¹ Ɓemi ɓi dɔɔɓe shɔngɓɔɔ wu zee wo ɓe, ana jaafooyi ɓee Kirisi ɓɔɔ shɔng gaaniyi ɓee vɔ̃seni vinungokoyi ɓee Laa. ² Hãmi ɓi viɓe shɔng kase a shɔng gaaniyi bii wuko shɔng kpaayi shɔng nungoko. ³ Vizeniwuko ang bii ɓivi tɔkɔlɔng nɔ ɓooreng yoori kɔ shɔngzengyi yii ɓooreng. Aruviya N bibi ng de ɓooreng yuu yoori ɓa. ⁴ N de zee ruu langseni ɓɔɔ ɓa goro ɓe ang yuu ɓa, vizeniwuko ɓewa de tase ɓa ng ɓii shɔng nungoko ɓa. Shɔng goro ɓe daa ɓooreng yoori wu ko Daayere. ⁵ Arugoko nɔ na shãngyãa ɓooreni yoori a yuu viɓɔɔ ɓa alaɓe la de tise ɓa, alaɓe Daayere de ɛ ɓa. Wu ko kese a gaa gbang vivɔ̃seni ɓee mɔng tĩngri wu sɔɔ kese lereniyi ɓee sĩngsĩng. Alaɓiko shɔngɓeweya ng tee wu dɔɔni a Laa bii. ⁶ Hãmi, mazungyi, N too dɔɔknni ɓemi ning yuu ɓɔɔ Apolosi aru nɔ ni, aruɓe a wo bii nɔ daa mante dĩngli ruu shãngni ɓemi. "Nɔ na tuuke viɓe shɔng binke ɓa." Viɓemi wɔ̃ngke aruɓe nɔ shɔngɓɔɔ ɓa goro a nɔ titi daa gɔɔre ɓa aru pãnti ɓee shɔngɓɔɔ a yuu shɔngɓɔɔ ɓe ɓa. ⁷ Aruviya ɓiwe daa zee vijãani ɓɔɔ a nɔ titi ɓɔɔ shɔng gãasiyi weya? Mɔ viɓewe ani ɓee shɔngɓɔɔ de aa mɔ ɓa weya? Mɔ na tee kɔtɔ, aruvi mɔng gɔɔreke weni mɔ de tee ɓa viya? ⁸ Nɔ kpaa viɓe nɔ kaseye tɛ̃ɛtɛ̃ɛǃ Nɔ rii shɔng vinaaye tɛ̃ɛtɛ̃ɛǃ Nɔ rookpanti ye-nungoko ɓani woni ɓaǃ Nungoko, N kaseke nɔ rookpanti, aruɓe wo daa rookpanti jɔ ni nɔni. ⁹ Aruviya Laa rɔɔke wo jaarɔɔkeniyi a vitaseni ana shɔng tũmpu, a vusu knni ɓɔɔ tɔti ana shɔngɓe yii a yãatovɔɔ. Wo rii vii mileniye a shɔng koodangayi bii-a jaashoniyi bii, ɓɔɔ tɔti a shɔngzengyi bii. ¹⁰ Wo ɓi shɔng wureniyi aru Kirisi, vizeniwuko nɔ ɓi shɔngkpɛ̃ɛni a vusu Kirisi. Wo kaaka ɓa, nɔ kaaka ani. Shɔng aa nɔ bɔrɔye a bii, vizeniwuko shɔng de aa wo bɔrɔ ɓa a bii. ¹¹ Hãmi ana la ɓemi wo ni wɔ̃ko ni ɓɔɔ sɔ̃ɔti, wo fara ɓooseni ɓi ɓee shɔngrang, shɔng nung wo ye, wo yee wɔ̃ngni tɔti ɓaniɓa. ¹² Wo pele shoni kaakaye, wo pelevishoniye ni wo naayi. Alaɓe shɔng na dãa woye, wo tɛ̃ɛ zuuku. Alaɓe shɔng na kpãare woye, wo maanugn. ¹³ Shɔng na dãa woye, wo shãngyãa ni lemɓa. Wo riiye ana pudĩngdĩng ɓee koodanga ɓɔɔ vii sɛ̃ngniyi ɓee vii walikãng, hãmi jɔ anangko. ¹⁴ N de binke viɓemiyi ɓa aru ng aa nɔ yusɛ̃ ɓa, vizeniwuko ng binke ke aru ng gɔ̃ɔnɔ shoo ana maajaayi ɓe ng kaseyi ɓe. ¹⁵ Aruviya kɔ nɔ shɔng gaaniyi ani ɓe waa labɔng kop a vusu Kirisi, nɔ yerejaayi ɓani vɛ̃ɛni ɓa. Aruviya N rii nɔ yejaaye a vusu Kirisi Yeso aru poloruu tɔ̃ɔving. ¹⁶ Arugoko N gɔ̃ɔrenɔ nɔ wɔ̃ng shɔng manteni a mini. ¹⁷ Arugoko N shongshee nɔ Timothy, Maajaa kaseni ɓɔɔ jaa nungoko a vusu Daayere. Wu ko ng yerenɔgn ang dɔ̃ɔknniyi a vusu Kirisi, anaɓe N manteyi kɔ a mɔngɓeweya ɓɔɔ a jaakala ɓeweya. ¹⁸ Hãmi nɔ shɔngɓɔɔyi yii rii shɔng tooseniyuye, ying peleke weni N daa ɛ nɔ bii tɔɓa. ¹⁹ Vizeniwuko N ɛ nɔ bii kɔtɔ ɓanijangɓaseniɓa, Daayere na kaseye. Alaɓiko N zee ruu ɓee shɔngɓe ying toseyu ɓe, vizeniwuko N zee yii kaakanaa. ²⁰ Aruviya Laa roonikpanti ɓani yãashãngni ɓa vizeniwuko a vusu kaakanaa. ²¹ Nɔ kase viya? Nɔ kaseke N ɛ no bii ni laɓala ya kɔ ni kaseni ɓɔɔ a vusu suru ɓee rooniyu?