¹ Aru yiseni naa Laa shɔng tɔɔving yii, de lii ɓa N binke nɔ ɓa. ² N ze viɓe nɔ kaseye, ɓemi N vãare ni nɔni a shɔng Makadoki yii bii. N gãaleyi ni, Shɔng Asiya yii gonte bii ye a saa ɓe dasemi. Nɔ kaseni ayi kaaka bii ɓee peleni vimi. ³ Hami, N shong mazungyi ye aruɓe wo vãareni aru nɔni na wɔng ɓa kɔvɛ̃ ɓa aruɓe nɔ daa shii derengde ɓe, anaɓe N shangke nɔ wɔng ɓe. ⁴ Na ɓa anangko ɓa, shɔng Makadoki yina eye yina kpanɔye nɔde shii ɓa, viɓi ng wɔng vii yusɛ̃ɛ-N de shang viɓɔɔ ɓa aru nɔni ɓa-aɓe N shing gn anɔ bii. ⁵ Aru goko N zeye likɔtɔ N gɔ̃ɔre mazungyi yi wa nɔ bii yisɔɔ gonte mɔng ɓatata a tĩng aru viɓe nɔ vaase ni. Vimi wɔngke aruɓe daa wɔng ana zuuku, ɓa shɔng shanɔ kaaka ɓa. ⁶ Viɓe N kase N shang wukoː Shɔngɓe na jeng viye ni naa mani, ng yeng kpaa jɔ ni naa mani, shɔngɓe na sɔɔ jeng viye ni wu kpaa zuuku, ng yeng kpaa jɔ zuuku ko. ⁷ Shɔng walikãng yii avi anaɓe yii shing a sĩngsĩng, yina a ɓa ni showa ɓa kɔ shɔng shingyi ani tiiseni a bii ɓa, aru Laa kase shɔngɓe yii avi ni puru yato. ⁸ Laa ng zenung kɔtɔ wu pãnti awu shang vɛ̃ɛni anɔ bii, aruɓe, dikidi, a vii walikãng, nɔ kpaa viɓe nɔ kase walikãng. Vimi ng wɔngke aruɓe mɔda wating avi peleni tɔ̃ɔving walikang. ⁹ Anaɓe shɔng binke niː "Wuko dake wu vina asɔɔ a shɔng rangyi. Wu wɔngni peleni vitɔ̃ɔving ng wɔngke ng sɔ̃ɔyãa ɓa." ¹⁰ Wuko a shɔng lani mɔng lɔkɔ wu ruu ni bubula aruu vishang wuko ing sɔɔ shangshe mɔ vi kulu ɓe peleni tɔ̃ɔving. ¹¹ Nɔn kpaa vina vɛ̃ɛni aruuɓe nɔdaa wɔng shɔng ani vi ɓe de zãɓa. Vimi ing ese dɔɔreni a Laa bii aruu woko. ¹² Aruu peleni rudani de yise ɓa Laa shɔng ɓolongɓo yii naa ko shee ɓa, viɓi sɔ shang vɛ̃ɛni asɔɔ ri vipeleni ɓe ese dɔɔreni a Laa bii. ¹³ Aruɓe nɔ mani sɔ taseye nɔ vipeleni, nɔng sɔɔ a Laa bɔsengni a mɔng duni wu yãa ɓe nɔ shang ni nɔ yãa aru tɔ̃ɔving ɓee Kirisi. Nɔng sɔɔ a Laa bɔngseni anɔ mɔng ani vina ɓe nɔ dake yike asɔɔ a shɔng walikãng. ¹⁴ Yii kase yii zenɔ kɔtɔ, yisɔɔ gɔ̃ɔre Laa aru nɔni. Ying pele vimi ke aru bɔrɔ pãnti ɓee Laa ɓe anɔ yuu ɓe. ¹⁵ Dɔ̃ɔreni wu waa Laa bii aruu wu ani vii bɔrɔngbɔ ɓe jãa shãngni kɔtɔ.