¹ Bi zɔng kaseni ɓewe Daa awo we ɓe shɔng daa ɓawo ni Laa jaa yi, wo ananko. Aru ɓem, koodanga de zewo ɓa, aruɓe de zewu ɓa, ² N shɔng kaseni, wo ham ɓi Laa jaa yi, de ka pĩ ɓa ham viɓe wodaa zɔ̃n a ting ɓa. Wa zeye Kirisi na eye, won wɔ̃n aaa wu bibii aru viya won zewu anaaɓe wu ɓe. ³ Shɔngɓe na shign kɔtɔ a wuni, wu sɔkewu yuu kpelenkpe anaaɓe wu bibi kpelenkpe be. ⁴ Shɔngɓe na pele ruvĩni ye naa rudani, aru viya, ruvĩni naa rudani. ⁵ Nɔ zeye Kirisi tase yuu aruɓe daa too ruvĩni ɓe, awu kaabii ruvĩni ɓa. ⁶ Shɔngɓe na wɔ̃n ni wuni daa waating ɓa ni ruvĩni ni ɓa. Shɔngɓe na waating ni ruvĩni ni daa zewu ɓa kɔ de zewu ɓa. ⁷ N jaa yi, nɔna yaa ɓa shɔngwu lesenɔ ɓa. Shɔngɓe na pele tɔ̃ɔving ɓi shɔng tɔ̃ɔving, anaaɓe Kirisi tɔ̃ɔving ɓe. ⁸ Shɔngɓe na pele ruvĩni ke a vĩnivĩvĩ raaman bii, aruɓe vĩnivĩvĩ raaman pele ruvĩni a ting tɛ̃tɛ̃. Aru rum Jaa Laa tasewu yuu, aruɓe daa dppse vĩnivĩvĩ raaman vipeleni ɓa ⁹ Shɔngɓe naɓi Laa yewu daa waating ɓani ruvĩni ni ɓa, aruviya Laa lɔkɔ awu bii. daa waating tɔɓa ni ruvĩni ni ɓa aruɓe ɓi Laa yewu ɓe. ¹⁰ A ɓem Laa jaa yi, ɓɔɔ vĩnivĩvĩ raaman jaa yi tase yuuː Shɔngɓe nade pele viɓe tɔ̃ɔving ɓa de ke ɓa a Laa bii ɓa, wu bibi de kase zũnɓi ɓa. ¹¹ Bem ɓi ru ɓe nɔ tãa shɔnni ɓe ko nii wo kase wee. ¹² Wona wɔ̃n ɓa anaa Kayinu ɓa, ɓe wu vĩni a bii ɓe nung zũnɓi vɔɔ. Aruvi nuwu viya? aru wu vipeleni ɓi ɓee vĩni Zunɓi ɓee tɔ̃ɔving. ¹³ Na wɔ̃ngsenɔ ɓe vi yini naa a yãa ɓa maazung yii koodanga na bɛ̃nɔ ye. ¹⁴ Wo zeye wo jãa vɔɔ kaka ye wo waa suru ye, arube wo kase wee kɔtɔ. ¹⁵ Shɔngɓe nade kase shɔng ɓa wɔ̃n a vɔni shɔngɓe na ɓɛ̃ɛ zunɓi ye wuɓi shɔng vɔɔ nuni. Nɔ zeye shɔng vɔɔ nuni ɓɔɔ daa ɓo koolapa ɓa. ¹⁶ Aru ɓem wo ze kaseni ye, aruɓe Kirisi awu yuu aru woni. Wo bibi wodaa yuu jɔ kɔtɔ aru wo shɔng bii. ¹⁷ Shɔngɓe vi koodanga na ani ze zunɓi ye a kpãareni, na too nung ye ni gaa, kaseni Laa ki nukovi ni wuni viya? ¹⁸ Nɔ eta n jaa kpatata yi, wona tase kaseni ɓa ni yupa yaa ko shee ɓa, wu wɔ̃n ni taseni tɔ ni nungoko. ¹⁹ Aru ɓem kɔ wo zeye wo ɓi shɔng nungoko, wo azɔng ye awo sinsing awu waating. ²⁰ Wo sinsing na lesewo ye, laa ke bɔrɔ jãwo sinsing kɔtɔ ze vi kɔtɔ walikang. ²¹ N shɔng kaseni yi wo sinsing nade lesewo ɓa, wo kpaani kaka a Laa bii ni. ²² Viɓe wona gɔ̃ɔreye wɔn kpaa kɔtɔ ni wu kaabii, aruɓe wo dung wu rudani ye wo pele viɓe liisewu ye. ²³ Wu rudani tɔɔni wo azɔng awu Jaa Yeso Kirisi rin wosɔɔ kase wee, anaaɓe awo rudani mi. ²⁴ Shɔngɓe na dũng laa rundani ye wɔ̃n ye ni wuni, Laa sɔɔ wɔn jɔ ni wuni. Aru ɓem wo zeye ni wɔ̃n ni woni aru Suru ɓe awo ɓe.