¹ Mungonde ya Nisani mu mwaka wa mumakumi abali abu mwene bwa Alitashashesi, wangwile binyu, cho njambatele binyu na kubyana kuli mwene. Ololo kukwapwile wakuthzeya ku mesho endi. ² Oloni mwene wendele kuli yange ngwendi, "Bikajo changa chobe chathzeyela? Omo kuwethi na kusholoka kubinja. Echi chinapande kupwa kuthzeya cha mbunge." Cho wathzibile lyoba manene. ³ Njekendekele kuli mwene ngwange, "Mwene ayoye myaka yoshe! Bikajo changa chonowa kupwa cha kuthzeya? Nganda, mwela wa mbumba ya tate, walala mu ngundu, na bikolo banabibihitha na tuhya." ⁴ Cho mwene wendekele kuli kuli yange ngwendi, "Bikajo ushaka yange kulinga? Cho njalombele kuli Njambi wa mwilu. ⁵ Njakumbulwile kuli mwene ngwange, "Umona chimoneka bubwa kuli mwene, cho umona ngamba yobe nalingi mwamubwa mu mesho obe, cho unapande kunjituma ku Yunda, ku nganda ya mbumba yatate linga njakaitungulule." ⁶ Cho mwene wakumbulwile kuli yange (na mwene wa munakathzi muyehi nendi), "nathimbu muka ukatenguluka?"Cho mwene wabwahelele akunjituma omo njamwanene akumwinikila thimbu. ⁷ Cho njendekele kuli mwene ngwange, " Umona chinabwahetha mwene, echeleni mikanda bayane kuli yange yaba ngubelunu ba mubimbongi muthambwa lya ndonga cho mangana banjitabethe kwita mukati ka membo abo mubungethzi bwange bwa ku Yunda. ⁸ Munapande kukala lalo mukanda wa Asafi kanyungi ka mushondo wa mwene, mangana anjane mabaya akupanga mukata wa bikolo bya kulimbo lya lyata na tembele, na kumbango ya nganda, cho nawa anjubo injika yoyela. Сho mwafwa bubwa liboko lya Njambi ali yange, mwene watambwile kulomba change. ⁹ Njethzile kuli bangubelunu bambongi mu thambwa lya ndonga nakubana mikanda ya mwene. Cho mwene wanjilumine na bakakukambeya mashwalale na nakwenda abimulu. ¹⁰ Omo Sanimbalata waku Holonite na Tumbiya waku mimonite ngamba wathzibile ebi, babihililile manene akuthziba ngwabo munu umo uje naija nakushaka kukwatha banu bamu Isalela. ¹¹ Cho njethzile ku Yelusalema cho njakele kuje matangwa atatu. ¹² Njakatukile matsiki, yange na banu bamo babandondo kunjalekethele nameme umo wai bika Njambi yange wakele mumbunge yange kulingila Yelusalema. Kunjakeleko nakathitu nameme umo wai, kubanga uje njakele nakwendelao. ¹³ Njatuukile matsiki kuchikolo chaku chana, nakuya kulithima lya bambanje na kuchikolo cha mathzilo, na kukengetha ku mbango ya Yelusalema, ije yalundumukile nakuthala bwathi, na bikolo bya mabaya babi bihithile na tuhya. ¹⁴ Cho njetile kumukulo wa chikulo na kulishali lya mwene. Cho chela chapwile chachindondo manene kuli kathitu unjakele nakwendao kwitamo. ¹⁵ Cho njakandukile matsiki ajebene na kukengetha a mbango, cho njelukilemo na kukakobelela ku chikolo chaku chana, na kwiluka njelukilemo. ¹⁶ Batwamena kubathzubukile kunjaile nameme bika njalingil, cho kunjabalekethele ba Yundeya namame tupilisitu, nameme bakulunu, nameme batwamena, nameme boshe baje balingile bipangi. ¹⁷ Cho njendekele kuli bakebo ngwange, "Mwamono bukalu butulimo, bati Yelusalema yalala mungundu na bikolo banabihitha kutuhya. Ijeni, mangana tutungulule mbango ya Yelusalema, cho kutwatha lalo kukala nathiwa." ¹⁸ Njabalekethele ngwange liboko lya libwa Njambi yange lya kele ali yange cho lalo lijwi lya mwene lije lyendekele kuli yange. Cho bendekele ngwabo, "Echeleni tukatuke tutunge." Cho bakolethele maboko abo abipangi bya bibwa. ¹⁹ Oloni Sanimbalata waku Holonite, na Tombiya waku Ammonite ngamba, na Ngeshemu waku Alembya wathzibile eli, batuthembulwile na kutumwetha kaliu, nakwendeka ngwabo, "Bika muli nakulinga? Muli nakumulengulukila mwene ndi? ²⁰ Cho babakumbulwile ngwabo, "Njambi wa mwilu akatwana bukwatho. Yetu twapwa tubingamba bendi cho tukemana nakutunga. Oloni kumwethimo na mbathzubwila embwe, kumwethi nanthzili, cho kukwethi muthzimbu wakwendeka kulinyenga mu Yelusalema."