¹ Shɔngɓɔyi yii e a koo Yahuda a waa koo Antakiya a mante zũngyi, a shãng ni, "Shɔng na de yere nɔ shaa ɓa anaaɓe Musa shãng ɓa, nɔng kpeng ɓa" ² Viɓemi ese Bulusi ni Baranaba bɔrɔ yuyɔreni a bii yii sɔɔ kpaa kongseni yãa ni yini. Arugoko Bulusi ni Baranaba, ni gãasiyi ayi titi, shɔng rɔɔyi a shongyi a koo Urushalima yii waa kpaa jaarɔɔkeni ɓɔɔ shɔng bɔrɔ aruu yɛ̃ni ɓemi. ³ Ananko, alaɓe shɔng dungni yii shongyi ye, yii tuke ni koo Finikiya ɓɔɔ Samariya asɔɔ gãleyi aruu riini ɓe shɔngɓe yisi dũng Laa ɓa yii azɔng. Yii ese shɔng zungɓiyi walikãng puru yato vɛ̃ɛni. ⁴ Alaɓe yii too Urushalima ye, shɔng dũngni, jaarɔɔkeni ɓɔɔ yubɔrɔ yii teyi ke, yii sɔɔ gãleyi viɓe Laa pele ni yini. ⁵ Shɔngɓɔyi a titi shɔngɓe yii azɔng ye, ɓe yii ɓi shɔng Farisayi, yii yupa a shãngni, "Likɔtɔ shɔng yereyi shaa shɔng sɔɔ shĩng yike yii dũng Muusa ruudani." ⁶ Arugoko jaarɔɔkeni ni yubɔrɔ yii e mɔng goro aruɓe yii daa shãng yãa aru ruuɓi. ⁷ A tũmpu yãa lereng vɛ̃ɛni, Bituru yuupa a shãngsheyi ni, "Mazungyi, nɔ zeye ni lini a tumpu ɓe Laa pele rɔɔni a nɔ titi, ni ang yãa ruu shãngni ko shɔngɓe yide zee Laa ɓa yin tãa polo ruu tɔ̃ɔving, yii sɔɔ azɔng. ⁸ Laa, ɓe ze sĩngsing, wuko taseke asɔɔ ayi Suru Tɔ̃ɔving, anaaɓe pele wo jɔ ɓe. ⁹ De shĩng viɓɔɔ ɓa ɓe daa vase wo ni yini ɓa, aɓe sɔkeyi sĩngsĩng ye ni shĩngni gn. ¹⁰ Arugoko hãmi aruvi nɔng maase Laa viya, ɓe nɔ kase nɔ shĩngshee shɔng ɓemi yii vii kpiteni a tuu viya ɓe dabong yii kɔ wo bibi wo de zenung ɓa wo toɓa viya? ¹¹ Wo azɔngye wong kpaa kpengseni aruu pãnti ɓee Daayere Yesɔ, anaaɓe yii jɔ." ¹² Mɔɔ walikãng yii wɔ̃ng singsingsing a tãa ruuɓe Bulusi ni Baranaba ying shãng mi ni taseni ɓɔɔ vizani bii ɓe Laa pele a shɔngɓe yisi de ze Laa ɓa ni yii mɔng bii. ¹³ Atũmpu ɓe yii yaa shãngni yãa ye, Yakubu koseyi, a shãngni, Mazũngyi, nɔ weshota ang yãa, ¹⁴ Siman shãng kaɓe Laa à shɔɔni yise shɔngɓe yisi dũng wu ɓa na ni wu ani tɔ̃ɔving aruɓe daa te shɔngzengyi awu bii aruu wu rĩng. ¹⁵ Ruu shɔngzeni waaye ananko, anaaɓe shɔng binke ɓe, ¹⁶ 'A tũmpu viɓemiyi N zuse, N sɔɔ maa Dawuda sɔngpɔlɔng tɔti, ɓe sii ziiye a tipi; N peng ni paa N sɔɔ sɔre viɓe sii leseye tɔti. ¹⁷ Aruɓe shɔngɓe yisi roo pota yii daa bee Daayere, ni shɔngɓe yisi dũng Laa ɓa walikãng ɓe shɔng ɓayi yãa aru ng rĩng. ¹⁸ Ɓemi ɓi viɓe Daayere shãng, ɓe pele zɔng viɓemiyi ɓe shɔng zeye saa lakolakop. ¹⁹ Arugoko, N sɔ̃re yãa lereni ye ni wo na yɔre shɔngɓe yisi dung Laa ɓa ɓe yii zuse Laa bii ye. ²⁰ Viɓe wong binkeyi wuko yii kese bii ni gaa a leseni dũngni viɓe shɔng sɛɛ ni naa, ɓɔɔ peleni kɔng, ɓɔɔ shaani wɔpɔ viyãɓa ɓe shɔng rawu tuu, ɓɔɔ shaani kpaa. ²¹ Aruɓe shɔng waayãa Muusa ye a ɓundang ɓeweya walikãng a saa lakoplakop sɔɔ waayãa a vusu jaakalaa a diki Wɔ̃keni walikãng." ²² Ruuɓi sɔɔ libami a jaarɔɔkeniyi ni yubɔrɔyi, ni shɔng dũngniyi walikãng, yii rɔɔ Yahuda ɓe shɔng ɓawu ni Barasaba, ɓɔɔ Silasi, ɓe yiko yubɔrɔ shɔng zũngyi, asɔɔ shongyi a Antakiya ni Bulusi ɓɔɔ Baranaba. ²³ Yii binke viɓemi ni yii naa, "Ke a jaarɔɔkeniyi ɓɔɔ yubɔrɔ yii bii, zũngwayi, a waa mazungyi bii ɓe yide yide ze Laa ɓa ɓe yii a Antakiya, Siriya, ɓɔɔ Silikiyaː Yãajiniǃ ²⁴ Aruviya wo tãaye ni shɔngɓɔɔ yii dawo ye yii waye, ɓe wode ayi na ɓa, yii sɔɔ yɔɔre nɔ ye ni ruuɓe lesenɔ yato. ²⁵ Liye awo bii, ɓe wo e ni sĩngsĩng goro, wo rɔɔ shɔngɓɔyi wo sɔɔ shongyi a nɔ bii ni mazũngyi Baranaba ɓɔɔ Bulusi, ²⁶ Shɔngɓe yii maale yii surubi ye aruu Daayere Yeso Kirisi. ²⁷ Arugoko, wo shong Yahuda ɓɔɔ Silasi, ɓe yiko ying gãale nɔ ni yii yãa ruu goro mi. ²⁸ Aruu viɓi lise Suru Tɔ̃ɔving ye ni wo bibi, ni wo na shĩngshe nɔ viɓɔɔ ɓa ayuu ɓe jãa viɓeyi likɔtɔ mi ɓaː ²⁹ Ni nɔ waa fefe ni vishareni ɓe shɔng a vii sɛɛniyi ɓe, kpaa, ni viyãɓa ɓe shɔng rawu tuu kɔtɔ ɓe, ɓɔɔ peleni kɔng. Nɔ na bɛ̃ɛ viɓemi yii ye, nɔng pele vii tɔ̃ɔving. Nɔ wɔ̃ng ɓatata. ³⁰ Ananko, alaɓe shɔng vaaseyi yãa ye, yii waa Antakiya; a tũmpu ɓe yii muse mɔɔ ye mɔng goro, yii ayi labini ɓi. ³¹ Alaɓe yii ɓale ye ɓe, yii tãa puru yato aruu ani kaaka bii. ³² Yahuda ɓɔɔ Silasi, yii zĩngzini shɔngzeniyi, yii ayi kaaka bii ni ruu shãngni vɛ̃ɛni ɓee maani sĩngsĩng. ³³ Atũmpu ɓe yii wɔ̃ng ye ɓee diki vɛ̃ɛni amɔni, shɔngsɔɔ vaaseyi yãa ɓatata yii waa zungyi bii ɓɔɔ shɔngɓe yii shongyi ɓe . ³⁴ Sɔɔ likɔtɔ Silasi wu wɔng amɔni. ³⁵ Bulusi ni Baranaba yii sɔɔ wɔ̃ng a Antakiya, yii Mante shɔng vii asɔɔ waa yãa Daayere (ni shɔngɓɔyi vɛ̃ɛni). ³⁶ A tũmpu diki vɛ̃ɛni Bulusi gãale Baranaba, "Wo zuseta hãmi wo waa deng mazũngyi a ɓundang ɓe wo waaseyi ruu Daayere, wo ze dɔɔ ɓe yii wɔ̃ng ɓe." ³⁷ Baranaba beeke wu too Yɔhana ni yini, ɓe shɔng ɓaa wuni Marakusi, ³⁸ Bulusi tɔɔni de liɓa yii too Marakusi ɓa, ɓe yayi a Bamfiliya a de watĩng ɓa ni yini ayi vipeleni ɓa. ³⁹ Amɔng ɓi ko yãadɔng yupa ayi titi, ɓe shĩngke yii vaase dɔkĩni ni weeni, Baranaba sɔɔ too Marakusi a tuu koo Kuburusi. ⁴⁰ Bulusi sɔɔ rɔɔ Silasi jɔ yii sɔɔ wake, a tũmpu ɓe zungyi awu naa ani pãnti ɓee Daayere. ⁴¹ Amɔng ɓi ko sɔɔ waa koo Suriya ɓɔɔ Silikiya, asɔɔ maase shɔng dũngniyi sĩngsĩng.