¹ Atũmpu ɓe yãbaani zingye, Bulusi shong jaadɔɔyi a tũmpu ɓe maaseyi sĩngsĩng ye, a vaaseyi yãa a yaa yii a waa Makidoniya. ² Alaɓe waaye a ning kaayi a shãngshe yii yãa maaseni sĩngsĩng vɛ̃ɛni, asɔɔ e Girisi. ³ A tũmpu ɓe wɔ̃ngye shele tati a mɔngwa, shɔng Yahudayi ɓase yãa aru wuni alaɓe de tuke Siriya ni, asɔɔ lere asɔɔ tũmpu ni Makidoniya. ⁴ A shing wu dɔɔ a ranteni Asiya ɓe Sobatarusi Burusi jãa a Ɓiriya; Aritasusi ɓɔɔ Sekundusi, yii walikãng shɔng zɔnganiyi a Tasaloniya; Gayusi shɔng Darbe, Timotawusi ɓɔɔ Arisitaikusi ɓɔɔ Tofimusi, a Asiya. ⁵ Shɔng ɓemi yii waa shɔɔni a woni yii sɔɔ gawo kɔtɔ a Tiroasi. ⁶ Wo tukeye fefe a tipi Fillipi a tũmpu diki ɓe shaani bubula, a diki maani wo e Tiroasi. Wo wɔ̃ng a mɔni diki naawatati. ⁷ A diki shɔɔni ɓee diki naawatati, alaɓe wo museye mɔngoro wo dale bubula, Bulusi shãngshe shɔng dũngni yii ni. Sing pele dɔ̃rɔ̃ng ɓe daa yaa mɔngɓi ni gandi ɓɔɔ, asɔɔ gɔ̃ɔ wu yãa waani yuu titi zii ni nung. ⁸ Yaa mɔng zeni vɛ̃ɛni a jakalapa amɔng ɓe wo muse ɓe. ⁹ Jesang ɓɔɔ sii wɔ̃ng a nung-ɓoko jaaka ɓe wu rĩng ni Yutikusi, ɓe roo nunroong vɛ̃ɛni. Anaa ɓe Bulusi shãng yãa gbĩngtang, jaa jesang, dong a yuu nunrɔ̃ng a wete a jaaka lapa ɓe vɔ̃ni tati pengwu vɔɔ. ¹⁰ Bulusi lɔɔ tipi a yɔɔre awu bii a kɔɔwu. A shangni, "Nɔna yɔɔre yuu ɓa, wu dong ni surubini. ¹¹ Asɔɔ waa jaaka lapa tɔti a daale bubula a shaayi. A tũmpu laɓe shãngyã gbĩntang gandi ni nung asɔɔ yai. ¹² Yii sɔɔre jaa ɓi ni surubini a kpa sĩngsĩng roreni vɛ̃ɛni. ¹³ Wo bibi wo waa tĩng shɔɔni a Bulusi ni kɔpɔwal a tuke Assosi, a mɔngɓe wo pele wo too Bulusi a vuzu tusi. Ɓemi ɓi viɓe wu bibi shinke wu pele ɓe, aruviya kaseke wu jãa ni tipi . ¹⁴ Alaɓe kpawo ye a Assosi, wo toowu a kɔnpɔwal a waa Mitilene. ¹⁵ Alaɓe wo tukeye mɔng waa ye, wo e a gandi ɓɔɔ a kati mɔngɓe mɛɛ ɓa ani ɓa ɓee Kiyosi. A diki ɓe a tĩng wo lii tipi mɔngɓe mɛɛ ɓa ani ɓa ɓee Samisi, a diki ɓɔɔ tɔti wo e ɓundang Militusi. ¹⁶ Aruviya Bulusi kase wu jãa ni Afisa, Aruɓe daa yese laa ɓa a Asiya ɓa, aruviya wu a dɔɔ rateni waani Urushelima aru diki Lɔɔnisuru, na daa wɔ̃ng kɔtɔ wu pele ananko. ¹⁷ A Militusi a shong veeye yii a Afisa a ɓaa wu yuu ni yuubɔrɔ jaakalaa. ¹⁸ Alaɓe yii ewu bii ye, a gãaleyi ni, "Nɔni nɔ yuu nɔ zeye, a diki ɓee shɔɔni N nadɔɔ a tipi Asiya, Anaaɓe N yese laa ni nɔni dikidi. ¹⁹ N kn ting ni peleni shoni Daayere ni yuu roreni ɓɔɔ sĩngsĩng ɓɔɔ mɛɛnung, ɓɔɔ a maaseni ɓe kpang ɓe aru langseni bang ɓe shɔng Yahada yii lanseng ɓe. ²⁰ Nɔ ze ye anaaɓe N de sɔɔ tũmpu ɓa a vibe lii kɔtɔ, anaɓe N mantenɔ a gaa gbang tɔ a yee-yee ɓa, ²¹ ani yãa aru shɔng Yahudayi ɓɔɔ shɔng Girikiyi aru kɔseni sĩngsĩng a Laa bii ɓɔɔ gn shini a wo Daayere Yeso bii. ²² Zepĩng hãmi, N waa Urushelima, a dɔɔ ɓe Suru shing, N de ze viɓe daa kpang a mɔni ɓa, ²³ aɓe Suru kpelenkpe a yãa ang bii a ɓundang ɓeweya, dingre saka ɓɔɔ kpãreni gang kɔtɔ. ²⁴ N de tong surubi ɓa a viɓɔɔ ɓa, N na daa pele vii peleni ɓe N te a Daayere Yeso, wu shãng polo ruu tɔ̃ving Laa ani pãnti. ²⁵ Hami zepĩn, N zeye nɔ walikãng, a vuzu shɔngɓe waake N shãngshe rooni koo kpanti, nɔng zeng waating tɔɓa. ²⁶ Arugoko N shãngshe nɔ a diki ɓemi, aruviya shɔngɓɔɔ kpaa ɓa a N naa ni ɓa. ²⁷ N de ɓaase jãngɓa N gãale nɔ dongoro aru kaseni Laa. ²⁸ Arugoko nɔ kɔɔnɔ yuu, ni viva ɓe Suru Tɔ̃ɔving ɓe nɔ yuubɔrɔ-vizeeni. Nɔ kɔɔbii ta ni gaa jaakalaa, ɓe wooni wu bibi kpaa. ²⁹ N zeye a N tũmpu waani, vĩnivĩvĩ vijĩngti ng e nɔ titi ng yaa vivayi ɓa. ³⁰ Kɔ a nɔ titi bii shɔngɓɔɔ ying yupa yii lese ruu nungoko aru yii gɔ̃ɔ wu jaadɔɔyi ni gaa. ³¹ Nɔ wɔ̃ng ni zeni. Nɔ yegn a saa tati N de shii ɓa N de daa nɔ yuushoo gɔ̃ɔni ɓa zii ni là ni walikãng mɛɛnungni. ³² Hãmi N shing nɔ ye a Laa naa ɓɔɔ wu ruu pãnti, ɓe daa yuuse nɔ ni paa, wu a nɔ vii dɔɔ ɓee titi Laa ni shɔngɓe sɔ̃ɔkeye kpelengkpe ɓe. ³³ N de shiing nung ɓa a shɔngɓɔɔ saa sũurɛ̃ɛng, ɓɔɔ gɔɔli, kɔ fara bii ɓa. ³⁴ Nɔ ni nɔ yuu nɔ zeye N shoore N yuu yɔ̃ɔreni ni N naa ɓemi ɓɔɔ shɔngɓe yii ni mini ɓe. ³⁵ Avi walikãng N tasenɔ kaɓe nɔ daa yise shɔngɓe yii kaaka ɓa a peleni vishooni, ɓɔɔ yeni gn aru Daayere Yeso, ruu ɓe wu ni wu yuu shãng ɓeː 'Zuuku ɓee ani jãa ɓee teni kɔtɔ."' ³⁶ Atũmpu ɓe shãngye anaa ɓemi ɓe, a tãng a tipi a gɔ̃ɔre Laa ni yini walikãng. ³⁷ Kaani yãa vɔɔ sii ani vɛ̃ɛni aɓe yii kɔse Bulusi a dɔɔle wu bii ni yãa. ³⁸ Yii sĩngsĩng walikãng leseyi aru viɓe shãng ɓe, ni ying zewu waatĩng tɔ ɓa. Aɓe yii sɔɔ shing wu a tuusi.