¹ Bulusi e Dariba ɓɔɔ Lisitira, zepĩn, jaadɔɔ ɓɔɔ amɔni ɓe wu rĩng ni Timotawu, sooye Yahuda jaa ɓe azɔng kɔtɔ, vizeni wuko yeɓi ɓi shɔng Giriki. ² Zungɓi ɓee Lisitira ɓɔɔ Ikoniya yii shãng wu ruubi kɔtɔ. ³ Bulusi kase wu waani wuni, too wu a yere wu shaa aru shɔng Yahuda ɓe yii a mɔni, aruviya yii zeye yeɓi ɓi shɔng Giriki. ⁴ Alaɓe yii de waani a ɓundangyi ɓi, yii tuke rudani ɓe shɔng kase yii dũng ɓe a jaarɔɔkeniyi ɓɔɔ shɔng bɔrɔyi ɓe yii a Urushalima ɓe. ⁵ Alaɓe shɔng dũngniyi yii de bɔngni kaaka gn shĩni asɔɔ shang a làgandi mi. ⁶ Bulusi ɓɔɔ wu shɔng dɔɔkni yii tuke kaa Firigiya ɓɔɔ Galanti, aruviya Suru Laa zãareyi yii waa yãa a tipi Asiya. ⁷ Alaɓe yii e ye maani ni Misiya ɓe, yii bee yii waa Batiniya, vileseni wuko Suru Yeso zãareyi a kati. ⁸ Yii tuke Misiya, a lɔɔni dii ɓundang Torowasa. ⁹ Zenitĩng ese Bulus ni ziiː weni shɔng Makidoniya ɓɔɔ shii a mɔni, a gɔ̃ɔrewu a shãngni, “Eta a vusu Makidoniya mɔ yise wo naa.” ¹⁰ Laɓe Bulusi ze vii suuru ye ɓe, a mɔn tɔni won waa Makidoniya kɔtɔ, an tɔni Laa ɓawo yãaye ni wo waa waayãa ruutɔ̃ving a yii bii. ¹¹ A mɔngɓiko tuuni Torowasa, wo kpaa vii dɔrɔng gbololo ɓee waani Samutaraki, ni gandi ɓɔɔ wo e Niyapolisi. ¹² A mɔngɓi wo sɔɔ waa Filipi, ɓe wuko ɓundang Makidoniya, tɔ̃ving ɓundang ɓe a koo ɓee Roma, wo sɔɔ wɔ̃ng a ɓundang ɓini ɓee diki ɓololo. ¹³ A Diki Wɔ̃keni wo ke dɔ̃rɔ̃ng kaa yoo, a mɔngɓe wo tɔɔ lɔɔ daa wɔ̃ng mɔng gɔ̃ɔreni. Wo wɔ̃ng a tipi a shanyãa ni sooye ɓe wo e a yãawe ɓe. ¹⁴ Sooye ɓɔɔ rĩng ni Lidiya, maale rãani fara a ɓundang ɓee Tayatira, ɓe dũng Laa, tãawo. Daayere Purewu sĩngsĩng ni wu tãa viɓe Bulusi shãngɓe. ¹⁵ Alaɓe wuni wu yeni shɔng pele yii batizima ye, gɔ̃ɔrewo, a shãngni, “Nɔ na ɓooreng yoori ye ni ng wɔ̃ng tɔ̃ving a Daayere, e ta nɔ wɔ̃ng ang yee” a gɔ̃ɔrewo. ¹⁶ A e alaɓini, wo de waa mɔng gɔ̃ɔreni Laa ni, a mɔngni wo kɔse ni jaa sooye foo wu zãasi zeeni ani. Ese wu yubɔrɔ yãa jĩni vɛ̃ɛni. ¹⁷ Sooye ɓemi dũngle Bulusi ɓɔɔ ni woni a atũmpu a lanke yãa, a shãngni, “Shɔng ɓemi yii ɓi jaashongni ɓee Laa Yuuranko. Ying gãlenɔ dɔ̃rɔ̃ng kpengseni.” ¹⁸ Pele viɓemi diki vɛ̃ɛni. Bulusi lese yato ni wuni a raa nung a gãale suru ɓi ni, “N gãalemɔye a Yeso Kirisi rĩng keta a sooye mi bii.” Sɔɔ ke a laaɓini. ¹⁹ Alaɓe wu yubɔrɔ ze ye yii dɔ̃rɔ̃ng kpani nɔɔye, yii yi Bulusi ɓɔɔ Silasi a gɔ̃ɔkeyi a wareyi a vusu nungmɔɔ a shɔng kaaka naa yii tĩng. ²⁰ Alaɓe yii ese yii ye a shɔng ɓooreni yori tĩng ɓe, yii shãngni, “Shɔng ɓemi ying ese yɔɔreni yuu ye awo ɓundang mi. Yiɓi shɔng Yahuda yii. ²¹ Ying gãale shɔng viɓe ɓa a rudani ni ɓa ɓe shɔng Roma daa teke kɔ a manteɓa.” ²² Amɔngɓini mɔɔ yii yupa a yãa wee a Bulusi ɓɔɔ Silasi yuu; Shɔng ɓooreni yoori tãaleyi fara a bii a gãaleyi ni yii nungyi ta ni kpãtãngyi. ²³ Alaɓe shɔng nungyi ye bototo, asɔɔ maayi dɔɔ a gãyã a gãale shɔng gaaniyi ni yii gaayi tɔ̃ving. ²⁴ Atũmpu ɓe tãa kɔseni yãa ɓiye, yiide lokeyi ni a vusu gãyã a maayi dɔɔ a lá. ²⁵ Ni yuu titi zii Bulusi ɓɔɔ Silasi yii de gɔ̃ɔre Laa ni ɓɔɔ tãangseni Laa soo, gãasi shɔng ɓe shɔng maayi dɔɔ a gãyãmi yii tee shoo a yini. ²⁶ ɓanijang ɓaseni bɔrɔ ziteni tipi peleke, aruɓe dĩngli jaka gãyã ziteke; ɓaninjang ɓaseni ɓa yɔ̃rɔ̃ng jaka pureke, dĩngre saka ɓee shɔng ɓeweya ɓe shɔng maayi kaleke. ²⁷ Shɔng gani gãyã yupa a nungrooni a ze yɔ̃rɔ̃ng jaka gãyãyi puni; zɔ̃wu yewa a bee wu nungwu yuu vɔɔ, aruviya ɓaani shɔngɓe shɔng maayi dɔɔ a gãyãmi yii tãaye. ²⁸ Amɔngni Bulusi lang yiri yãa ni kaaka, a shãngni, “Mɔna lese mɔ yuu ɓa, aruviya wo ko wo dong walikãng a mɔng ɓemi.” ²⁹ Shɔng gani jaka gãyã ɓaa yãa ni shɔng ese wu ɓenkeni a yu tɛ̃ti a ɓo vusu bii de maani rik-rik aru vɔɔ zani, a wete a Bulusi ɓɔɔ Silasi tĩng, ³⁰ a keseyi ni gaa a shãngni, “Shɔng bɔrɔyi, N daa pele nuko vii N kpaa kpengseni viya?” ³¹ Yii shãng ni, “Azɔ̃ng ta a Daayere Yeso, mɔng kpaa kpengseni kɔtɔ, mɔ ni mɔ yeeni.” ³² Yii gãale wu ruu Daayere, ni shɔng gãasi walikãng ɓe a wu yee. ³³ Amɔni shɔng gani gãyã tooyi a zii ɓini, a sɔkeyi riisi, wu bibi ni shɔngɓe yii a wu yee shɔng pele yii Batizima amɔngni dɔngoro. ³⁴ Alaɓe ese Bulusi ɓɔɔ Silasi ye a wu yee a ese yii vishang; a pele puru yato ni yini vɛ̃ɛni ni shɔngɓe yii a wu yee ni, ɓe yii azɔ̃ng a Laa bii. ³⁵ Alaɓe gandi rɔye ɓe, shɔng yoori ɓooni shongyãa a shɔng gani jakagãyã, a shãng ni, “Ya shɔng ɓemi yii ta yii wake”. ³⁶ Shɔng gani jakagãyã rise Bulusi, a shãngni, “Shɔng yoori ɓooreni shongsheng yãaye ni N yanɔ ta nɔ wake. Nɔ e ta hãmi, nɔ waa ɓatata.” ³⁷ Bulusi gãaleyi ni, “Yii nungwo ye a shɔng watĩng ruyɛ̃ɛni ɓa, kɔ aruɓe wo ɓi shɔng tipi Roma kɔ-a ɓaa wo dɔɔ a gãyã. Yii kase yii hãmi yii kesewo ni dɔɔ shɔngɓɔɔ ya? Ɓaǃ Yii eta ni yii yuu yii kese wo ke” ³⁸ Shɔng gani jakagãyã rise shɔng yoori ɓooni ruuɓemi, alaɓe yii tãaye ni Bulusi ɓɔɔ Silasi yii jɔ shɔng Roma ko, bii zayi a kati. ³⁹ Shɔng yoori ɓooreniɓemi eke a gɔ̃ɔreyi a kese yii, a gãaleyi ni yii wata yii yaa ɓundang ɓi. ⁴⁰ Amɔngɓini Bulusi ɓɔɔ Silasi yii ke a jakagãyã a e Lidiya yee. Alaɓe Bulusi ɓɔɔ Silasi yii ze zungɓiyi ye, yii maaseyi sĩngsĩng a sɔɔ yaa ɓundang ɓi.