¹ Alaɓe nɔ shɔng goro ɓɔɔ wu yãadong ani ni a shɔngɓɔɔ yuu, daa zenung kɔtɔ wu waare wu mɔng ɓooreni yoori a shɔngɓe wu ɓa shɔng yato ɓolongɓo watĩng wu daa Laa shɔng tɔ̃ɔvingyi watĩng ya? ² Nɔ de zee ɓa Laa shɔng tɔ̃ɔvingyi yii ko ying ɓoore koodanga yoori ɓaya? Na ɓi nɔ ko nɔng ɓoore koodanga yoori, nɔ daa zenung ɓa nɔ vaase yãadong ɓe ruu tɔkɔlɔng ɓaya? ³ Nɔ de zee ɓa ni wo ko wong ɓoore Laa shɔngshoniyi yoori ɓaya? Viɓe koodanga daa jãa wo yãa nukoviya? ⁴ Na wɔ̃ngye ni wo ko wong ɓoore yoori a yuu viɓe dikidi yii, aruvi nɔng waare zɔng ruuɓemi a shɔngɓe yii shiini ɓa tɔ̃ɔving a shɔng dũniyi bii ɓa viya? ⁵ N shãng viɓemi aru ng a nɔ yusɛ̃. Shɔngkpɛ̃ɛni ɓɔɔ ɓa goro a nɔ titi ɓemi ɓa ɓe waaye wu vaase zũngyi ɓang ɓaya? ⁶ Vizeniwuko zũngɓɔɔ ng waare zũngɓi ɓɔɔ a mɔng yoori- yii waare viɓemi a shɔngɓe yii de azɔng ɓa watĩng? ⁷ Ɓe wɔ̃ngye nungoko ni nɔng waare wee ɓɔɔ a mɔng yooriɓooreni viɓemi taseke jãa nɔ kaakaye. Aruvi mɔ daa yaa ɓa mɔ kpãare ɓa viya? Ɓivi daa shĩngke nɔ daa yaa ɓa shɔng naanɔdɔɔ ɓa viya? ⁸ Nɔ ni nɔ yuu nɔng pele viɓe ɓa tɔ̃ɔving ɓa ɓɔɔ naaniwee, nɔ sɔɔ pele zũngwayi viɓemiǃ ⁹ Nɔ de zee ɓa ni shɔngɓe yii ɓa shɔng yato ɓolongɓo ɓa ying kpaa Laa roonikpanti ɓaya? Shɔng naa lake nɔ ɓaː kɔ shɔngkɔ̃ngyi kɔ shɔng nãariyi, kɔ veeyeyi ɓe yii aa yuu a mɔng peleni kɔng a nung veeyeyi, kɔ veeyeyi ɓe yii pele kɔng a nung veeyeyi, ¹⁰ kɔ shɔngɓɔɔleniyi, kɔ shɔngnuknyi, kɔ shɔng ɓooniviyi, kɔ shɔng dãani shɔngyi, kɔ shɔngɓe yii raare shɔng vii ying kpaa roonikpanti ɓee Laa kɔtɔ. ¹¹ Nɔ shɔngɓɔɔyi yisi anangko. Vizeniwuko shɔng sɔɔke nɔye, shɔng sɔɔke nɔye kpelengkpe, shɔng kpengse nɔye a Daayere Yeso Kirisi rĩng ɓɔɔ tɔti Suru ɓee wo Laa. ¹² "Vii walikãng ɓa vii dangni ang bii ɓa," vizeniwuko ɓa vii walikãng ɓi vitɔ̃ɔving ɓa. "Vii walikãng ɓa vii dangni ang bii ɓa" vizeniwuko N daa yaa ɓa goro ɓɔɔ a yii titi wu maareng ɓa. ¹³ "Vishãng aru yato, yato jɔ aru vishãng" vizeniwuko Laa ng leseyi zĩngzĩni, Bii ɓa vii peleni kɔng ɓa. Vipeleniwuko, bii ɓi Daareye ɓe, Daayere ng sɔɔ aa viɓe bii kase ɓe walikãng. ¹⁴ Laa ko ng yuse Daayere paa ɓɔɔ tɔti wu ko ng yuse wo paa ni wu kaakanaa. ¹⁵ Nɔ de zee ɓa ni nɔ biiyi ɓi Daayere bii ɓaya? N daa sɔɔ too Kirisi bii ng ɓaase ni sooraani ya? N wɔ̃ng ɓa anangko ɓaǃ ¹⁶ Nɔ de zee ɓa ni shɔngɓe na ɓaase biiye ni sooraani ng rii bii goro ni wuni ɓaya? Anaɓe labini shãng ni, "Yii ziti ɓi ying wɔ̃ng bii goro." ¹⁷ Vizeniwuko shɔngɓe na ɓaase biiye ni Daayere ng rii suru goro ni wuni. ¹⁸ Nɔ yuu fefe ni peleni kɔngǃ Ruvĩniyi ɓe shɔngzeng ɓɔɔ pele ɓe ɓa a wu vusu bii ɓa, vizeniwuko shɔngɓe pele kɔng pele ruvĩniyi a wu yuu bii. ¹⁹ Nɔ de zee ɓa ni nɔ bii ɓi Laa wu Suru jaaka ɓaya, ɓe wɔ̃ng a nɔ vusu bii, ɓe nɔ kpaa a Laa bi? Nɔ de zee ɓa ni ɓa nɔ ko maare nɔ yuu ɓaya? ²⁰ Aruviya shɔng woo nɔ kɔtɔ. Arugoko nɔ dɔɔ Laa ni nɔ bii ɓɔɔ a nɔ vusu suru, ɓe ɓi Laa ɓee.