¹ N de kase ɓa wɔ̃ng ɓaani zeni ɓa, mazũngyi, ni wo daayi walikãng yii sii a vusu yãasi yii sɔɔ tuuke waapo walikãng. ² Shɔng pele yii pele Baatizima dũngni Musa a vusu yãasi ɓɔɔ a vusu waapo, ³ Yii walikãng yii shaa vishãng suru. ⁴ Yii walikãng yii ɓoovi a vusu suru. Aruviya yii ɓoo a bii tara ɓe dũngyi ɓe, tara waa wu ko Kirisi. ⁵ Vizeniwuko Laa de tãa yii gãasi tɔ̃ɔving ɓa, ɓɔɔ yii vɔɔyi tangke a vusu jĩngti ⁶ Hãmi viɓemiyi ɓi vitaseni a wo bii, aruɓe wo daa wɔ̃ng ɓa ana shɔng yãasini aru vĩnivĩvĩ viyi anaɓe yii pele vii yãasini ɓe. ⁷ Nɔ na wɔ̃ng ɓa shɔng dũngni nãariyi ɓa, ana yii shɔng gãasiyi ɓa. Viɓemi wɔ̃ng anaɓe shɔng binke ɓe "Shɔngzengɓiyi yii wɔ̃ngke a shaa asɔɔ ɓoo, a yupa a pele showaa" ⁸ Wo na pele kɔng ɓa, anaɓe yii vɛ̃ɛni yii pele ɓe. A vusu diki goro, shɔngzengyi Labɔng bãati atu tati yii vɔɔle aruni. ⁹ Kɔ liikɔtɔ wo shĩng Kirisi a vusu maaseni, anaɓe shɔngɓɔɔyi vɛ̃ɛni yii maase wuke sɔɔkɔyi yii sɔɔ leseyi. ¹⁰ Nɔ na sɔɔ wɔ̃ɔmeyãa ɓa, anaɓe yii vɛ̃ɛni yii peleke Laa shɔngshoni ɓee vɔɔ sɔɔ leseyi. ¹¹ Hãmi viɓemiyi watĩng ni yini ana vitaseni a wo bii. Shɔng binkeyi aru wo mangteni- aru woko ɓe sɔ̃ɔniyãa koodanga ɓemi ɛ ɓe. ¹² Arugoko shɔngɓe na lereye ni shiiye ɓatata wu pele lemɓa aruɓe da wete ɓa ɓe. ¹³ Maaseni ɓɔɔ ɓe maare mɔ ɓe shɔngzengyi walikãng yii de zee ɓa. Vipeleniwuko, Laa ɓi shɔngnungoko. Daa yaa ɓa shɔng maase nɔ wu jãa nɔ kaaka ɓa. Ni maaseni ɓi ng sɔɔ pele dɔ̃rɔng yuni, aruɓe mɔ daa kpaa kaaka tiini viɓi. ¹⁴ Arugoko, mazũngyi, nɔ yuu dũngni nãari. ¹⁵ N shãngshe nɔ yaa ana shɔngzengyi ɓe yii zeviye ɓe, aruɓe nɔ ɓoore yoori viɓe N shãng ɓe. ¹⁶ Waa ɓee zuuku ɓe wo tɛ̃ɛrɛ wu zuuku ɓe, ɓa wuko shaani a vusu kpaa ɓee Kirisi ɓaya? Bubula ɓe wo daale ɓe, ɓa wuko shaani a vusu kpaa ɓe a vusu Kirisi bii ɓaya? ¹⁷ Aruviya bubula goro ko shee, wo vɛ̃ɛni ɓemi wo bii goro. Wo walikãng wo shaa bubula goro ɓemi a yãawe. ¹⁸ Nɔ mile Israila ta ɓe aru dɔɔknni sɛ̃ɛ bii. Ɓa shɔngɓe yii shaa vii ani yii pele shoni a yuu alita ɓaya? ¹⁹ Ɓivi N shãng hãmi viya? Ni nãari ɓi viɓɔɔ ya? Kɔ ni vishãng ɓe shɔng aa nãari ɓi vii ɓɔɔ? ²⁰ Vizeniwuko N shãng aru viɓe yii aa ɓe, ni yii aa rãmangyi viɓemiyi ɓa Laa ɓa. N de kase ɓa nɔ wɔ̃ng ni rãmangyi ɓa. ²¹ Nɔ daa zenung ɓooni waa ɓe Daayere ɓa ɓɔɔ waa ɓe rãmangyi. Nɔ daa zenung shaani vii ɓa a Daayere teburu ɓɔɔ shaani a rãmangyi teburu ɓa. ²² Kɔ wo daa shĩng Daayere gnkaani kɔtɔ ya? Wo jãa wu kɔtɔ ni kaaka ya? ²³ "Vii walikãng ɓa rudangni ɓa," vizeniwuko ɓa vii walikãng tɔ̃ɔving ɓa. "Vii walikãng ɓa rudangni ɓa," vizeniwuko ɓa vii walikãng bongse shɔngzengyi ɓa. ²⁴ Nɔ na bɛɛ ɓa nɔ vii yuu ko shee ɓa. Vipeleniwuko, shɔngɓewaya wu bɛɛre wu shɔngkasiyee vii tɔ̃ɔving. ²⁵ Nɔ shaa viɓe shɔng maale a nungmɔɔ walikãng ɓa ni yɛ̃ɛleni ruu sĩngsĩng. ²⁶ Aruviya "Koodanga ɓi Daayere ɓee, ni viɓeyi a vusu walikãng." ²⁷ Alaɓe shɔngɓe de azɔng ɓa na ɓa mɔ yãa shaani vishãng ye, mɔ sɔɔ kase waani ye, mɔ shaa viɓe shɔng shĩng shee mɔ tĩng ɓa ni yɛ̃ɛleni ruu sĩngsĩng ɓa. ²⁸ Vizeniwuko shɔngɓɔɔ na gãale mɔ ye "Viɓemi shɔng aa vii shaareni," alaɓiko mɔ na shaa ɓa, aru shɔngɓe gãale mɔ ɓe, ɓɔɔ tɔti aru lereni ɓee sĩngsĩng - ²⁹ lereni sĩngsĩng ɓee shɔngzeng ɓɔɔ, viɓe N shãng wuko, ɓa mɔ ɓee ɓa. Aruvi shɔngɓɔɔ wu lereni sĩngsĩng daa ɓooreng yoori wɔ̃ngni kɔvɛ̃ viya? ³⁰ N na shaa vishãng ɓiye ni dɔɔreni, aruvi shɔng daa dãng ke aru viɓe N dɔɔrelaa a yupa viya? ³¹ Arugoko, kɔ mɔ shaa kɔ ɓoo, kɔ mɔ pele ko nukoviya, mɔ pele vii walikãng aru bongni Laa. ³² Mɔ wɔ̃ng ɓa ni ruvĩni a shɔng Yahudayi bii ɓɔɔ shɔng Girikiyiyi bii, ɓɔɔ a shɔng jaaka Laa yii bii. ³³ A dɔ̃rɔng gorong ko, N peleke ng tɔ̃ɔre shɔngzengyi walikãng bii a vusu vii walikãng. N de ɓee ɓa viɓe ng daa kpaa ɓa, vizeniwuko ng bee aru shɔng gãasiyi vii kaseni. N pele viɓemi aruɓe yii daa kpeng ɓe.