¹ Nɔ wɔ̃ng shɔng mangtenivi ang bii, jɔ anaɓe N mante a Kirisi bii ² Hãmi dɔɔ nɔye aruviya nɔ yenugn ye aru mini a vii walikãng. N dɔɔ nɔ ye aruviya nɔ yiise naalangsiye anaɓe N aa nɔ ɓe. ³ Hãmi N kaseke nɔ zee ni Kirisi wu ko yubɔrɔ shɔngzengyi walikang, anaɓe veeye wu ko yubɔrɔ sooye, ɓɔɔ tɔti Laa ko yubɔrɔ Kirisi. ⁴ Shɔngɓeweya na gɔ̃ɔrelaaye kɔ ng shãngyãazeni ni wu yuu kuuni de aa wu yuu bɔrɔ ɓa. ⁵ Vizeniwuko sooye ɓe na gɔ̃ɔrelaaye ko ng shãngyãazeni wu yuu ɓa kuuni ɓa de aa wu yuu bɔrɔ ɓa. Aruviya ng wɔ̃ng vii gorong ko alaɓe sũngte wu yuu. ⁶ Aruviya sooye na daa kuu wu yuu ɓa, liikɔtɔ wu sũngte wu yuu pota. Na ɓi viyusɛ sooye wu sũngte wu yuu kɔ wu sũngte wu yuu pota, yaa ta wu kuu wu yuu. ⁷ Aruviya de lii ɓa veeye wu kuu wu yuu ɓa, ɓe taseye ni wu ko nungsusuru ɓɔɔ bongni ɓee Laa. Vizeniwuko sooye wu ko veeye bongni. ⁸ Aruviya shɔng de taake veeye ɓa a sooye bii ɓa, vizeniwuko shɔng taake sooye a veeye bii. ⁹ Aruviya shɔng de taake veeye ɓa aru sooye ɓa. Vizeniwuko, shɔng taake sooye aru veeye. ¹⁰ Ɓemi wuko shĩngke sooye wu kpaa vitaseni naa ani a wu yuu, aru Laa shɔngshoniyi. ¹¹ Kɔ ɓa anangko ɓa, a vusu Daayere, sooye wu wɔ̃ngniyu ɓa naɓa ni veeye ɓa, kɔ veeye wu wɔ̃ngniyu ani naɓa ni sooye ɓa. ¹² Anaɓe sooye ke a veeye bii, jɔ anangko veeye kea sooye bii, arugoko viyi walikãng yii ke a Laa bii. ¹³ Nɔ ɓoore viɓemi yoori ta ni nɔ yuuː Liikɔtɔ a sooye wu gɔ̃ɔrelaa ɓani wuu yuu kuuni ɓaya? ¹⁴ Ɓemi de tase ɓa ni wu yuu ni veeye na yaa sisi yuuye poopo, ɓa vii yusɛ̃ɛ a wu bii ɓaya? ¹⁵ Ɓemi de tase ɓa ni wu yuu ni sooye na yaa sisi yuu ye poopo, ɓa wu ko wu bongni ɓaya? Aruviya shɔng aa wu sisi yuu ana vii kuuni yuu. ¹⁶ Vizeniwuko shɔngɓɔɔ na kaseke lereyãa aru viɓemi, wo dɔɔknni ɓɔɔ tɔɓa, kɔ shɔng jaaka Laa. ¹⁷ Vizeniwuko avusu mantenivi ɓemiyi, N de dɔɔ nɔ ɓa. Aruviya alaɓe nɔ na ɛye a yãawe, ɓa aru vitɔ̃ɔving ɓa vizeniwuko nɔ ɛ aru leseni. ¹⁸ Aruviya shɔɔni, N tãa ni alaɓe nɔ na ɛ a yãawe a vusu jaakalaa, vaaseni ani a nɔ titi, a kaaɓɔɔ N azɔng ye aruni. ¹⁹ Aruviya liikɔtɔ shɔng kpaa vaaseni yuu a nɔ titi, aruɓe shɔngɓe shɔng rɔɔyi yii daa ke gbang a nɔ titi. ²⁰ Aruviya alaɓe nɔ na ɛye a yãawe, ɓa Daayere Shaanivi nɔ ɛ shaa ɓa. ²¹ Alaɓe nɔ nang shaavi, shɔngɓeweya yii shaa yii vishãng alaɓe shɔng gãasiyi yii de shaa yii ɓee ɓa. Shɔngɓɔɔ wuni wɔ̃ko, ɓɔɔ ɓooye riise yuu ye. ²² Nɔ yee ɓe nɔ daa waa shaa asɔɔ ɓoo a vusɔ ɓaya? Nɔng bɛ̃ɛ jaaka ɓe Laa ang sɔɔ aa shɔngɓe yii viɓɔɔ ɓaniɓa yusɛ̃ ya? N daa gaãle nɔ ni viya? N dɔɔ nɔ ta ya? N daa dɔɔ nɔ ɓa aru viɓemi ɓa. ²³ Aruviya N tee a Daayere bii viɓe N sɔɔ gãale nɔ ɓe, ni Daayere Yeso, a zii ɓe shɔng maale wu, too bubula. ²⁴ Atũmpu ɓe dɔɔrelaaye ɓe, a daale asɔɔ shãngni, "Ɓemi wu ko ng bii, ɓe ɓi nɔ ɓe. Nɔ pele viɓemi nɔ yeninugn aru mini." ²⁵ A dɔ̃rɔng gorong ko too jewa atũmpu ɓe shaanivi, a sɔɔ shãngni, "Jewa ɓemi wuko polo maaniyãa ang vusu kpaa. Nɔ pele viɓemi dikidi alaɓe nɔ na de ɓooni, aru nɔ yenugn ni mini." ²⁶ Aruviya alaɓeweya ɓe nɔ nang shaa bubula ɓɔɔ ɓooni a jewa ɓemi, nɔ waake Daayere wu vɔɔni wuwaa laɓe ng ɛ ɓe. ²⁷ Arugoko, shɔngɓeweya, na shaa bubula ɓemiye kɔ ɓoo kpaa ɓe jewa Daayere ye a dɔɔɓe de liiɓa pele ruvĩni ɓe Daayere bii ɓɔɔ wu kpaa ye. ²⁸ Shɔngɓeweya wu maa wu yuu shɔɔni, a dɔ̃rɔng ɓemi ko wu sɔɔ shaa bubula ɓɔɔ wu ɓoo a jewa. ²⁹ Aruviya shɔngɓe na shaaye sɔɔ ɓooye ɓani wu maani bii ɓa shaa a ɓoo ɓooni yoori a wu yuu. ³⁰ Arugoko shɔngɓɔɔyi a nɔ titi yii bii kaaka ɓa ɓɔɔ biɓooni, ɓɔɔ nɔ shɔng gãasiyi yii roonurongye. ³¹ Vizeniwuko wo na maa wo yuuye, shɔng ɓoore wo yoori ɓa. ³² Vizeniwuko alaɓe Daayere na ɓoore wu yooriye,gɔ̃ɔ wo yuu shoo, aruɓe shɔng daa lese wo ɓa a yãawe ni koodanga ni ɓa. ³³ Arugoko, mazũngyi, alaɓe nɔ na ɛye a yãawe nɔng shaa vishãng, nɔ gaa wee jɔ ³⁴ Shɔngɓɔɔ nang tãa wɔ̃ko, wu shaa vishãng ta a yee, aruɓe alaɓe nɔ na ɛye a yãawe daa wɔ̃ng ɓa ɓooni yoori ɓa. Aru vii gãasiyi ɓe nɔ binkke ɓe, N mante nɔ alaɓe nang ɛye.