¹ Aru viani ɓee suruyii, mazũngyi, N de kase ɓa nɔ wɔ̃ng a tĩngri ɓa. ² Nɔ zeeye alabe nɔ sii ɓa shɔng dũngniyi ɓa, shɔng sii rĩngse nɔ ye dɔ̃rɔng dũngni nãariyi ɓee yii shãngyãa ɓa, kɔ ni dɔ̃rɔng ɓeweya yii shĩng nɔ dũng. ³ Arugoko N kaseke nɔ zee ni shɔngɓɔɔ goro ɓe daa shãngyãa ni suru ɓee Laa ɓe tɔɔni, "Yeso ɓi vii leseni," Shɔngɓɔɔ ɓa goro ɓe daa tɔɔni, "Yeso ɓi Daayere" Naɓa ni Suru Laa ɓa. ⁴ Hãmi ani yii ani totok, vizeniwuko ɓi suru goro. ⁵ Mɔngshoniyi ani totok, vizeniwuko yii Daayere goro; ⁶ Ɓɔɔ shoniyi ani totok, vizeniwuko ɓi Laa goro pele vishoni a vusu walikãng. ⁷ Hãmi shɔngɓeweya shɔng aa yii vitaseni ɓee suru aru yiseni naa shɔngzengyi walikãng. ⁸ Aruviya shɔngɓɔɔ Suru yãashãngni kpɛ̃ɛni, shɔngɓɔɔ tok yãazeni ni Suru goro ɓi ko. ⁹ Shɔng aa shɔngɓɔɔ gnshĩng ni Suru gorong ko, shɔngɓɔɔ tɔti shɔng aa wu viani ɓee gangteni ni Suru gorong ko. ¹⁰ Shɔngɓɔɔ shɔng aa wuu peleni vizaanibiyi, shɔngɓɔɔ ɓee shãngniyãazeni. Shɔngɓɔɔ shɔng aa wu kaakanaa wu vaaseni suruyi, shɔngɓɔɔ wu ɓee ɓi shãngniyãakooyi totok, shɔngɓɔɔ ɓee riiseni shãngnirɛtɛyi. ¹¹ Viɓemiyi walikãng yii ɓii shoni vii goro ɓɔɔ Suru gorong ko, aa shɔngɓeweya goro-go, anaɓe rɔɔ ɓe. ¹² Aruviya anaɓe bii goro wu wu kaa bii totok ɓɔɔ yii walikãng yii aa bii gorong ko, jɔ anangko ni Kirisi ni. ¹³ Aruviya ni Suru gorong shɔng pele baptizima a vusu bii goro, kɔ shɔng Yahudayi kɔ shɔng Girikiyi, kɔ foo kɔ shɔng wɔ̃ngni, ɓɔɔ shɔng shĩng yii walikãng yii ɓoo a vusu Suru gorong ko. ¹⁴ Aruviya bii ɓa kaa bii goro ɓa, ɓii vɛ̃ɛni ¹⁵ Dɔɔ na shãngye ni, "Ɓe taseni N ɓa naa ɓa, N ɓa titi bii ni ɓa," viɓɔɔ ɓa ɓe daa zãare wu wɔ̃ngni kaa bii ɓa. ¹⁶ Shoo na sɔɔ shãngye ni, "Ɓe taseni N ɓa nung ɓa, N ɓaa kaa bii ɓɔɔ ɓa," viɓɔɔ ɓe daa zãare wu wɔ̃ng kaa bii ɓa. ¹⁷ Na bii walikãng ɓi nung, shɔng na kpaa vii tãani amɔng ɓeweya? Na bii walikãng ɓi shoo, shɔng na kpaa vii tãanisɛ̃ɛ amɔng ɓeweya? ¹⁸ Vizeniwuko Laa ko rɔɔke kaa bii, kɔ ɓeweya goro a yii titi. a vusu bii anaɓe kase ɓe. ¹⁹ Na yii walikãng goro, gigiribii na wɔ̃ng amɔngɓeweya? ²⁰ Arugoko hãmi yii vɛ̃ɛni, vizeniwuko yii a bii goro. ²¹ Nung daa zenung gãaleni naa ɓa, "N ruu ɓa ni mɔni ɓa." kɔ yuu daa gãale dɔɔ kɔtɔ ni, "N ruu ɓani mɔni ɓa" ²² Vizeniwuko kaa biyi ɓe yii de weni yii kaaka ɓaniɓa yii ko tɔ̃ɔving, ²³ ɓɔɔ kaa biyi ɓe a wo lereni yii ɓa bɔrɔ ɓa, wo aa yii bongni bɔrɔngbɔ, wo kaa bii ɓe wo tase yii ɓa a gaa yii ko ni bongni. ²⁴ Hãmi wo kaa bii yii ɓe taseyi ɓe yii vii kaseni ɓa. Vipeleniwuko, Laa ko ɓaase bii, a aa kaa bii ɓe a wo zeni yii ko tɔkɔlɔng bongni. ²⁵ Pele viɓemi aruɓe shɔng daa kpaa vaase ɓa a vusu bii ɓa, vizeniwuko kase ke shɔng aa kaa bii yii kaseni zɔng goro. ²⁶ Arugoko alaɓe goro ɓɔɔ naa kpãareye, gãasi kaa bii yii kpãare a yãawe; kɔ goro alaɓe kaa bii goro kpaa bɔrɔye, gãasi kaa biiyi walikãng ying tãa puruyato a yãawe. ²⁷ Hãmi nɔ ko Kirisi bii ɓɔɔ tɔti wu goro kaa biyi . ²⁸ Laa sɔɔ rɔɔke a vusu jaakalaa shɔɔni jaarɔɔkeniyi, ziti shɔngseniyi, tati shɔng manteniviyi, ɓɔɔ shɔng gãasiyi ɓe yii pele vibizaaniyi, ɓɔɔ tɔti shɔng ani gangteni, ɓɔɔ tɔti shɔngɓe yii yiseshɔng naayi, ɓɔɔ shɔngɓe yii pele vishoni dũngni shɔngni, ɓɔɔ shɔngɓe yii shãng yãa rɛtɛɓɔɔyi. ²⁹ Shɔng walikãng yii ɓi jaarɔɔkeniyi ya? Yii walikãng shɔngzeni ya? Yii walikãng shɔng vii manteni ya? Yii walikãng yii pele vibizaani ya? ³⁰ Yii walikãng yii kpaa ani ɓee gangteni ya? Yii walikãng yii shãngyãa rɛtɛɓɔɔyi ya? Yii walikãng yii riise yãashãngni rɛtɛyi ya? ³¹ Nɔ ɓɛɛ vianiyi bɔrɔ. Hãmi N tase nɔ dɔ̃rɔng ɓee jãa tɔ̃ɔving ɓe.