¹ Omwo utumbama na kulya na muka kuyula, monethetha mwachili ebi bili ku mesho obe, ² nakwaka moko ku milibu yobe oshe u munu ou washaka kulya bya kulya byabingi. ³ Kethi ukathsile byuma byendi bya bulemu, mwafwa chinapu kulya cha makuli. ⁵ Kethi upange na thzili mukwana bufuko; pwa na maana utanekey thimbu ya kwechela. ⁴ Yobe ukechela mesho obe kumunikilaho ndi? Chikapwa chakuya, mwafwa mubuthunga bene chikathzala mapi ngwe ngonga nakumbululukila mwilu. ⁶ Kethi ulye bya kulya byou ali nalisho lya bubi— cho kethi ukathsile byuma byendi bya bulemu, ⁷ mwafwa apwa chifwa chimo cha munu ou akatanda ndando ya bya kulya. "Lya na kanwa!" ana kwendeka kuli yobe, oloni mbunge yendi kuyethi nobe. ⁸ Ukashanja bije bya bindondo unalile cho ukabihitha kukandelela chobe. ⁹ Kethi wendeke byuma bya kuthziba chilema, mwafwa akalimbulula maana a majwi obe. ¹⁰ Kethi ukashwenethe limanya lya nginga ya laja nameme kuthebuka theteko ya nginga ha mahya a bana babithiwa, ¹¹ mwafwa mwobole wabo wakutakama cho akabatula mulonga wabo hali yobe. ¹² Aka mbunge yobe ku bilongetha na matwi obe ku majwi a mangana. ¹³ Kethi ukakwatelele bilongetha byakutunda kuli mwana, mwafwa oshe ukamupupa na chibathzi, kakathsi. ¹⁴ Yobe wapande kumupupa na chibathzi nakulwila mwonyo wendi kutunda ku Shiyole. ¹⁵ Obe munange, oshe mbunge yobe yili na maana, cho mbunge yange lalo abwahelela; ¹⁶ bithso byange bikakinina omwo tunwa twobe tukendeka bije bya kuthungama. ¹⁷ Kethi wechele mbunge yobe yipwe na chipululu chabaka bubi, oloni twalelela mulyoba lya Yehoba matangwa oshe. ¹⁸ Buthunga bene kuli kuya kulutwe cho kutalelela chobe kubakachibatulako. ¹⁹ Tolilila— yobe! — munange, cho upwe na maana akutengulwila mbunge yobe mungila. ²⁰ Kethi ulikwate buthendo nabaje bakanu binyu bya bingi, nameme na baka kulya thitu na nuna, ²¹ mwafwa baka kupena ba kanuna bakaija na kuyanda na kunenguka bakabathzika binyathzi nyathzi bya binanga. ²² Tolilila kuli isho ou wakukitile cho kethi ukalimbulule nyoko omwo akulubala. ²³ Landa buthunga, oloni kethi ukabulandulule; landa maana, bilongetha, na kuthzibithitha. ²⁴ Ishe ya munu wakuthungama akakininina manene, cho ou akakita mwana wa maana akabwahelela muli lyakeye. ²⁵ Echela isho na nyoko babwahelel na kwechela uje akukitile akininine. ²⁶ Obe munange, njane mbunge yobe cho echela mesho obe amonethethe bingila byange. ²⁷ Mwafwa chikoi napu mbulu ya kuloba na munakathzi wa bibi napu kalithima kakandondo. ²⁸ Akabandamena ngwe mwithzi na kutumitha ba kakukwitha hakati ka banu. ²⁹ Iya ali nalubinda? Iya ali na buthima? Iya ali nakulinyenga? Iya ali nakuyayabala? Iya ali nabimbandu chakwilika mulonga? Iya ali na mesho akubenga? ³⁰ Baje bakeshwala hamulonga wa binyu, baje baketheka binyu bya kukumbathana. ³¹ Kethi ukatale binyu thimbu bichibenga, omwo bibyathzima mu nganja na kuthikumuka bwino. ³² Kumamanethelo bikashuma ngwe linyoka na bushungu ngwe limbwambwa. ³³ Mesho obe akamona byuma bya bungethzi cho mbunge yobe ikendeka byuma bya bithinganyeka. ³⁴ Ukapwa ngwe umo uje akalala helu lya tulunga ndonga nameme kukotha hathi helu lya mbango yailaja. ³⁵ "Banjipupa," ukendeka ngwobe, "oloni kubanjibabalethele. Banjipupile, oloni kunja chithzibile. Thimbu muka oyo njikenduka? Njithetela byakunwa bikwabo.