arugoko ing sinsing tãa puru yato ing rɛɛtɛ dɔɔrewu. Tɔti, ing sɛ̃ɛ bii ing sɔɔ wɔ̃ngni teeni gn. ²⁷ Aru mɔng yang suru ɓa wu waa Hadesi ɓa, kɔ mɔ yamɔ shɔng tɔ̃ɔving wu zewu pũngni ɓa. ²⁸ Mɔ taseng dɔ̃rɔng ɓee surubi ye; mɔng shing ing wɔ̃ngni yato puru a mɔ watĩng. ²⁹ Mazungyi, lii kɔtɔ ing shãngshenɔ ni yato goro aru yebong Dawuda, vɔɔke shɔng gba wu, wu yuusa dong awo bii a e lami. ³⁰ Aruviya wu ɓi shɔngzeni zeeye Laa tense maniyãa ni wuni ni a wu titi laye ing shing shɔngɓɔɔ wu wɔ̃ng a ladong kpanti. ³¹ Zee viɓe ing yeng kn tĩng ɓe ye, a shãng aru yuni paa Kirisi, ni shɔng yawu ɓa a Hadesi ɓa, kɔ wu gigiri bii wu pũng ɓa. ³² Yeso mi - Laa yusewu paa, ɓe woko wo walikãng shɔng nung shini. ³³ Arugoko, shɔng bongse wu a Laa kaa naashang a te suru ɓe Daa vaase ke ɓe, tɛ̃ɛre viɓe nɔ zemi nɔ tãami. ³⁴ Aruviya Dawuda de vɔ̃ng lapaa ɓa, a shãngni, 'Daayere gãaleng Daayere ni, wɔ̃ngta ang kaa naashang. ³⁵ Laɓe ng daa shingmɔ shɔng pongyi amɔ tingting dɔɔ." ³⁶ "Arugoko, wu wɔ̃ngta shɔng Isre'ila yee walikãng yii zeke Laa shingwu ye Daayere ɓɔɔ Kirisi, Yeso ɓe nɔ ɓawu naa a la mi." ³⁷ Alaɓe yii tãa ruumi ye ɓe, ng ɓayi a sĩngsĩng, a gãale Bituru ɓɔɔ gãasi jaarɔɔkeni yii, "Mazungyi, woda pele viya?" ³⁸ Bituru gãale yii ni, "Ya nɔ ruvĩni ta shɔng wu pele nɔ batisima, a Yeso Kirisi rĩng aru nɔ yaseni ruvĩni, nɔng te ani Suru Laa kɔtɔ. ³⁹ Aru vaaseni ɓi nɔ ɓee ɓɔɔ nɔ jaa yii ɓɔɔ shɔng ɓe yii feefe ɓe, a vɛ̃ɛni shɔngzeng ɓe wo Daayere Laa da ɓayi yãa ɓe." ⁴⁰ Ni gãasi ruu vɛ̃ɛni ɓe a yãa ɓe maaseni yii sĩngsĩng, a tɔni, "nɔ kpense nɔ yuu ta vĩnivĩvĩ lako mi." ⁴¹ Yii sɔɔ te wu ruumi, shɔng sɔɔ peleyi batisima, a diki ɓini shɔngzeng pele labɔng tati kɔtɔ ɓe yii pang a yini ɓe. ⁴² Yii ayi yuu kɔtɔ a jaarɔɔkeni vii manteni ɓɔɔ bii tɔ̃reni, a daleni bubula ni gɔ̃ɔreni. ⁴³ Vɔɔ zaani yiyi walikang, vii bii zaani vɛɛni kn tĩng a mɔng awu jaarɔɔkeni yi naa. ⁴⁴ Shɔngɓe yii azɔng walikãng yi e a yãawe a mɔng goro a pele vii a yãawe. ⁴⁵ Yii maale yii vii maareni ɓɔɔ yii vii naa a vaase yi walikãng, dɔɔ ɓe kɔ weya kase ɓe. ⁴⁶ Ala dikimi yii ayi yuu aru ruu goro a jaka Laa. Yii sɔɔ dale bubula a yii yee, yi vaase vishang a yãawe ni yatɔ puru ɓɔɔ sĩngsĩng goro, ⁴⁷ Yii dɔ Laa a wɔng ɓatata ni weeni wali, a lá dɔɔ gandi mi Laa pangse yii shɔngɓɔɔ ayi yupa ɓɔɔ shɔng ɓe yii kpaa kpengseni ɓe.