¹ N wɔ̃ngni ɓa kɔvɛ̃ ɓaya? N ɓa jaarɔɔkeni ɓaya? N de zee Yeso wo Daayere ɓaya? Nɔ ɓang naa vishoni a vusu Daayere ɓaya? ² N naɓa jaarekeni a shɔngɓɔɔyi bii ɓa, a nɔ bii N ɓi jaarɔɔkeni. Aruviya nɔ kong shĩngni naa ɓe ng jaarɔɔkeni a vusu Daayere. ³ Ɓemi wu ko ng vi raaniyu a shɔng ying mileng ɓe. ⁴ wo dɔ̃rɔng shaani ɓɔɔ ɓooni ɓaya? ⁵ Wo dɔ̃rɔng tooni sooye shɔng dũngni ɓaya, anaɓe jaarɔɔkeniyi gãasi pele, ɓɔɔ Daayere zũngɓiyi, ɓɔɔ Kefasi? ⁶ Kɔ ɓi miko ɓɔɔ Baranaba ko shee wo dɔ̃rɔng ɓaniɓa wo pele vishoni maaleni vii ɓaya? ⁷ Ɓiwe pele shoni soja a sɔɔ shaare wu weya? Ɓiwe sɔɔ lang guru daa sɔɔ shaa wu rɛni ɓaweya? Kɔ ɓi shɔnggaani vivaɓewe ɓe gaa viva daa sɔɔ maa wu ming ɓa weya? ⁸ N shãng viɓemiyi a dɔɔknni shɔngzengyi kaakanaa ani ya? Rudangni de shãng ɓa ananko ɓaya? ⁹ Anaɓe shɔng binke a vusu rudangni ɓee Musa "Mɔ na shĩngshe lakoropi saka ɓa a yãa alaɓe ng sheke vishãng ɓa" Ɓi lakoropi ko shee Laa yɔreyu a wuni ya? ¹⁰ N shãngyãa ɓa aru wooni ɓaya? shɔng binke aru wo ko, aru shɔngɓe nang lang mɔng wu lang a vusu tenign, ɓɔɔ shɔngɓe ng shekevi wu sheke a vusu tenign ɓee vaaseni vinagbaa. ¹¹ Wo na ruu visuruyi a nɔ titi, ɓivi vɛ̃ɛni wo kpaa viani a nɔ bii ya? ¹² Shɔng gãasi yii nang kpaa dɔ̃rɔng kɔtɔ nɔ bii, wo bibi wo daa kpaa wu jaa vɛ̃ɛni ɓaya? Viɓe wo pele wuko wo tii vii walikãng aruɓe wo daa rii vii zãareni poloruu tɔ̃ɔving ɓee Kirisi ɓa. ¹³ Nɔ de zee ɓa shɔngɓe yii pele shongni vitɔ̃ɔvingyi yii kpaa yii vishãng jɔ a jaakalaa ko ɓaya? Nɔ de zee ɓa ni shɔngɓe yii pele vishongni a yuu alita yii shaa jɔ atiti viɓe shɔng aa a yuu alita ɓaya? ¹⁴ A dɔ̃rɔng gorong ko, Daayere kɔse shɔng yaa ni shɔngɓe yii waaseyãa poloruu tɔ̃ɔving yii kpaa vii shaani jɔ amɔng waani poloruu tɔ̃ɔving ko. ¹⁵ Vizeniwuko N de too naa ani peleni viɓemi ɓɔɔ ko goro ɓa. Ɓɔɔ N de binke nɔ viɓemi ɓa aruɓe nɔ daa peleng viɓɔɔ ɓa. Ng liiseng kɔtɔ N vɔɔke ɓe - aruɓe shɔngɓɔɔ daa shĩngsheng bongseni yuu ɓa kɔvɛ̃ ɓaǃ ¹⁶ Aruviya N nang waakeyãa poloruu tɔ̃ɔving, aruviya liikɔtɔ ng pele anangko. N ɓi vinugnkɔngni N na de waayãa poloruu tɔ̃ɔving ɓaǃ ¹⁷ Aruviya N nang pele viɓemiye ni ng kaseni, N kpaa vidɔɔyɔɔni kɔtɔ. Vizeniwuko N na de pele ɓa ni kaseni ɓa, N vii shĩngninung ani ɓe shɔng ang a naa ɓe. ¹⁸ Hãmi N vidɔɔyɔni nukoviya? Ni alaɓe ng naa waakeyãaye, kɔ N daa aa poloruu tɔ̃ɔving kɔtɔ ɓa ni kpaani viɓɔɔ ɓa ɓɔɔ tɔti aruɓe ng daa tee vii naa ani a vusu poloruu tɔ̃ɔving. ¹⁹ Aruviya kɔ ɓe N maani dɔɔ ɓa a viɓɔɔ walikãng ɓa, N rii shɔng foo walikãng. Aruɓe N daa shaa yii yuu vɛ̃ɛni. ²⁰ A shɔng Yahudayi bii N wɔ̃ng ana shɔng Yahudayi, aruɓe N daa shaa shɔng Yahudayi yuu. A shɔngɓe yii dũng rudangni, N wɔ̃ng ana shɔngɓe dũng rudangni. N pele viɓemi ɓe wɔngye N ɓa shɔng dũngni rudangni ɓa. ²¹ Aru shɔngɓe yii ɓa a vusu rudangni ɓa, N wɔ̃ng ana shɔngɓe yii rudangni ɓaniɓa, ɓe taseye ni N de ke ɓa a vusu rudangni ɓee Laa ɓa ni ng yuu ɓa; N pele viɓemi ke aruɓe N daa shaa yuu shɔngɓe yii ɓa a vusu rudangni ɓa. ²² A shɔngɓe yii kaaka ɓa a bii N wɔ̃ng ana shɔngɓe yii kaaka ɓaniɓa, aruɓe N daa shaa yuu shɔngɓe yii kaaka ɓaniɓa, aruɓe a vii walikãng N daa kpengse shɔngɓɔɔyi pota. ²³ N pele viɓemiyi walikãng aru poloruu tɔ̃ɔving, aruɓe N daa kpaa wu zuuku jɔ ɓe. ²⁴ Nɔ de zee ɓa ni a vusu yuni dɔɔyii shɔngzengyi walikãng yii yuuke, vizeniwuko ɓi shɔngzeng goro tee vidɔɔyɔni? Arugoko nɔ yuu aruɓe mɔ daa kpaa vidɔɔyɔɔni. ²⁵ Shɔng yuni dɔɔ ɓeweya tase yini yuu a vusu viyi walikãng. Yii pele viɓemi aruɓe yii daa tee peere ɓe lese kɔtɔ, vizeniwuko wo pele ɓe aruɓe wo daa tee viɓe sɔ̃ɔyãa ɓa ɓe. ²⁶ Arugoko ɓemi wuko kaaɓe N yuu ɓe, ana shɔngɓe ng yuu ɓani dĩngli ɓa; ɓemi ɓi kaaɓe N yuu ɓe, ɓa ana shɔngɓe ng nung zaasi ɓa. ²⁷ Vizeniwuko N shĩng bii ni kaaka asɔɔ riise wu ana foo, aruɓe atũmpu ɓe N na waake shɔngɓɔɔ yii yãaye, N bibi N daa wɔ̃ng ɓa shɔngɓe shɔng tee wu ɓa ɓe.