¹ Wo zeye shɔng na zile wo yee ɓe kodangami ye ɓe wuko wo bii- wo jaka ɓɔɔ ani a Laa bii, ɓa shɔnzeng maa ni naa ɓa, ɓi yee ɓee wɔni dongo a koo Lapa. ² Wo kake yãa vɔɔ a gigiri bii min aruu ɓe shɔng daa kuke wo bii ni fara wɔngni ɓee kolapa. ³ Wong gaa vimi aruu wona ɓoseye shɔng zewo bii ɓa gaa ɓa. ⁴ Ananko alaɓe wo a bii mi, wo kaa ɓa ni wo yɔɔreni yuu, wode kase ɓa shɔng tule wo fara ɓa. Viɓe wo kase wuko shɔng ɓosewo fara a bii, aruu viɓe vɔɔ kɔtɔ daa wɔng ni suru. ⁵ Shɔngɓe gongtewo aruu vimi wuko Laa, ɓe awo Suru a tasewo ni yuu yɔɔreni ɓa a viɓe ing e a ting ɓa. ⁶ Aru goko, kɔ a laweya nɔ wɔng ni gn shini, aru nɔ zeye a laɓe sii wo a yee wo a vusu gigiri bii mi, wo fefe ni Laa ni. ⁷ Aruuviya wo kin ni gn shini, ɓa ni zeni nung ɓa. ⁸ Aru goko wo tii gn ye ani. Wo kaseni wuko wo wɔ̃ng fefe ni gigiri bii a wo wɔng a yee ni Daayere ni. ⁹ Wo shing vimi bɔrɔ awo ting, kɔ wona a yee kɔ wo a gaa, ã wo rorewu sĩinsĩing. ¹⁰ Aruu viya wo walikang won e a Kirisi ting a diki ɓooreni shɔng yori, aruu ɓe woda tee wo dɔɔyɔni gorogo viɓe wo pele ni wo yuu ɓe, kɔ viɓe lii koto kɔ ɓe de lii ɓa ɓe. ¹¹ Arugoko, ɓe wo ze zani Laa ye, wo gɔ̃ɔre shɔng. A viɓe wo zeye a Laa mi, ng sɔng shing gn jɔ vimi wɔ̃ng ye nɔ tĩng gbang. ¹² Wong sɔɓa wo dɔɔwo yuu anɔ bii ɓa, aruviya wɔ̃ng gãalenɔ viɓe nɔda gɔɔre aru woni ɓe, aruu ɓe nɔdaa kase shɔngɓe yii kase ying bongse yuu aru vi ɓongseni, ɓa aru viɓe a sĩngsĩng ɓa. ¹³ Wo sĩngsĩng na keye awo bii, ɓi Laa ɓee; wona awo ruu sĩngsĩng, wo pele aruu wo yuu. ¹⁴ Aru Laa kaseni wuko kn tĩng ni woni, aru wo sɔɔreyãa ɓemi yeː Ni shɔnzeng goro vɔɔ aruu shɔng walikãng, jɔ ananko shɔnzeng walikãng yii vɔye. ¹⁵ Vɔɔ aruu shɔng walikãng, aruɓe shɔngɓe yini surubi yina wɔng tɔɓa ni suruni aruu yii yuu ɓa yii wɔ̃ng aruu shɔngɓe vɔɔ aruu yini asɔɔ yupa. ¹⁶ Arugoko, viɓe yi hami wode ze shɔngɓɔɔ tɔɓa a bii ɓa, anaɓe sii wo mile Kirisi a bii. Hami won mile wu tɔɓa anaɓe sii ɓa. ¹⁷ Arugoko, shɔngɓe wu na ɓa a Kirisi, wuɓi shɔngzen polo. Gbenti viyi daseye, zepĩn, vi walikãng riye hami polo. ¹⁸ Viɓemi yii walikãng ke a Laa bii. Wuko tɔ̃ɔre wo walikãng awu bii ni Kirisi asɔ awo viipeleni ɓee tɔ̃ɔreni wee. ¹⁹ Ɓe wuko, a Kirisi Laa ng tɔ̃ɔre kodanga ing wu bii, ng gãayi ruvĩni tɔɓa a yii yuu ɓa. Wuko awo yãa shãngni tɔ̃ɔreni weeni. ²⁰ Aruu goko shɔng rɔ̃ɔwo shɔng shiini ɓee Kirisi, anaa ɓe Laa sii daa gɔɔre shɔng ni wo kaa bii. Won gɔɔre nɔ, aruu Kirisiː "Nɔ tɔɔre ni Laa niǃ" ²¹ Pele wuke shɔngɓe de ze ruvĩini ɓa wu wɔ̃ng ruvĩini aruu woni, aruu ɓe wodaa wɔ̃ng shɔngzen tɔ̃ɔving ɓe Laa awubii.