¹ Nɔ bɛɛ kaseni nɔ sɔɔ dũng vii ani suruyi, vii ɓɛɛni vɛ̃ɛni wuko zeniting. ² Aruviya shɔngɓe shãngyãa a vusu rɛtɛɓɔɔ shãng ɓa ni shɔngzengyi ɓa shãngyãa ni Laa ko shee. Aruviya shɔngɓɔɔ ɓa goro ɓe tãa wu ɓa aruviya shãngyãa vɔ̃ɔseniyi a vusu suru. ³ Vizeniwuko shɔngɓe shãngyayãazeni shãngshe shɔngzengyi yãa aruɓe daa bongse yii, wu aa yii kaagn, wu sɔɔ tɛ̃ɛrɛ yii zãngzãng. ⁴ Shɔngɓe shãngyãa a vusu rɛtɛ bongse wu yuu shee, vizeniwuko shɔngɓe shãngyãazeni bongse jaakalaa. ⁵ Hãmi naɓing kaseni nɔ walikãng nɔ shãngyãa a vusu rɛtɛyi. Vizeniwuko kɔ wu jãa ɓewa kɔtɔ, N kaseni wuko nɔ shãngyãazeni. Aruviya shɔngɓe shãngyãazeni jãa shɔng goro ɓe shãngyãa a vusu rɛtɛyi kɔtɔ (Naɓa shɔngɓɔɔ N riise kɔtɔ ɓa aruɓe jaakalaa daa kpaa vibongseni). ⁶ Vizeniwuko hami, mazũngyi, N na ɛ nɔ bii ye N shãngyãa a vusu rɛtɛyi, ɓi vi bongni ɓewe nɔng kpaa weya? N daa zenung ɓa, naɓa N shãngshe nɔ ni keseniting ɓa, kɔ zeni, kɔ zeniting, kɔ vimanteni. ⁷ A dɔ̃rɔng gorong ko, alaɓe vii waaleniyi ɓe yii surubi ɓaniɓa ying kaakeyãa--ana jegong ko vũngtaa---yii na de kaayãa ɓa totok ki ɓa, shɔngɓɔɔ daa zee nunkoviya ni yãakani jegong kɔ vũngtãa ng kaaỹaa weya? ⁸ Aruviya alaɓe shɔng jɛ̃ɛ yãakang ye ni zɔng yãa ɓe shɔng de zee ɓa, shɔngɓɔɔ daa zee nunkivi ni la ɛye ɓe shɔng daa gaare bii sii taani viya? ⁹ Nɔ na shãngyãa ɓe shɔng de tãa ɓatata ɓa, shɔng daa too viɓe mɔ shãng nukoviya? Mɔ shãngyãa a vusu zãasi. ¹⁰ Yãashãngniyi ani zɔng zɔng a koodanga, ɓɔɔ ɓa goro bee wu dĩngli ɓaniɓa. ¹¹ Vizeniwuko N na de zee dĩngli yãakoo ɓɔɔ ɓa, N wɔ̃ng ye shɔngzãngti a shɔng shãngni yãa bii, ɓɔɔ shɔng shãngniyãa ng wɔ̃ng shɔngzãngti ang bii. ¹² Jɔ anangko ni nɔni, ɓe taseye ni nɔng gaa vitaseniviyi ɓee Suru, nɔ bɛɛ bongseni shɔng jaakalaa aruɓe nɔ daa watĩng ɓe. ¹³ Arugoko shɔngɓe shãngyãa a vusu rɛtɛ wu gɔ̃ɔrelaa aruɓe daa zenung riiseni. ¹⁴ Aruviya N nang gɔ̃ɔrelaa a vusu rɛtɛ, ɓing suru ng gɔɔrelaa, vizeniwuko N sĩngsĩng ng bong ɓa. ¹⁵ N daa pele nukoviya? N gɔɔrelaa ni ng suru, vizeniwuko N sɔɔ gɔ̃ɔrelaa tɔti ni ng lereni. N sɔɔ tãngsoo ni ng suru, N sɔɔ tãngsoo tɔti ni ng lereni. ¹⁶ Naɓa ananko, nɔ na aa Laa zuuku ye ni suru shɔngɓe yii a gaa yii daa kase "Anangko" nukoviya alaɓe nɔ nang tase dɔɔreni naa de zee viɓe nɔng shãngɓa? ¹⁷ Aruviya nungoko nɔ dɔɔrelaa vɛ̃ɛni, vizeniwuko shɔngɓɔɔ tok ng kpaa bongni ɓa. ¹⁸ N dɔɔre Laaye aruɓe N shãngyãa a vusu rɛtɛyi a jãa nɔ walikãng. ¹⁹ Vizeniwuko a vusu jaakalaa N rɔɔye ng shãng ruu maani ni ng zeni aruɓe N daa mangte shɔngãasi, wu jãa ruu labɔng kopi a vusu rɛtɛ. ²⁰ Mazũngyi, nɔ na wɔ̃ng ɓa wejaa a nɔ lereni ɓa. vipeleniwuko, amɔng pele ruvĩni, nɔ wɔ̃ng jaabɛ̃ɓɛ̃yi. Vizeniwuko a nɔ lereni nɔ wɔ̃ng ana shɔngɓe yii shoo looye. ²¹ Shɔng binke a rudangni, "Ni rɛtɛ shɔngveeyeyi ɓɔɔ polo ɓɔɔ ni yãaɓɔɔ polo ng shãngshe shɔng ɓemiyi yãa. Kɔ ni ɓemi ying tãng ɓa," viɓe Daayere shãng. ²² Arugoko hãmi, rɛtɛyi ɓi vitaseni, ɓa a shɔngɓe yii azɔngye ɓa, vizeniwuko aru shɔngɓe yii de azɔng ɓa. Vizeniwuko shãngniyãazeni ɓi vitaseni, ɓa aru shɔngɓe yii de azɔng ɓa, vizeniwuko aru shɔngɓe yii azɔngye. ²³ Na anangko, na wɔ̃ngye, shɔng jaakalaa walikãng yii ɛye a yãawe yii sɔɔ shãngyãaye walikãng a vusu rɛtɛyi, shɔngɓe yii a gaa ɓɔɔ shɔngɓe yii de azɔng ɓa yii naa ɛye, yii daa shãng ɓa ni nɔ ɓi shɔngyuuzitiyi ɓaya? ²⁴ Vizeniwuko nɔ nang shãngyãazeni walikãng ɓɔɔ shɔngɓe de azɔng ɓa kɔ shɔng gaa na ɛye, shɔng yii wu yuu ni viɓe tãa ɓe walikãng. Shɔng ɓoore wu yoori ni viɓe shɔng shãngɓe walikãng. ²⁵ Shɔng kese wu vivɔ̃ɔseniyi ɓe a wu sĩngsĩng walikãng. Alaɓe na taseye, ng wete ni wu wating wu gbãare Laa. N shãngni ni Laa ani nungoko a nɔ titi. ²⁶ Hãmi ɓi tɔti viya, mazũngyi? Alaɓe nɔ na ɛye a yãawe, shɔngɓɔɔ wu tãngnisoo ani, shɔngɓɔɔ vimanteni, shɔngɓɔɔ kesenivisuru, ɓɔɔ rɛtɛ, kɔ yãa riiseni. Nɔ pele viyi walikãng aruɓe nɔ daa bongse jaakalaa. ²⁷ Shɔngɓɔɔ nang shãngyãa a vusu rɛtɛ, shɔng kpaa shɔng ziti kɔ tati, goro wu pãng wu pãng goro, alaɓiko shɔngɓɔɔ wu soo riise viɓe shɔng shãng ɓe. ²⁸ Vizeniwuko shɔngɓɔɔ na ɓaniɓa goro ɓe daa riise ɓa, yii zĩngzini yii zĩngyãa a vusu jaakalaa. Shɔngɓewaya goro wu sɔɔ shãngyãa ni wu yuu a bĩng ɓɔɔ a Laa bii. ²⁹ Nɔ daa shɔngzeniyi ziti kɔ tati, yii shãngyãa, nɔ sɔɔ daa shɔngãasiyi yii teeshoo ni zeni a viɓe shɔng shãng ɓe. ³⁰ Vizeniwuko kesenirusuru na ani a shɔngɓɔɔ ɓe wɔ̃ng a tipi bii, nɔ daa shɔng shɔɔni wu zĩngyãa. ³¹ Aruviya nɔ shɔngɓeweya yii shãngyãazeni gorogo aru shɔngɓeweya daa mante shɔng walikãng yii sɔɔ kaakagn. ³² Aruviya shɔngzeniyi suruyi yii tãa yii yãa kɔtɔ. ³³ Aruviya Laa ɓa Laa ɓe wũngteni ɓa, vizeniwuko wu ɓi ɓee ɓatata. Ɓemi ko rudangni a vusu Laa shɔng ɓolongɓoyi jaakalaa. ³⁴ Sooyeyi yii tãa mɔng ni shoo a vusu jaakalaayi. Aruviya shɔng de daa yii ɓa yii shãngyãa ɓa. Vipeleniwuko, yii aa yii yuu, anaɓe rudangni shãng ɓe. ³⁵ Viɓɔɔ na ani ɓe yii kaseke yii mante, yii yɛ̃ɛyi jere a yee. Aruviya ɓivi yusɛ̃ sooyeyi yii shãngyãa a vusu jaakalaa. ³⁶ Ruu Laa ɛ a nɔ bii ya? Nɔ ko goro shee ɛ nɔ bii ya? ³⁷ Shɔngɓɔɔ na lereye ni wu ɓi shɔngzeni kɔ shɔngsuru, liikɔtɔ wu teeni viɓe N binke nɔ yii ke a vusu Daayere rudangni. ³⁸ Vizeniwuko shɔngɓeweya na de too viɓemi ɓa, nɔ na toowu zɔng ɓa. ³⁹ Arugoko hãmi, mazũngyi, nɔ bɛɛ shãngniruusuru, nɔ na sɔɔ ɓɛ̃ɛ shɔngɓe kaseke wu shãngyãa a vusu rɛtɛyi ɓa. ⁴⁰ Vizeniwuko nɔ pele viyi walikãng a dɔ̃rɔng ɓe tɔ̃ɔving, ɓɔɔ a vusu dɔɔknni ɓatata.