Mumuye_01-mzm-x-zing_2ti_text

Vaa 4

¹ N a ruudani mi a Laa tĩng ɓɔɔ Kirisi Yeso, ɓe daa ɓoore shɔng nunpa ɓɔɔ vɔɔ yii yoori ɓe, aru wu eni ɓɔɔ wu rooni kpantiː ² Mɔ waa ruu; mɔ wɔ̃ng ni gnshini kɔ dɔ̃rɔng ani kɔ ɓa ani ɓa. Mɔ gɔ̃ɔyi shoo, mɔ waaseyi yãa, mɔ gonteyi, ni lemɓa ni walikãng ɓɔɔ manteni. ³ Aruviya diki teeni ɓe shɔng daa ti lankeni yãa tɔɓa. Aɓemi, ying shĩng yii manteni ko a tĩng shee, ɓe tɔɔni viɓe yii shoo tãa ɓe ying pele wuko. ⁴ Ying rise nungoko tũmpu, ying sɔɔ rii bii a yãa ɓeri. ⁵ Mɔ bibi, mɔ shĩng sĩngsĩng a vi walikãng, kpãareni ni kaaka; mɔ pele shooni gani viva; mɔ sɔ̃ɔre mɔ vi peleni yãa. ⁶ Aruviya shɔng sɛ̃ɛreng ye. N laa yuni paa eye. ⁷ N nung bang tɔ̃ving ye; N sɔ̃ɔre yuni yãa ye; N yise gnshĩngni ye. ⁸ Shɔng lingseng ranko tɔ̃ving ye, ɓe Daayere, shɔng ɓooni yoori tɔ̃ving, ɓe daa ang a diki waa, ɓa miko shee ɓa, ɓɔɔ shɔngɓe yii kase wu eni. ⁹ Tãare bii ta mɔ en bii tɛ̃ti. ¹⁰ Aruviya Dimosi dang ye. Kase koodanga ɓemi a sɔɔ waa Tasalonika. Kirisenti waa Galatiya, Titusi, sɔɔ waa jɔ Dalimatiya. ¹¹ Ɓi Luka ko goro ni mini. Mɔ kpaa Marakusi mɔ eni wuni aru viya wu vi peleni tɔ̃ving ang bii ni. ¹² N shong Tikikusi a Afisa. ¹³ Mɔ eseng fara ɓe N yaa a Karipusi, laɓe mɔna de eni, ɓɔɔ labini yii, yãgbãngbãng ɓee renkeni. ¹⁴ Elezanda shɔng yãaturu pele vĩni aru mini vɛ̃ɛni. Daayere daa shoore wu viɓe peleng kɔtɔ. ¹⁵ Mɔ bibi mɔ kɔmɔ bii a wu naa, aruviya kaagn ye ni wo rushãngni ni. ¹⁶ A N keseni yuu shɔɔni, shɔngɓɔɔ de shii ɓa ni mini ɓa a ɓemi, shɔng ɓewe ya yii yang. Shɔng na gãa ɓemi ɓa ayi yuu ɓa. ¹⁷ Daayere shii ni mini a sɔɔ maaseng sĩngsĩng aru ɓe, aru miko, wani yãashoni daa sɔ̃ɔyãa, tɔ aru shɔngɓe yide ze Laa ɓa yidaa tãa ɓe. Shɔng rang a zĩngãng yãa. ¹⁸ Daayere daa sɔɔ kpengseng aru wu roonikpanti koolapa. Bɔrɔ ani ɓi wu ɓee ko dongdong. Ananko. ¹⁹ Mɔ jiisheng Biskila, Akpilasi, ɓɔɔ Onisiposusi yee yãa, ²⁰ Erasitusi wɔ̃ng ye a Korinti, N yaa ɓee Tiropimusi vɔɔ a Militusi. ²¹ Mɔ pele dɔɔɓe mɔ daa pele mɔ e ni yãala. Yubulusi jimɔ yãa, ɓɔɔ Puden, Linusi, Kalawudiya, ɓɔɔ zũng yii walikãng. ²² Daayere wu dũng ni mɔ suru ni. Pãnti wu dũng ni mɔni.