¹ Hãmi N kase ng tasenɔ nɔ zeeke, mazũngyi, poloruu tɔ̃ɔving ɓe ng shãngshe nↄ, ɓe nɔ teeke asɔɔ shii a yupa, ² ɓɔɔ tɔti ni wu kaa bii kɔ shɔng kpengse nɔ, nɔ na yii ye ni kaaka ruu ɓe N waase nɔ, naɓa nɔ azɔng a vusu kɔvɛ̃ ɓa. ³ Aruviya N aa shɔɔni ana vitɔ̃ɔving anaɓe N tee jɔ a Kirisi bii. Ni Kirisi vɔɔ aru wo ruvĩniyi anaɓe shɔng binke ɓe, ⁴ ni shɔng gbãwu, ni shɔng sɔɔ yuse wu paa atũmpu diki tati anaɓe labiniyi tase ɓe. ⁵ Kirisi tase wu yuu a Kefasi bii, asɔɔ tase wu yuu gãasi kop atu ziti bii; ⁶ alaɓiko sɔɔ tase wu bii a shɔngdũngniyi bii ɓe yii jãa labong maani a la goro. Vɛ̃ɛni a yii titi yii dong nung ni surubini, gãasiyi ɓɔɔ yii roo nurongye. ⁷ Alaɓiko sɔɔ tase wu yuu a Yakubu bii, ɓɔɔ a jaarɔɔkeniyi bii walikãng, ⁸ Atũmpu walikãng, tase wu yuu ang bii, ana jaa ɓe shɔng yeewu diki yeeni de pele ɓa. ⁹ Aruviya miko shɔng tɔkɔlɔng a titi jaarɔɔkeniyi. N de waa ɓa shɔng ɓang ni jaarɔɔkeni ɓa aruviya N kpãare shɔng dũngni Laa yii. ¹⁰ Vizeniwuko ni Laa pãnti N ɓi viɓe wɔ̃ng ɓe lami, ɓɔɔ wu pãnti ɓe ang bii ɓa kɔvɛ̃ ɓa. Vipeleniwuko, N pele vishongni ɓee jãa shɔng gãasiyi walikãng. Ni ɓemi walikãng ɓa miko ɓa, ɓi Laa pãnti ɓe ni mini ɓe. ¹¹ Arugoko kɔ ɓi miko kɔ yiko, wo waayãa ananko nɔ sɔɔ azɔng. ¹² Hãmi shɔng na waayãa Kirisi ye ni yupa a yusa, nukivi nɔ shɔngɓɔɔ ying shãngni yunipa yusa ɓa viya? ¹³ Vizeniwuko na wɔ̃ngye anangko ni yunipa a yusa ɓaniɓa, alaɓiko kɔ Kirisi ni wu yuu de yupa ɓa a yusa ɓa; ¹⁴ ɓɔɔ na wɔ̃ngye anangko ni Kirisi de yupa ɓa, alaɓiko wo waaniyãa wɔ̃ngye kɔvɛ̃, nɔ ani zɔng sɔɔ wɔ̃ngye kɔvɛ̃. ¹⁵ Jɔ ananko, shɔng kpaa wo shɔng yãashãngni yãajĩngni aru Laa, aruviya wo waayãa ni Laa yuse Kirisi paa a yusa. Vizeniwuko de yuse wu paa ɓa, na wɔ̃ngye nungoko ni shɔng yuse vɔɔ paa ɓa. ¹⁶ Aruviya shɔng na de yuse vɔɔ paa ɓa, kɔ Kirisi ni wu yuu de yupa ɓa, ¹⁷ na ananko shɔng de yuse Kirisi paa ɓa, nɔ gnshĩngni wɔ̃ngye kɔvɛ̃ nɔ dong tɔti a nɔ vusu ruvĩniyi. ¹⁸ Alaɓiko shɔngɓe yii sii ronurong ye a vusu Kirisi yii leseye jɔ. ¹⁹ Na a koodangang ɓemi ko wo tegn a Kirisi, a titi shɔngzengyi walikãng wo ko shɔng tãa wo nugn kɔngni. ²⁰ Vizeniwuko hãmi shɔng yuse Kirisi ye a yusa ana jaasang ɓee shɔngɓe yii ronurong. ²¹ Aruviya ɓe taseye vɔɔ ɛ ni shɔngveeye goro bii, ni veeye goro bii ko tɔti yunipa a yusa ɛke. ²² Aruviya anaɓe ni Adamu bii shɔng walikãng yii vɔɔ, jɔ ananko a vusu Kirisi shɔng walikãng ying kpaa surubi. ²³ Vizeniwuko shɔngɓeweya ni wu dɔɔknniː Kirisi, ɓe wu ko jaa shɔɔn, ɓɔɔ shɔngɓe yii ɓi Kirisi ɓe ying wɔ̃ngni surubi a wu diki ɛni. ²⁴ Alaɓiko kodanga ng sɔ̃ɔyãa, alaɓi ng sɔɔre rookpanti a Laa naa ɓe wuko Daa, alaɓe ng lese rudangni ɓɔɔ kaakana ani walikãng ɓɔɔ kaakanaa. ²⁵ Aruviya wuko ng roo kpanti wuwa laɓe ng shĩng wu shɔngpongyi a wu ɓuu dɔɔ. ²⁶ Shɔngpong ɓe tũmpu ɓe shɔng lese ɓe wuko vɔɔ. ²⁷ Aruviya "wuko shĩng viyi walikãng a wu ɓuu dɔɔ" Vizeniwuko alaɓe shãngni “wuko shĩng viyi walikãng," ɓemi tase gbang ni ɓemi de ɓaase ɓa ni shɔngɓe shĩng viyi walikãng a wu ɓuu dɔɔ ɓa. ²⁸ Alaɓe shɔng na shĩng viyiye walikãng a wu ɓuu dɔɔ, alaɓiko Jaa ni wu yuu ng wɔ̃ng a dɔɔ shɔngɓe goro shĩng viyi walikãng a wu ɓuu dɔɔ, aruɓe Laa daa rii viyi walikãng. ²⁹ Kɔ ɓa anangko ɓivi shɔngɓe shɔng yii baptizima aru vɔɔ ying pele viya? Shɔng nang yuse vɔɔ paa, aruvi ying pele yi baptizima viya? ³⁰ Aruvi wo a yuyɔreni kɔ alaɓeweya? ³¹ N vɔɔ dikidiǃ Ɓemi wuko N nungoko gɔɔreni a nɔ yuu, ɓe N kpaa a vusu Kirisi Yeso wo Daayere. ³² Ɓivi N kpaa a yupa viya? a shɔngzeng zeni, N na nungbangye ni vijĩngitiyi a Afisawa, shɔng nang yuse vɔɔ paa ɓa? "Wo shaa ta wo sɔɔ ɓooyi, aruviya ɓuuru wo vɔɔyi." ³³ Shɔng na lake nɔ ɓaː "Wɔ̃ngni ni shɔng nangkayi lese dɔɔknni tɔ̃ɔving." ³⁴ Yupa ta, nɔ wɔ̃ng ni yato ɓolongɓoǃ nɔ na watĩng ɓa ni peleni ruvĩni ɓa. Aruviya nɔ shɔng gãasiyi yii de zee ruu Laa ɓa. N shãng viɓemi aruɓe nɔ daa tãa yusɛ̃ ɓe. ³⁵ Vizeniwuko shɔngɓɔɔ ng shãng ni, ni kaawe vɔɔ ying yupa weya, ɓɔɔ ni zɔng bii ɓewe ying ɛni weya? ³⁶ Nɔ shɔng wureniǃ Viɓe nɔ ruuɓe kee ɓa naɓa vɔɔ kɔtɔ ɓa. ³⁷ Viɓe nɔ ruu ɓe ɓa wu ko bii ɓe ng wɔ̃ng ɓa, vizeniwuko ɓi nung nɛrɛngvi ko shee. Naa rii alikamaye kɔ viɓɔɔ tok. ³⁸ Vizeniwuko Laa ng aa wu bii anaɓe kase ɓe, ɓɔɔ a lɔɔkɔ ɓeweya a wu zɔng bii. ³⁹ Biyi walikãng ɓa zɔng goro ɓa, vipelewuko, gigiri bii ani goro aru shɔngzengyi, ɓɔɔ tɔti tok aru vivayi, ɓɔɔ bii ɓɔɔyi aru jenungyi, ɓɔɔ tɔti aru jezũng. ⁴⁰ Bii ɓɔɔ ani ɓee koolapayi ɓɔɔ ɓee koodangayi. bongni bii ɓee koolapa wu zɔng tok ɓɔɔ bongni ɓee koodanga ɓi ɓɔɔ tok. ⁴¹ Bongni ɓɔɔ ani tok ɓe la, bongni ɓɔɔ ɓe shele, bongni ɓɔɔ ɓee sɛngyi. Aruviya sɛ̃ng goro ɓɔɔ totok a yuu sɛng ɓɔɔ. ⁴² Jɔ anangko yunipa vɔɔ a yusa. Viɓe shɔng ruuɓe wuko leseke, ɓɔɔ viɓe shɔng yusepa ɓe daa zenung leseni ɓa. ⁴³ Shɔng ruu ɓa ni bɔrɔ ɓa; shɔng sɔɔ yusepa a vusu bongni. Shɔng ruu ɓa ni kaakabi ɓa; shɔng yusepa ni kaakabi. ⁴⁴ Shɔng ruu ni bii, shɔng yusepa ni bii suru. gigiribi naa ani, bii suru jɔ ani. ⁴⁵ Jɔ anangko anaɓe shɔng binke ɓe, "Shɔng shɔɔni Adamu rii shɔng surubi." Adamu ɓee tũmpu sɔɔ rii suru ɓee ani-surubi. ⁴⁶ Vizeniwuko ɓa bii suru kɔ ɛ shɔɔni ɓa vizeniwuko ɓi gigiribi, alaɓiko ɓee suru dũng tũmpu ⁴⁷ Veeye ɓee shɔɔni wu ɓi ɓee koodanga, shɔng maawu ni tɔ̃ɔpo. Veeye ɓee ziti wu ɓee koolapa. ⁴⁸ Anaɓe shɔngɓe shɔng maawu a vusu tɔ̃ɔpo ɓe, jɔ anangko shɔngɓe shɔng maayi ni tɔ̃ɔpo, ɓɔɔ anaɓe shɔng veeye ɓe koolapa wu ɓe, jɔ anangko shɔngɓe yii ɓi ɓee koolapa. ⁴⁹ Anaɓe shɔng yee wu nungsusuru veeye ɓee tɔ̃ɔpo, wɔng sɔng kpaa nungsusuru ɓee veeye ɓee koolapa. ⁵⁰ Hãmi ɓemi wuko viɓe N shãng, mazũngyi, ni gigiribi ɓɔɔ daa kpaa roonikpanti ɓee Laa ɓa. Kɔ tɔti viɓe lese kɔtɔ wu kpaa viɓe lese ɓa. ⁵¹ Zepĩnǃ N gãale nɔ vivɔ̃seniyeː Wong ronurɔng ɓa walikãng ɓa, vizeniwuko shɔng kɔse wu bii kɔtɔ walikãng. ⁵² Shɔng kɔse wo bii ɓee la pota, a titi kuuni nung ya goro, alaɓe shɔng naa jɛ̃ɛ yãakãng ɓe tũmpuye. Aruviya yãakãng ng kaayãa, ɓɔɔ vɔɔ ying yupa ɓa ni leseni ɓa, ɓɔɔ shɔng kɔseyi kɔtɔ. ⁵³ Aruviya bii ɓemi ɓe lese kɔti ng ɓoose ɓe daa lese ɓa ɓe, ɓɔɔ gigiribi ɓemi liikɔtɔ shɔng ɓoose wu ɓe daa vɔɔ ɓa ɓe. ⁵⁴ Vizeniwuko alaɓe bii leseni ɓemi na tuuse bii ɓe lese ɓaye, ɓɔɔ alaɓe gigiribi na ɓoose ɓe vɔɔ ɓa ɓemi ye, alaɓiko yãashãngni ɓemi ng ɛ, "Shɔng ng vɔɔ ye a vusu viwaaniting." ⁵⁵ Vɔɔ, mɔ mɔng wanitĩng weya? Vɔɔ, mɔ vitaani weya?" ⁵⁶ Taani ɓee vɔɔ wuko ruvĩni, ɓɔɔ kaakanaa ɓee ruvĩni wuko rudangni. ⁵⁷ Vizeniwuko wo dɔɔre Laa ye, ɓe aa wo wanitĩng ni wo Daayere Yesu Kirisi bii. ⁵⁸ Arugoko, mazũngyi, nɔ shiigbayi nɔ na gise ɓa. Dikidi nɔ bong a vusu shoni ɓee Laa, aruviya nɔ zeeye ni nɔ vipeleni shoni a vusu Daayere ɓa kɔvɛ̃ ɓa?