¹ Nɔ ze viɓemiː a diki sɔ̃ɔni yãa la kpãareni ng e kɔtɔ. ² Aruviya shɔngzeng ying wɔ̃ng shɔng kaseni yuu, shɔng kaseni saka, yuutooseni, dãani Laa, ying a yejaa yii bɔrɔ ɓa, shɔng nanka, ɓɔɔ shɔng rĩngte. ³ Ying kase shɔng ɓa, ying tɔ̃ɔre ɓani shɔng ni ɓa, ying dɔɔre ɓa, ying yiyuu ɓa, Shɔng yãgã, a de kase vi tɔ̃ving ɓa. ⁴ Ying wɔ̃ng shɔng leseni shɔng, gbãnka peleni gɔɔni dɔmpa, kaseni yuu ɓe jãa kaseni Laa kɔtɔ. ⁵ Yii yise vi laa kɔtɔ yisɔɔ bɛ̃ɛ wu rubii ye. Nɔ rise zɔng shɔng mi yii kuku ta. ⁶ Aruviya yii gãasi ying ɓo yee-yee ayi bɔle sooye ɓe yide kpɛ̃ɛ ɓa. Ɓemi ɓi zɔng sooye ɓe ruvĩni jãayi kaaka ye sɔɔ gɔ̃ɔyi ye ni gaa. ⁷ Shɔng mante zɔng sooye mi yii dikidi, yide zenung sɔɔni ɓa a ruu nungoko ɓa. ⁸ A dɔ̃rɔng goro mi ko, Yanisu ɓɔɔ Yambirisu yii yuse Muusa ni yãdɔng, shɔng manteni yãjĩni mi yii pele yãgã ni nungoko ni. Ɓi shɔngɓe yii sĩngsĩng vɔɔye ɓe, yii gnshĩngni ɓa ɓee tɔ̃ving ɓa. ⁹ Ying waa ɓa feefe ɓa. Aru yii daa ke kɔtɔ a wo bii gbang, anaa shɔng veere waa yii ɓee. ¹⁰ Mɔ bibi, mɔ dũng N manteni, ruubi, vishãngni, tini kpãareni, kaseni, lemɓa, ¹¹ kpãareni, ɓɔɔ viɓe waatĩng tɔ ni mini a Antakiya, a Ikoniya ɓɔɔ Lisitira. N ti kpãareni mi yii. A vusu ɓemi yii walikãng, Daayere kpengseng. ¹² Shɔngɓe walikãng na kase wɔ̃ngni Laa a vusu Kirisi Yeso shɔng kpãare wu Kɔtɔ. ¹³ Shɔng vĩnivĩvĩ ɓɔɔ nanka shɔng ying lese ni tĩngtĩng, ying jãare shɔngɓɔɔ yii jĩngti yii bibi ying jãa jɔ jĩngti ko. ¹⁴ Mɔ bibi, mɔ wɔ̃ng a viɓe mɔ mante a sɔɔ azɔng ani gatangatang. Mɔ ze shɔngɓe mɔ mante a wu bii ye. ¹⁵ Mɔ zeye ni alaɓe mɔ dong wejaa mɔ ze binkeni tɔ̃ving ye. Ɓemi yii shĩngke mɔ kpɛ̃ɛ aru kpengseni a dɔrɔng gnshĩngni a Kirisi Yeso. ¹⁶ Labini walikãng ɓi Laa a shɔng zeni. Lii kɔtɔ a dɔrɔng dũngni, aru gonteni, ɓɔɔ tɔti manteni a tɔ̃ving. ¹⁷ Ɓemi aruɓe shɔng Laa dũngni daa wɔ̃ng kɔvɛ̃ berengbe, aru vipeleni lii ni walikãng.