¹ Hãmi jakalaa ɓee Antakiya, shɔng zeniyi ɓɔɔ manteni vii yii . Ɓi yiko Baranaba, Siman (ɓe shɔng ɓawu ni Najaa) ni Lukiyas ɓee Kurani, ni Manayan (Hiridus shɔng ladong wesangɓi ) ɓɔɔ Shawulu. ² Alaɓe yii gbãare Daayere ɓɔɔ ziini yãa, Suru Kpelenkpe shãngni, "Keseng Baranaba ɓɔɔ Shawulu ta, yii pele vii shoni ɓe N ɓaayi yãa yii pele ɓe." ³ A tũmpu ɓe yii zii yãa ye, gɔ̃ɔre Laa, yii sɔɔ tɛ̃reyi naa a yuu, shong yii ke. ⁴ Alaɓe Suru kpelenkpe shong Baranaba ɓɔɔ Shawulu, yii sɔɔ waa Salukiya; amɔngɓi ko yii ɓoo kɔmpɔwal a tuke Kuburusi. ⁵ Alaɓe yii a ɓundang Salamis, yii waake ruu Laa a jaakalaa ɓee shɔng Yahudayi. Yii sɔɔ too Yɔhana wu yiseyi naa. ⁶ Alaɓe yii leng koo Batusa ɓe yii a vusu mɛɛ, yii kpaa shɔng paa ɓɔɔ, shɔng yãa jĩingni Yahuda, ɓe wu rĩng ni Bar-Yashau. ⁷ Ɓe wu a yãawe ni Mukadas Sarjiyas Bulus Shɔng kpɛ̃ɛni. Shɔng ɓemi ɓaa Baranaba ɓɔɔ Shawulu yãa, aruɓe daa tãa ruu Laa. ⁸ Alimas, "ɓe wuko shɔng paa" (ɓe wu rĩng shɔng riseye) lere yãa ni yini; pele ke wu rise shɔng roonikoo ni gaa a zɔng ani. ⁹ Vizeni Shawulu, ɓe shɔng ɓawu ni Bulusi, yini Suru Kpelenkpe, shingshewu nung a bii dɔɔrɔrɔ ¹⁰ a shãngni, "Mɔko Ja vĩnivĩvĩ rãamang, mɔ boo bii ye ni yãajĩni ɓɔɔ kpɛ̃rivava. Mɔ shɔngpong ɓee zɔng yato ɓolongɓo ɓeweya walikãng. Mɔ daa zenung ɓa mɔ zãare dɔ̃rɔng gbololo ɓee Daayere ɓa, mɔ daa zenung keya? ¹¹ Hãmi milepĩn, Daayere naa a mɔ yuu, mɔng sɔɔ rii shɔngnungbãti mɔn ze lá ɓa a la wodot ɓani jangɓaseni ɓa viɓɔɔ e ɓoose Alimasi a jaa nung ɓɔɔ mɔng tĩingri; sɔɔ kĩntĩng ke a bee shɔng ɓe yii daa yisewu là. ¹² Atumpu ɓe shɔng roonikoo ze viɓe waatĩngye, a sɔɔ azɔngke, aruɓe ruu Daayere ɓe tãa mi zaawu bii ye. ¹³ Hãmi Bulusi ni wu wesangyi tuu Batusa asɔɔ e Paaga a vusu Banfiliya. Yɔhana yayi a zuuse Urushalima. ¹⁴ Bulusi ni wu wesanɓiyi yii kĩn zanti a waa Paaga a waa Antakiya ɓee koo Bisidiya. Amɔng ɓi ko yii waa ɓo jaakalaa a diki wɔ̃keni a wɔ̃ng a tipi. ¹⁵ Atũmpu ɓaleni ruudani ɓee shɔngzeni, yuubɔrɔ jaakalaa shonsheyi yãa shãngni, a gãleyi ni, "Mazungyi, nɔ ruu ɓee maani sĩingsĩing na ani aru shɔng ɓe yii amɔng ɓemi, shãngta." ¹⁶ Bulus sɔɔ yupaa a taseyi naa, a shãngni, " Shɔng Israyila ɓɔɔ shɔng ɓe nɔ zaa vɔɔ Laa, weshoota, ¹⁷ Laa ɓee shɔng Israyila ɓe rɔɔke daayii a bongseyi ke aɓe yii wɔ̃ng a koo Masar, ni wu pengni naa a keseyi a amɔng ɓini. ¹⁸ Waa saa la ziti ɓe rise nugn ni yini a Jĩngti. ¹⁹ Atũmpu ɓe doose lakoo nawatatiye a vusu tipi Kaanan, asɔɔ awo shɔngbi tipi sangkajaa ɓee yii mare ɓe. ²⁰ Vii ɓemi walikãng kĩntĩng a saa la bmãti ɓɔɔ la ziti atu kopi. A tũmpu viɓemiyi walikãng, Laa ayi shɔng ɓooreni yoori a waa laɓe Samaila là shɔngzeni. ²¹ Shɔngɓiyi gɔ̃ɔre aru kpanti, Laa sɔɔ ayi Saul Kish jaa, wuɓi shɔng laye ɓee Bilyaminu, wɔ̃ng kpanti ɓee saa Laa ziti. ²² Atũmpu ɓe Laa zɔ̃wuye a roonikpanti, shing Dawuda wu wɔ̃ng yii kpanti. Aru Dawuda ko Laa a yãa a shãngni, 'N kpaa Dawuda Yesi jaa ɓe wu maani ang sĩngsĩng, wuko pele viɓe N shing wu pele ɓe.' ²³ A shɔng ɓemi wu shãariyi ko Laa kese shɔng kpengseni Israyila, Yeso, anaa vaase ng pele ɓe. ²⁴ Alaɓe Yeso de e ɓa, Yɔhana waa yãa aru batisima ɓee yaseni ruvĩni a shɔng Israyila bii walikãng. ²⁵ Alaɓe Yɔhana de sɔ̃ɔre wu yãa vipeleni, shãng ni, "A nɔ lereni miko weya? Ɓa miko ɓa. Weshoopĩn, shɔngɓɔɔ teeni a N tũmpu, ɓe wu koodɔɔ N daa zenung kaleni ɓa. ²⁶ Mazungyi, jaa shãari Ibirayi, ni shɔngɓe anɔ titi ɓe yii zaa vɔɔ Laa, aru woko yãa ruu ɓee kpengseni shɔng shongshewo ɓe. ²⁷ Aru shɔng ɓe yii wɔ̃ng a Urushalima ɓɔɔ shɔng ladongyi yide zewu zɔng ɓa, yii tãa yiri yãa ɓe shɔngzeni ɓe shɔng ɓale a diki wɔ̃keni dikidi ɓe lesewu ɓe. ²⁸ Aruviya yide kpa dĩngli ruu ɓa ɓe daa waa vɔɔ nungni ɓa, yii ɓaa Biliatu yãa wu nungwu vɔɔ. ²⁹ Alaɓe yii sɔ̃ɔre yãa viɓe shɔng binke aru wuni ye, yii lɔɔre wuke a yuu la asɔɔ gbãwu a yusaa. ³⁰ Laa sɔɔ yusewu paa a yusaa. ³¹ Shɔng zewu a diki ɓololo ni shɔngɓe yii e ni wuni a Galili waani wuni a koo Urushalima. Shɔng ɓemi yiko hãmi wu shɔng yãa ani. ³² Arugoko wo gãle nɔ ruu tɔ̃vingː vaaseni ɓe e wo daayi bii ³³ Laa shinye wuwɔ̃ng ananko, a wobii, wo yii jaayi, aɓe yuse Yeso paa. Anaaɓe shɔng binke a Zabura vaa zitiː "Mɔ ɓi N jaa, lamɓemi N wɔ̃ng ye Yaara.' ³⁴ Aru wu yuni paa a yusaa, aɓe daa pũng ɓa, shãngye anaaɓemiː 'N shing mɔ kpelenkpe N teremɔ zuuku ɓe N vaase Dawuda.' ³⁵ Arugoko sɔɔ shãng ke a Zabura ɓɔɔː 'Mɔng ya mɔ shɔng kpelenkpe ɓa wu pũng ɓa.' ³⁶ Alaɓe Dawuda sɔ̃ɔre yãa peleni ruu Laa ye awu lakoo, sɔ roo nungrooni; shɔng roorewuke ni wu dabongyi a sɔɔ pũngke. ³⁷ Shɔngɓe Laa yusewu paa de ze pũngni ɓa. ³⁸ Arugoko wu wɔ̃ngta anɔ zeni, mazungyi, aru shɔng ɓemi, shɔng shãng yãa yase ni ruvĩni anɔ bii. Ruudani ɓee Muusa ng shingɓa nɔ rii shɔnzeng yato ɓolongɓo ɓa. ³⁹ Aru shɔng ɓemi Laa sɔɔ rise shɔng walikãng shɔnzeng yato ɓolongɓo ɓe na azɔngye. ⁴⁰ Arugoko nɔ kɔɔbii viɓe shɔngzeni yii shãngke daa kpaa nɔ ɓaː ⁴¹ 'Zepĩn, nɔ shɔng bɛ̃ɛni, wu wɔ̃ng vɔɔzani ɓɔɔ leseni; 'Aru N pele vii shoni anɔ dikiyi, shoni ɓe nɔ daa azɔng ɓa, kɔ shɔngɓɔɔ waase nɔ kɔtɔ.'" ⁴² Alaɓe Bulusi ɓɔɔ Baranaba yii yaa mɔ̃ngɓiye, shɔngɓiyi gɔ̃ɔreyi ni yii e ta a diki wɔ̃ɔkeni ɓee tĩng yii ye shãng yãa ɓi tɔti. ⁴³ Alaɓe wɔ̃ngni ɓee Jaakalaa ɓi sɔ̃ɔyãa ye ɓe, shɔng Yahuda ni shɔngɓe yii a yuu yii dũng Bulusi ɓɔɔ Baranaba, ɓe yii shãngsheyi yãa asɔɔ bɔleyi ni yii waatĩng a pãnti ɓee Laa. ⁴⁴ A diki Wɔ̃ɔkeni ɓe a tĩng, shɔng ɓundang ɓi walikãng yii muse a yãawe aru yii tãa Daayere ruu. ⁴⁵ Alaɓe shɔng Yahuda yii ze mɔɔ ɓi ye, yii yato rãa a kati asɔɔ shãng yãa ɓe de liɓa a yuu viɓe Bulusi shãngɓe asɔɔ dãwu. ⁴⁶ Bulusi ni Baranaba yii watĩng ni shãng ni yãa ni kaaka bii a shãngni, 'Likɔtɔ shɔng shãngshe nɔ ruu Laa ko shɔɔni. Anaaɓe nɔ dɔ̃ɔ ruuɓi ni kati asɔɔ tɔɔni nɔ de waɓa nɔ kpaa surubi ɓe sɔ̃ɔyãa ɓa, zepĩn, wong sɔɔ a shɔngɓe yii de ze Laa ɓa bii. ⁴⁷ Arugoko Daayere gãale wo, ni, "N anɔ naaye nɔ rii ɓengkeni a shɔngɓe yii de ze Laa ɓa bii, aruɓe nɔ daa ese kpengseni a gãasi koodanga." ⁴⁸ A laɓe shɔngɓe yii de zee Laa ɓa yii tãa ruuɓemi ye, yii tãa tɔ̃ving asɔɔ a bongse Daayere ruu. Anaa vɛ̃ɛni ɓe shɔng rɔɔkeyi yii kpaa suru bi ɓe dongdong yii azɔng . ⁴⁹ Laa ruu sɔɔ waatĩng mɔng vɛ̃ɛni a kooɓi. ⁵⁰ Shɔng Yahuda yisɔɔ shinke bɔrɔnbɔ sooyeeyi ɓɔɔ shɔng ladong ɓe yii a ɓundang ɓi. Yii yeese yãa kpãareni a yuu Bulusi ɓɔɔ Baranaba asɔɔ langte yii a koo ɓi. ⁵¹ Bulusi ɓɔɔ Baranaba yii kute zangbu ɓe a yii dɔɔ aruu shɔng koo ɓi. Yii sɔɔ waa ɓundang Ikoniya. ⁵² Jaadɔɔyi sɔɔ yini tãani tɔ̃ving ɓɔɔ Suru Kpelenkpe.