¹ Hãmi aru viɓe nɔ binke aru ni ɓeː "Liikɔtɔ ni shɔngveeye na lii sooye ɓa" ² Vizeniwuko aru maaseni a yuu peleni kɔngyi, liikɔtɔ shɔngveeye ɓewaya wu kpaa wu soo yuu, ɓɔɔ sooye ɓewaya wu kpaa wu jere yuu. ³ Liikɔtɔ jere wu pele wu shoni ɓe rooni ni wu soo ni, jɔ anangko wu soo wu pele a wu jere bii. ⁴ Sooye wu kaakanaa ani ɓa a wu bii ɓa, ɓi wu jere. A dɔ̃rɔng gorong ko tɔti, jere wu kaakanaa ani ɓa a wu bii ɓa, vizeniwuko ɓi soo ɓe. ⁵ Nɔ na zãare wee viɓɔɔ ɓa, naɓa nɔ ɓaase yãa aru la ɓɔɔ pota ɓa. Nɔ pele viɓemi aruɓe nɔ daa aa nɔ yuu a gɔ̃ɔrenilaa. Alaɓiko nɔ sɔɔ ɛ a yãawee tɔti, aruɓe Shelan daa maase nɔ ɓa aru nɔ bɛ̃ɛni yini yuu. ⁶ Vizeniwuko N shãngshe nɔ viɓemi aru nɔ kaseni ɓa ana rudangni ɓa. ⁷ Na ɓing kaseni shɔngɓeweya yii na wɔ̃ng ana miko. Vizeniwuko shɔngɓeweya yii viani ɓe ke a Laa bii ani, shɔngɓɔɔ wu zɔng viani ɓemi, shɔngɓɔɔ wu zɔng viani jɔ tok. ⁸ Aru shɔngɓe yii de maa gbaare ɓa ɓɔɔ soovɔɔyi N shangni liikɔtɔ yii wɔ̃ng anangko yii na maa gbaare ɓa, ana miko. ⁹ Vizeniwuko yii na daa yii yii yuɓa, yii pele gbaare. Aruviya liikɔtɔ shɔng maa gbaare ɓe shɔngɓɔɔ wu wɔ̃ng ni kaseni peleni kɔng. ¹⁰ Hãmi aru shɔngyeeyi N aa nɔ rudangni ɓemi-ɓa miko ɓa, vizeniwuko ɓi Daayere -- sooye na vaase ɓa ni wu jeereni ɓa, ¹¹ (Vizeniwuko na vaaseye ni wu jere ni, wu wɔ̃ng anangko ɓa ni maani gbaare ɓɔɔ ɓa kɔ naɓa anangko ɓa wu waa tɔ̃ɔre ni wu jereni), jere na vaase ɓa ni wu sooye ni ɓa. ¹² Vizeniwuko aru shɔng gãasiyi N shãngni -- Miko, ɓa Daayere ɓa -- shɔng dũngni ɓɔɔ wu sooye na ani ɓe wu ɓa shɔng dũngni ɓa, na kasaye wu wɔ̃ng ni wuni, na langte wu ɓa. ¹³ Sooye ɓɔɔ wu jere na ani ɓe wu ɓa shɔng dũngni ɓa, na kaseye wu wɔ̃ng ni wuni, na vaase ɓa ni wuni ɓa. ¹⁴ Aruviya jere ɓe ɓa shɔng dũngni ɓa shɔng sɔɔke wuye kpelengkpe aru wu sooye, jɔ anangko sooye ɓe ɓa shɔng dũngni ɓa sɔɔke wuye kpelengkpe aru shɔng dũngni, naɓa anangko ɓa nɔ jaayi ying wɔ̃ng ni rĩngte, vizeniwuko nungoko shɔng sɔɔke yii ye kpelengkpe. ¹⁵ Vizenuwko alaɓe shɔngɓe ɓa shɔng dũngni ɓa na waaye, wu waata, Aru zɔng viɓemiyi, shɔng dũngni veeye kɔ shɔng dũngni sooye wu tɔɓa a vusu tengniyi ɓa. Laa ɓaa wo yãa aru wo wɔ̃ng ɓatata. ¹⁶ Aruviya mɔ daa zee nukoviya, sooye, ko mɔ daa kpengse mɔ jere kɔtɔ? kɔ mɔ daa zee nukoviya, veeye, kɔ mɔ daa kpengse mɔ sooye kɔtɔ? ¹⁷ Ni kaaɓɔɔ, anaɓe Daayere aa shɔngɓeweya wu vipeleni, shɔngɓeweya wu kn anaɓe Laa ɓaa wu yãa ɓe. Ɓemi ko N ruu dangni a jaakalaayi walikãng. ¹⁸ Shɔng yere shɔngɓɔɔ shaa kɔtɔ alaɓe shɔng ɓaa wu yãa wu azɔng ya? Na pele ɓa wu ke ana shɔng shaadĩngli ɓa. Shɔngɓɔɔ sii shaadĩngli alaɓe shɔng ɓaa wu yãa wu shĩnggn ya? Shɔng na yere wu shaa ɓa. ¹⁹ Aruviya ɓa yeenishaa kɔ shaadĩngli ko shɔng kase ɓa. Viɓe shɔng kase ɓe wu ko dũngni rudangniyi ɓee Laa. ²⁰ Shɔngɓeweya wu wɔ̃ng amɔngɓe Laa sii ɓaa wu yãa wu azɔng ɓe. ²¹ Mɔ sii foo alaɓe Laa ɓaa mɔ yãa ya? Mɔ na yɔreyu ɓa a yuu ni ɓa. Vizeniwuko mɔ na daa kpaa keni kɔtɔ, mɔ kpaa keni. ²² Aruviya shɔngɓewa ɓe Daayere na sii ɓaa wu yãa a vusu wɔ̃ngni foo wu hãmi ɓi Daayere shɔng wɔ̃ngni kɔvɛ̃. a dɔ̃rɔng gorong ko, shɔngɓe sii shɔng kese wuye alaɓe shɔng ɓaa wu yãa wu azɔng, wu ɓii Kirisi foo. ²³ Shɔng woo nɔ kɔtɔ, nɔ na wɔ̃ng tɔɓa shɔngzengyi foo ɓa. ²⁴ Maazũngyi, kɔ wu sii a zɔng wɔ̃ngni ɓeweya alaɓe shɔng ɓaa wu yaa, shɔngɓeweya wu wɔng ni Laa ni. ²⁵ Hãmi aru jesooye yɛ̃ɛrɛyi, N rudangni ɓɔɔ ɓa a yii yuu a Daayere bii ɓa. Vizeniwuko N kɔɔyãa ana shɔngɓe, ni Daayere nugnkɔngni, ɓi nungoko. ²⁶ Arugoko, N lereke aru yuyɔreni ɓeng ɛ ɓe, Liikɔtɔ shɔngveeye wu wɔ̃ng anaɓe wu wɔ̃ng ɓe. ²⁷ Mɔ sooye ɓɔɔ a yee ya? Mɔ na ɓee vãaseni ɓa. Mɔ sooye naɓa yee ɓa, mɔ bɛɛ sooye ɓa. ²⁸ Vizeniwuko mɔ na yɛ̃ɛ sooyeye, mɔ de pele ruvĩni ɓa, ɓɔɔ jesooye yɛ̃ɛrɛ na yɛ̃ɛ jereye, de pele ruvĩni ɓa. Vizeniwuko shɔngɓe yii na pele ye ying kpaa yuyɔreni ɓee totok, N kaseke N raa nɔ a yuu viɓemi. ²⁹ Vizeniwuko N shãng viɓemi, mazũngyiː La tɔɓa. Viɓe yii hãmi a watĩng, shɔngɓe yii sooye ani yii wɔ̃ng weni yii sooye ɓaniɓa. ³⁰ Shɔngɓe ying kaayãavɔɔ yii pele weni yiing kaa ɓa yãavɔɔ ɓa, shɔngɓe ying tãa puruyato pele weni ying tãa ɓa puru yato ɓa, shɔngɓe ying woovi yii wɔ̃ng weni yii vii naaɓɔɔ ɓa, ³¹ shɔngɓe pele vii koodanga yii naa pele ɓa ni vɛ̃ɛni ɓa. Aruviya koodanga ɓee hãmi kpaaye wu sɔ̃ɔyãa. ³² N kase nɔ wɔ̃ng ɓani yɔreyuyi ɓa. Shɔngveeye ɓe de pele gbaare ɓa wu yuyɔreni a yuu viɓe Daayere, dɔɔɓe daa tɔ̃ɔre wu bii ɓe. ³³ Vizeniwuko veeye ɓe yɛ̃ɛ sooye yɔreyu a yuu vii koodanga, kaaɓe pele viɓe wu sooye kase ɓe-- ³⁴ wu lereni vaaseye. Sooye ɓe de yɛ̃ɛjere ɓa ko jesooye yɛ̃ɛrɛ wu yɔreyu a yuu viɓe Daayere, aruɓe daa wɔ̃ng kpelenkpe a vusu bii ɓɔɔ a vusu suru. Vizeniwuko sooye ɓe wu jere ani yɔreyu a yuu viɓe koodanga, kaaɓe daa pele viɓe wu jere kase ɓe. ³⁵ N shãng viɓemiyi aru nɔ vikpaani, ɓa aru N zãare nɔ pele viɓɔɔ ɓa. N shãng viɓemi aru ɓi vi tɔ̃ɔving, aruɓe nɔ daa dũng Daayere ɓa ni yuyɔreni ɓa. ³⁶ Vizeniwuko shɔngɓɔɔ na lereye ni daa zenung wu yiseni yuu ɓa-na waa nung maani gbaare ye sɔɔ liye anangko-wu pele viɓe kase ɓe. Ɓa ruvĩni ng pele ɓa. Yii maa gbaare ta. ³⁷ Vizeniwuko wu shiini a sĩngsĩng na ɓatata, wu naɓa yuyɔreni ɓa ɓɔɔ na de zenung wu yini yuu ɓa, ɓɔɔ na rɔɔye a wu sĩngsĩng ng pele viɓemi, aru wu yise wu yuu, ng pele vitɔ̃ɔving. ³⁸ Arugoko shɔngɓe na yɛ̃ɛ jesooye yɛ̃ɛrɛye pele vitɔ̃ɔving, ɓɔɔ shɔngɓe na rɔɔye ni ng pele gbaare ɓa ng wɔ̃ng tɔ̃ɔving. ³⁹ Sooye wu dɔɔ maani a wu jere bii wu na dong ni nung. Vizeniwuko alaɓe wu jere na vɔɔye, wu dɔ̃rɔng ani wu yɛ̃ɛ shɔngɓe kase ɓe, vizeniwuko wu wɔ̃ng shɔng dũngni Daayere. ⁴⁰ Ang ɓooreni yoori ng wɔ̃ng puruyato na wɔ̃ngye anangko. Ang lereni ng Suru ɓee Laa ani.