¹ Cho omo Sanimbolati wathzibile ngwabo bali nakutunga mbango, cha mwenyekele mukati muli ikeye, watenukile nakulubala manene, nakuthinametha ba Yundeya. ² Mu mesho aba ndolome bendi na maswalale ba ku Samaliya, wendekele ngwendi, "Bika balinga aba ba Yundeya? Baka ilwitha nganda bakebo babenyandi? Bakana chikombelondi? Bakamanetha bipangi halitangwa limondi? Bakashitula mamanya mumena akuloba anima yaku enyekandi? ³ Tombiya waku Amonite wakele nendi, cho wendekele ngwendi, "Umona ngwe mbanje akaya elu ali bije bali nakutunga, akabatula mbango yabo ya mamanya." ⁴ Thziba, Njambi yetu, muje banatuliula kayengu kabo a mitwe yabo babenya na kubana mangana bakapulule mu lifuti lya bundungo. ⁵ Kethi mufwike amilonga yabo cho echeleni bubi bwabo kethi babuthzimangane ku mesho abo, omo banashangumuna bukalu bwa bakakutunga. ⁶ Cho twatungile mbango na bimbango byoshe babi nungakanene nakwetetha mukujunduka kwayo, kwamubulaha omo banu bakele na chashu cha kupanga. ⁷ Oloni omo Sanimbalati, Tombiya baka Alambiia,baka Amonite, cho baku Ashindonite bathzibile ngwabo bipangi bya kibwabetha mbango yaku Yelusalema ili nakuya alutwe, na kuthziba ngwabo byela bya a mbango bya kubujuka bakele nakushoka, na matoto akama enyele muli bakebo. ⁸ Cho boshe balithzibathanene, na kwija nakulwitha Yelusalema nakunena kwonowa kulithzibathana muli ikeye. ⁹ Oloni twalombele ku;i Njambi yetu nakutwangwila kanyungi wakutunyunga mathsiki na mutanya mwafwa wakutujujwitha chabo. ¹⁰ Cho banu baku Yunda bendekele ngwabo," Nthzili yabaje bakambata byuma inonowa. Kuli lika bishwashwa bya bingi, cho kutwatha kutungulula eyi mbongi. ¹¹ Bitothzi betu bendekele ngwabo, kubatha kuthzubuka nameme kumona ku mbango mutwija akati kabo naku bathsiya, nakwimika chipangi. ¹² Athimbu ije ba Yundeya baje bayoyele kuyehi na bakebo bethzile kutunda ku byela byoshe na kwendeka kuli yetu bithimbu bya kupwa likumi, nakutu nyanyametha amana abakele kupanga ali yetu. ¹³ Cho njakele banu kwithi ku mitambela ya mbango achela cha kujela. Cho njakele achithemi na chithemi na mikwale yabo, makunga, na mata alungutha. ¹⁴ Cho njakengele nakukatuka, cho njendekele kuli bakulunu, nakuli bantwamena, na kuli boshe ngwange, "Kethi muthzibe lyoba lyabo embwe. Thinganyekeni Shukulu, uje wahyana manene na kuthzibitha lyoba. Ohyela binanga byobe, bana bobe babanalume na babanakathzi, banakathzi beni, na membo eni." ¹⁵ Chethzile nakupwa omo bitothzi betu bathzibile ngwabo bithinganyeka byabo tunabithzubuka, na Njambi nathzimangana bithinganyeka byabo, tubaboshe twelukile ku mbango ya njubo, munu na munu na bipangi byendi. ¹⁶ Cho kutunda athimbu ije mbathzubwila ya bingamba bange bapangele lika akutungulula mbango, cho mbathzubwila yabo bakwatele makunga, tuntana, mata alungutha na kuthzala buthzalo bwanthzita, athimbu batwamena bemanene kunima ya banu baku Yunda. ¹⁷ na baje bakele nakutunga mbango. Baje bambatele byuma bambatele biteli byabo chalingithile munu woshe wapangele na liboko lyendi limo, na liboko likwabo wa kwateleko chitwa chendi. ¹⁸ Mukakutunga woshe wathzalele mukwale wendi mumbunda yendi, cho muje mukemo mubapangele. Uje wathikile tolombita wakele kuyehi nange. ¹⁹ Cho njendekele kuli bakulunu na kuli bakuhyana na kuli banu boshe ngwange, "Bipangi byahana manene na kutuma manene cho twalishondoloka a mbango, alako umo namukwabo. ²⁰ Munapande kushatukila ku chela kuje muthziba kwohya tolombita nakutumbama kuje. Njambi yetu atwohyela." ²¹ Cho tuli nakulinga chipangi. Mbathzubwila yabo bakwatele makunga kutunda kukutuuka kwa litanga ndo kwija kwa kutuuka kwa ngongonothi. ²² Cho njendekele lalo kuli banu thimbu ije ngwange, "Echeleni munu woshe na bingamba bendi bakaleko matsiki na kupwa na bipangi kumutanya." ²³ Cho nambe yange, nameme bandolome bange, nameme bingamba bange, nameme tunyungi babanalume baje banjikabangeyeye, naumo wai muli yetu walengulwile byakuthzala byetu, munu woshe muli yetu wambatele chitwa chendi, nameme waile mukutekula mema.