¹ Arugoko, aruuɓe wo kpa mɔng vipeleni, jɔ anaa ɓe wo kpa gnkɔni, wo de yaa sĩngsĩng ɓa yereye ɓa. ² Viɓe wong pele wuko, wo bɛ̃ɛ vii vɔ̃ɔseni ni dɔɔrɔng viyusɛ̃ɛ yii. Wode kn ɓa ni taseni shɔng kpɛni ɓa, wode yise ruu Laa ɓa ni kuku na ɓa, wo tase nung goko, wo dɔɔ wo yuu a shɔng bii walikang ni yato ɓolongɓo a Laa watĩng. ³ Shɔng na kuke wo rutɔ̃ɔving, shɔng kuke aruu shɔngɓe ying lese kɔtɔ ɓe. ⁴ Ayi ruu bii, kpatakpa laa ɓe koodanga mi nɔɔle yii sĩngsĩng anizongye. Aru viimi ko, yide zenugɓa yii ze mɔng kɔseni ɓee rutɔ̃ɔving Laa bongseni ɓee Kirisi, ɓe wuko Laa nungsuru. ⁵ Wode shãngɓa wo ruu yuu ɓa, wo shãng Yeso Kirisi ɓe wuko Daayere, ɓɔɔ ni wo yuu woko Yeso jaayee aru nɔni. ⁶ Ɓi Laa ko shãngni, "Zeni wu ɓenketa a tĩngri." Wuko ɓenke a wo sĩngsĩng, wu a zeni ɓe zeni bongseni ɓe Laa a Yeso Kirisi watĩng. ⁷ Wo vii tɔ̃ɔving ani a vusu baka, aruɓe viɓe daa tase a gaa gbang bɔrɔngbɔ kaaka ɓe ke a Laa bii ɓawo ɓe ɓa. ⁸ Wo ɓo kpãareni ye vɛ̃ɛni amɔng walikang, viɓi de jã wo yãa ɓa. Shɔng bɛ̃ɛ woye vɛ̃ɛni, wode yore yuɓa. ⁹ Shɔng kpãare woye vɛ̃ɛni, wode ya wuɓa; shɔng loke woye a tipi yide lesewo ɓa. ¹⁰ Wo too awo bii Yeso wu vɔɔ, aruɓe shɔng daa tase Yeso wu suru bii awo vusu bii. ¹¹ Woko ɓe wo surubii ani dikidi shɔng awo ye a vɔɔ naa aruu Yeso, aruuɓe shɔng daa tase Yeso wu Surubi a awo gigiri bii. ¹² Na anangko, ɓi vɔɔ ing kn awo vusubii, surubii ing sɔɔ pele vipeleni anɔ bii. ¹³ Wo suru ɓee anizɔng goro anaa ɓe shɔng binke ɓeː "N azɔngye, N sɔɔ shãngye" "Wo azɔnye, wo sɔɔ shãngye, ¹⁴ aruu viya wo zeye shɔngɓe ɓe yuse Daayere Yeso wuko daa sɔɔ yusewo pa ni Yeso, wusɔ ese wo ni nɔni awu waating. ¹⁵ Vi walikãng aruu nɔko, aruuɓe Laa tɔ̃ɔving ani daa enɔ bii vɛ̃ɛni ɓɔɔ tɔti shɔngzenyi vɛ̃ɛni yidaa pele dɔɔreni wu shaan aruu Laa bongseni. ¹⁶ Aruuɓe wo bii de jileɓa. Anaɓe tase awo gigiribi wo kakabii de sɔ̃ɔyãa ni, awo vusu bii wode kpa kaka ni dikidi. ¹⁷ Aruu ɓe hami, wo ɓooni kpãareni pota mi ing kese wo yuyɔreni ɓe sɔ̃ɔyãa ɓa ɓe bongseni ɓe shɔng daa zenung ɓa shɔng gãa ɓa. ¹⁸ Aruu wong mile ɓa viɓe shɔng ze kɔtɔ mi ɓa wong mile viɓe shɔng ze ɓa ɓe. Viɓe wong ze hami ing tuke kɔtɔ, aruviya viɓe shɔng de ze ɓa wuko yiing wɔ̃ng dongo.