¹ Aru ɓemi, N jaa, mɔ maa sĩngsĩng a pãnti ɓe a Kirisi Yeso. ² Viɓe mɔna tãaye ang bii a shɔngzeng vɛ̃ɛni yii yãa, mɔ a shɔng zɔng ani ɓe yidaa sɔɔ mante shɔngɓɔɔ yii jɔ ɓe. ³ Mɔ ti kpãareni ni mini anaa sɔja Kirisi Yeso ɓee tɔ̃ving ɓe. ⁴ Sɔja ɓɔɔ ɓa a yãa sii ɓe daa pele showa ni wu surubi ni ɓa, ɓe daa waare wu yuubɔrɔ a bii ɓa. ⁵ Tɔ ananko, shɔngɓe na ɓi shɔng showa yuleni daa kpaa bɔrɔ ɓa nade ɗũng ruudani ɓa. ⁶ Lii kɔtɔ shɔngɓe lang mɔng vɛ̃ɛni ko wu towu ɗɔɔyɔɔni kulu ko shɔɔni. ⁷ Leere ta a yuu viɓe N shãng mi, aruviya Daayere daa amɔ zeni kɔtɔ a yuu vi walikãng. ⁸ Yeenugn ta ni Yeso Kirisi ni, ɓi Dauda Shãari, ɓe shɔng yuuse wu paa a yuusa. ⁹ Ɓemi aru N ruu tɔ̃ving Laa, aruɓe kpãare aruni ɓe shɔng mang anaa shɔng ruvĩni. Aruviya shɔng de maa ruu Laa ɓa. ¹⁰ Aru ɓemi N ti kpãareni ye aru shɔngɓe shɔng rɔɔyi ɓe aruɓe yii bibi yidaa kpaa kpengseni Kirisi Yeso ɓe aru bɔngni ɓe sɔ̃ɔya ɓa. ¹¹ Ɓemi ɓi shãni nungoko ni, “Wona vɔɔye ni wuni, wong sɔɔ wɔ̃ng ni wuni. ¹² Wona ti kpãareni ye, wong sɔɔ rookoo ni wuni. Wona bɛ̃ɛ wu ye, wu bibi wung sɔɔ bɛ̃ɛ wo jɔ. ¹³ Wona tegn ɓa, te ɓee gn kɔtɔ, aru viya bɛ̃ɛ wu ɓee yuu ɓa." ¹⁴ Mɔ waatĩng ni yeereni yii nugn viɓemi yini. Mɔ ayi a Laa naa ɓani yadɔngseni ɓa; de lii ɓa sɔɔ ɓaase shɔng tãani yii jang kɔvɛ̃. ¹⁵ Tãare bii ta mɔ tase mɔ yuu a Laa anaa shɔngɓe shɔng tenɔye, shɔng vipeleni ɓe wu dɔ̃rɔng tãani yuusɛ̃ɛ ɓa, ɓe mante ruu nungoko. ¹⁶ Mɔ tabii a shɔng shãngkeni yãa nanka ɓɔɔ shɔng tooreni ruubɔng yii bii ni gaa, ɓe shĩng shɔng dũng Laa ɓa. ¹⁷ Yii yãa shãngni bɔɔ mɔng anaa risi. Ayi titi Himinaya ɓɔɔ Filitasi ani, ¹⁸ ɓe yii rise nungoko kuku ye. Yii shãng ni, yuni paa daseye yii sɔɔ nung shɔng gnshini ɓɔɔ yii vɔɔ ye. ¹⁹ Anaaɓemi, gaani dingli Laa shiiye. Awu binkeni ni “Daayere ze shɔngɓe yii ɓi wu ɓee yee” tɔti ni, "Shɔngɓe na ɓaa Daayere rĩng ye wu gise bii a viɓe ɓa tɔ̃ving ɓa ni gaa.” ²⁰ A bɔrɔ yee ɓa vi tɛ̃ɛni zinari ɓɔɔ gɔli yiko shee ɓa. Vi tɛ̃ɛni la ɓɔɔ bɔ̃ti yii jɔ ani. Ɓemi ɓɔɔ yii aru bɔrɔ ani, ɓɔɔ yii jɔ ɓa aru bɔrɔ ani ɓa. ²¹ Shɔngɓe na sɔ̃ɔke wu yuu ye a viɓe ɓa tɔ̃ving ɓa, wɔ̃ng ye vi tɛ̃ɛ vi ɓe tɔ̃ving. Ta bii ye ni gaa, a vi peleni tɔ̃ving ɓee Daayere, sɔɔ gonte wu yuu ye aru vi peleni tɔ̃ving. ²² Yubii ta ni gaa peleni vi wejaa. Mɔ pele vi tɔ̃ving, gnshĩngni, kaseni, ɓɔɔ ɓatata ni shɔngɓe yii ɓaa Daayere rĩng sĩngsĩng ɓolongɓo. ²³ Mɔ bɛ̃ɛ wureni ɓɔɔ yɛ̃ɛleni ruu nungbãatiyi. Nɔ zeye ying yee jaa yãadɔng. ²⁴ De lii ɓa Daayere jaashooni yii pele yãadɔng ɓa. Vipeleni wuko wu roore yuu a shɔng bii walikãng, wu zenung manteni, ɓɔɔ lemɓa. ²⁵ Wu gonte wu shɔng yãgã ni yato zãnzãng. Aruɓe Laa daa ayi dɔ̃rɔng yaani ruvĩni aru zeni nungoko. ²⁶ Ying zenung sɔɔni kɔtɔ a yii lereni aruɓe yii daa ke a jang vĩnivĩvĩ rãmãng, laɓe na yiyi ye aru wu kaseni.