¹ Cho Eliyashimbu mukulunu wakama waba tupilisitu wakatukile na bandolome bendi ba tupilisitu, cho batungile chikolo cha bimanga. Cho bachithzilikile kwakako mapito mu chela. Cho bachithzilikile nakweta ngwe ku Kaposhi ka chiita nakweta ngwe kaposhi ka Hananeli. ² Batele kuli ikeye banalume baku Yeliko bapangele, cho watele kuli bakebo mwana wa munalume Zakali wa Imili wapangele. ³ Cho bana babanalume ba Hasenaha batungile chikolo cha biti. Bachipangelele mikato, na kwakako mapito, na tubelenge twacho, na tupatetho twacho. ⁴ Melemothi wabwahethele mutambela unatako. Wapwile mwana wa munalume wa Mbelekiya mwana wa munalume wa Uliya mwana wa munalume wa Hakozi. Wateleko kuli bakebo wakele Meshulamu wabwahethele nendi. Ikeye mwana wa munalume wa Mbelekiya mwana wa munalume wa Meshezembele. Wateleko kuli bakebo Zandoki wabwahethele nendi. Ikeye mwana wa munalume wa Mbana. ⁵ Wateleko kuli bakebo Tekoitesi wa bwahethele nendi, oloni bakulunu ba byanene kulinga bipangu baba kambeyeye kuli bakubapangetha babo. ⁶ Joiyanda mwana wa munalume wa Pasiya na Meshulamu mwana wa munalume wa Mbesondeya wabwahethele chikolo chalaja. Ba chipangethele mikata, nakwakako mapito, natu belenge twacho, na tupatetho twacho. ⁷ Bateleko kuli bakebo bakele banalume bakutunda ku Ngimiyoni na Mizipa—Melatiya waku Ngimbiyoni na Jondani waku Melenothiti— wa waswanene ngubelunu wa mbongi ya muthinya ya ndonga. ⁸ Wateleko kuli ikeye Uziele mwana wa munalume wa Hahaiya, umo mutongwe wa ngolinde, wabwahethele, cho wateleko kuli ikeye wapwile Hananiya mukakupanga bya kunika lwengo. Cho batungulwile Yelusalema kweta ngwe kumbango yakama. ⁹ Wateleko kuli bakebo Lafaiya mwana wa munalume wa Huli wabwahethele nendi. Wapwile muka bipangi kutubakana mbathzibwila imo yamu Yelusalema. ¹⁰ Wateleko kuli bakebo Jendaiya mwana wa munalume wa Halimafi wabwahethele binatakana ku njubo yendi. Wateleko kuli ikeye Hatitushi mwana wa munalume wa Hashambaneiya wabwahethele nendi. ¹¹ Malikiya mwana wa munalume wa Halimu na Hasishumbi mwana wa munalume wa Pahathi- Moaambu wabwahethele mutambela ukwabo ku mukulo wa kaposhi ka Falinasisi. ¹² Wateleko kuli bakebo Shalumu mwana wa munalume wa Haloheshi, mukabipangi kutubakana mbathzubwila imo yamu Yelusalema, wabwahethele, amolika naba ndokathzi bendi. ¹³ Hanuni na bakale mu Zaniwa babwahethele chikolo cha kuchana. Cho bachitungulwile na kwakako mapito acho, tubelenge twacho, na tupatetho twacho. Babwahethele likulakathzi limo lya makyubiki na kweta kuchikolo cha Ndangi. ¹⁴ Malikiya mwana wa munalume wa Lekambu, mukabipangi akati kachitingitingi chaku Mbethi Hakelemu, wabwahethele chikolo chaku Ndangi. Wachitungile nakwakako mapito acho, tubelenge twacho na tupateho twacho. ¹⁵ Shalumu mwana wa munalume wa Koli-Hoze, muka bipangi akati kachitingitingi cha Mizipa, watungulwile mbango ya lishali lya Siloamu ku ngalanja ya mwene, kweta kuyehi ngwe kuli chakushulukilao kutunda ku nganda ya Ndabiti. ¹⁶ Nehemiya mwana wa munalume wa Azimbuki, wa bipangi akati ka mbathzubwila ya chitingitingi cha Mbethi Zuli, wabwahethele chela cha hathinya kutunda ku mbumba a Ndabiti, nakuya ku lishali lya kupanga- banu, na kunjubo ya banu bakuhyana. ¹⁷ Munima yendi ba Lebi bawahethele, kulikumbathana hamo na Lehamu mwana wa munalume wa Mbani cho watele kuli ikeye, Hashambiya, muka bipangi akati kambathzubwila ya chitingitingi cha Keila, cha mu chitingitingi chendi. ¹⁸ Munima yendi bandolome bendi babwahethele kukumbathanako Mbinui mwana wa munalume wa Henandandi, muka bipangi akati kambathzubwila ya chitingitingi cha Keila. ¹⁹ Wateleko kuli ikeye, Ezele mwana wa munalume wa Jeshewa, mukabipangi akati ka Mizipa, wabwahethele mutambela ukwabo uje wakengethele kwakulunduka kwakonekela mbango ya njubo yakutulikilamo bya nthzita. ²⁰ Munima yendi Mbaluki mwana wa munalume wa Zambai wabwahethele mutambela ukwabo kutunda kwakonekela mbango ya chikolo cha njubo ya mukulunu wakama kapilisitu Eliyashimbu. ²¹ Munima yendi Melemothi mwana wa munalume wa Hakozi wabwahethele mutambela ukwabo, kutunda ku chikolo chaku njubo ya Eliyashimbu kweta na kushongo ya njubo ya Eliyashimbu. ²² Wateleko kuli ikeye tupilisitu, banalume kutunda kuchela chathzenguluka Yelusalema, babwahethele. ²³ Munima yabo Mbenjamini na Hasishumba babwahethele chalikengetha na njubo yabo babenya. Munima yabo Azaliya mwana wa munalume wa Maseiya mwana wa munalume wa Ananiya wa bwahethele inatakana kunjubo yendi babenya,. ²⁴ Munima yendi Mbinui mwana wa munalume wa Henandandi wabwahethele mutambela ukwabo, kutunda ku njubo ya Azaliya na kweta kwakonekela mbango. ²⁵ Palali mwana wa munalume wa Uzai wa bwahethele kuputukako ha konekela mbango na kaposhi kaje kashwenene helu kutunda kunjubo ya helu ya mwene ku thzango yamilonga yakanyungi. Munima yendi Pendaiya mwana wa munalume wa Paloshi wabwahethele nendi. ²⁶ Cho bingamba ba tembele bayoyelele mu Ofeli ba bwahethele ku chela chali kengetha na chikolo cha kumema chaku kunto na kukaposhi katunguwile kuje. ²⁷ Munima yendi ba Tekoite babwahethele mutambela ukwabo uje wakele wakulikengetha na kaposhi kakama manene katunguwile kweta kuyehi na mbango yaku Ofeli. ²⁸ Cho batupilisitu babwahethele chikolo cha elu cha bimulu, chimo chalikengetha na njubo yendi babenya. ²⁹ Munima yabo Zandoki mwana wa munalume wa Imale wabahethele mutambela walikengetha na njubo yendi babenya, Cho munima yendi Shemaiya mwana wa munalume wa Shekaniya, kanyungi kachikolo chaku kunto, wabwahethele nendi. ³⁰ Munima yendi Hananiya mwana wa munalume wa Shelemiya, na Hanuni mwana wamuchitanu naumo wa Zalafi, babwahethele mutambela ukwabo. Munima yabo Meshulamu mwana wa munalume wa Mbelekiya wabwahethele yakengethele kukanjubo kendi babenya kayoyelelemo. ³¹ Munima yendi Malikija, umo wa butongwe mu ngolinde, wabwahethele kweta ku njubo ya tembele ya bingamba na kuli bakakulandetha baje balitalekethele na chikolo cha njubo ya kuli wanena na njubo ya helu yakuyoyelamo ya ha mbango. ³² Cho mukabutongwe bwa ngolinde na bakakulandetha babwahethele mukati ka njubo ya helu ya ku mbango na chikolo cha bimbango.