¹ Watĩngke a vusu Ikoniyu alaɓe Shawulu ɓɔɔ Baranaba yii ɓooye a yãawe a vusu jaakalaa ɓee shɔng Yahudayi yii sɔɔ shãngyãa ke ɓe shĩngke mɔɔ vɛ̃ɛni ɓe yii ɓaaseni shɔng Yahudayi ɓɔɔ shɔng Girikiyi yii azɔngke. ² Vizeniwuko shɔng Yahudayi ɓe yii dũngyãa ɓa yii sheshe shɔngɓe siiyi dũng laa ɓa yãa a shoo a shĩng yii ke yii wɔ̃ngni vikiyato a shɔng dũngniyi bii. ³ Arugoko yii wɔ̃ng amɔngɓini ɓee la vɛ̃ɛni, a shãng yãa Daayere ni ɓange, laɓe aa yii vitaseni aru ruu ɓee pãnti. Pele viɓemike a aa yii naa peleni vizeniyi ɓɔɔ vizaanibiyi ni Shawulu ɓɔɔ Baranaba yii naa. ⁴ Vizeniwuko shɔng ɓundangɓiyi yii yuu vaaseke; shɔngɓɔɔyi ɓaase yuu ni shɔng Yahudayi, gãasi yii ni jaarɔɔkeniyi. ⁵ Shɔngɓe siiyi dũng Laa ɓa yii ɓaaseni shɔng Yahudayi (a yãawe ni yii yubɔrɔyi) yii bee dɔ̃rɔng aruɓe yii daa kpãareyi yii sɔɔ lɔɔle yii ni tara, ⁶ vizeniwuko alaɓe yii tãa ruumi ye, yii yuuke a waa shɔng Likoniyayi ɓundangiyi ɓee Lisitira ɓɔɔ Dabe ɓɔɔ kaa mɔngɓɔɔyi. ⁷ amɔngɓe yii watĩng ni waani poloruu tɔ̃ɔving. ⁸ A vusu Lisitira shɔngveeyeɓɔ wɔ̃ng a tipi, wu kaaka dɔɔ knni ɓa, wu gbangbita alaɓe yĩngɓi yee wu ɓe, de kn ɓa dɔɔ goro ɓa. ⁹ Jaaveeye ɓemi tãake Shawulu in shãngyãa. Shawulu sɔɔ dɔɔse wu nung a bii dɔrɔrɔ alaɓe zeye shɔngɓi wu gnshĩngni ani wu gante ke. ¹⁰ Arugoko shãngshe wu yãa ni kaaka yiriyãa, "Yupata mɔ shii ni dɔɔ." Alaɓiko jaaveeyeɓi sɔɔ yupake a kn amɔngɓi. ¹¹ Alaɓe mɔɔ ze viɓe Shawulu pele ɓe ye, yii langyãa ni yãako ɓee Likoniya a tɔɔni, "Layi yiirii shɔngzengyiye yii sɔɔ ɛ wo bii ye." ¹² Yii ɓaa Baranaba ni "Zewusi," asɔɔ ɓaa Shawulu ni "Hemisi," aruviya wu ko sii shɔng waani yãa. ¹³ Firisi ɓee Zewusi, ɓe wu jaaka a kaati ɓundang ɓi, ɛse bɔrɔ napo ɓɔɔ tɔ̃ɔving koonila a yãa yɔ̃rɔngyi; wu ni mɔɔ yii kaseke yii aa viyeeni ɓee shaareni. ¹⁴ Vizeniwuko alaɓe jaarɔɔkeniyi, Baranaba ɓɔɔ Shawulu, yii tãa ruumi ye, yii sɔɔ tãale yii farabi asɔɔ yuu ɓanijangɓaseni a ɓoo titi mɔɔ, yii kaayãa. ¹⁵ "Veeyeyi, aruvi nɔng pele viɓemiyi viya? Wo jɔ shɔngzengyi ko, ni surubi ana nɔ ko. Wong gãale nɔ poloruu tɔ̃ɔving aruɓe nɔ daa yaa zɔng nanka viɓemiyi nɔ sɔɔ zuse Laa bii, wuko taake lapayi, ni tipi, ni waapo, ɓɔɔ gãasi viyi ɓe yii a vusu walikãng. ¹⁶ Saa lakoplakop, wuko yaa shɔng yãakooyi walikãng yii kn anaɓe yii kase ɓe. ¹⁷ Vizeniwuko ni ɓemi walikãng, de yaa wu yuu ɓa ɓani shɔngshĩngni nung ɓa, a vusu viɓemi wuko pele vi tɔ̃ɔving a aa nɔ mɛɛ lapa ɓɔɔ la vinagɓayi tɔ̃ɔving, asɔɔ yiise nɔ sĩngsĩngyi ni vishãng ɓɔɔ tãanitɔ̃ɔving." ¹⁸ Kɔ ni ruu ɓemiyi, Shawulu ɓɔɔ Baranaba yii de kpaa ɓa a zãare mɔɔ yeeni vishaareni aru yini ɓa. ¹⁹ Vizeniwuko shɔng Yahudayi ɓɔɔ ɓe yii ɛ a Ikoniya ɓɔɔ Antakiya yii ɛ asɔɔ bɔɔle mɔɔyi. Yii sɔɔ lɔɔle Bulusi ni tara asɔɔ gɔ̃ɔke wu a waare wu yãa gaa, a yii lereni sii vɔɔye. ²⁰ Ni ɓemi walikãng alaɓe jaadɔɔyi yii shiileye a wu kaagn, Yupake asɔɔ ɓoo vusu ɓundang ɓi. Atũmpu diki ɓi, a waa Dabe ni Baranaba. ²¹ Atũmpu ɓe yii waa polo ruulaaye yii sɔɔ kpaa jaadɔɔyi ye vɛ̃ɛni a ɓundang ɓi, yii sɔɔ zuse Lisitira, a waa Ikoniyu, ɓɔɔ Antakiya. ²² Yii watĩng ni ani jaadɔɔyi kaakabi ɓɔɔ maaseni sĩngsĩng aruɓe yii daa watĩng a vusu gnshĩngni, a shãngni "Wong ɓoo Laa roonikpanti ni kpãareni vɛ̃ɛni." ²³ Alaɓe yii rɔɔke yii yubɔrɔ ye a jaakalaa walikãng, yii sɔɔ gɔ̃relaa ye ni ziiniyãa, yii daa yii a Laa naa, ɓe yii azɔng a wu bii ɓe. ²⁴ Alaɓiko yii sɔɔ tuuke ni kaa Bisidiya asɔɔ ɛ a Famfiliya. ²⁵ Alaɓe yii shãng ruulaaye a vusu Faga, yii sɔɔ lɔɔ dii Ataliya. ²⁶ Amɔngwa ko yii sɔɔ ɓoo tuusi a waa Antakiya, amɔngɓe shɔng aa yii Laa pãnti aru vipeleni ɓe yii sɔ̃reyãaye. ²⁷ Alaɓe yii too Antakiya ye yii sɔɔ ɓaase shɔng dũngniyi ye a yãawe, yii gãaleyi viɓe Laa pele walikãng a yii bii ɓe, ɓɔɔ kaaɓe puure yii dɔ̃rɔng gnshĩngni aru shɔngɓe siyi dũng Laa ɓa. ²⁸ Yii wɔ̃ng amɔni ni jaadɔɔyi ɓee diki ɓololo.