¹ Cho bana babanakathzi babo bakatukile nakulila manene ali bakwabo ba Yundeya. ² Omo kwakele bamo bendekele ngwabo, "Nabana betu babanalume na babanakathzi tubabangi. Echeleni tunone nona ije itulya cho mangana tuyoye. ³ Cho kwakele bamo lalo baje bendekele ngwabo, "Tuli nakwana mahya etu, mahya a binyu etu, na manjubo etu kupwa pateko tutambuleko nona athimbu ya njala. ⁴ Bamo lalo bendekele ngwabo, "Tuna kolota bimbongo byakufweta lithimu lya mwene ha mahya etu na mahya etu a binyu. ⁵ Athimbu mishuni yetu na maninga alifwa ngwe abandolome betu, na bana betu alifwa ngwe a bana babo. Banatuthindiya kulandtha bana betu babanalume na babanakathzi kupwa bindungo. Bana betu bamo babanakathzi banapu laja bindungo. Oloni kuchethi mu bithzili byetu mwafwa banu bamo batambula mahya etu na mahya etu a binyu. ⁶ Nja lubalele omo njathzibile kulila chabo na majwi awa. ⁷ Cho njathinganyekele ali echi, na bushunga bwa kwihwithitha kuli bakulunu na bakabipangi cho njendekele ngwange, "Muli na kubanungilako thotho kutunda kuli woshe ndolome yendi." Njakwatele chikungulukilo chakama manene nabakebo ⁸ nakwendeka kuli bakebo ngwange, "Ngwe muli yetu tulinacho, kwetheketha kubithinganyeka byetu, bya kubapatula bandolome betu ba Yundeya kubatunditha mu bundungo buje babalandethele mu mafuti, oloni muli nakulandetha bandolome beni mangana yetu tubapatule!" Bolokele kulu na kwonowa lijwi lya kwendeka. ⁹ Cho njendekele lalo ngwange,"Chimuli nakulinga, kuchethi chachibwa embwe. Kumani mwonowa kwenda na lyoba lya kutewa Njambi yetu atu kikiye kubukalu buje buli kubitothzi betu mu mafuti." ¹⁰ Yange na bandolome bange na bingamba baba kolotethele bimbongo na binona. Oloni tunapande kulikela kwakelao thotho ali ebi bikala. ¹¹ Ilwitheni kuli bakebo alitangwa eli bene mahya abo, mahya abo abinyu, mahya abo a olyu, na ma njubo abo na kathotho ka bimbongo, binona, binyu bya bijololo, na mathzi aje mwatambwile kutunda kuli bakebo." ¹² Cho bendekele ngwabo,"Twilwitha bije twambatele kutunda kuli bakebo cho kutushaka nameme kamo kutunda kuli bakebo embwe.Tukalinga ngwe omu munendeka." Cho njathanene batupilisitu nakubalingitha kulithinga ngwe muje balishikile. ¹³ Cho njakukumwine likupa lya buthzalo bwange na kwendeka ngwange, "Njambi akukumwine mu manjubo na kubufuko bwa banu boshe baje bakonowa kunyunga kushika chendi. Cho akukumwinemo muthale mwamupolongwa." Chikungulwilo choshe chendekele ngwabo, "Amen," cho bashanagathzekele Yehoba na banu balingile ngwe muje bashikile. ¹⁴ Cho kutunda athimbu ije banjangwile kupwa ngubelunu wabo mu lifuti lya ba Yunda, kutunda mu mwaka wa mumakumi abali na myaka itanu naiwana ndo mu mwaka wa mumakumi atatu na myaka ibali ya mwene Atayasesi, mumwaka wa mulikumi na myaka ibali, nameme yange nameme bandolome bange balile byakulya babwahethele bya ngubelunu. ¹⁵ Oloni ngubelunu wakeleo laja uje wakele namesho ange wajalele chiteli chakulema ali banu, na kwambata makumi awana amangwenje ama silba abya kulya byabo alitangwa na binyu. Nambe bingamba babo bapwile bashukulu ali banu. Oloni kunjalingilemo mulonga wa lyoba lya Njambi. ¹⁶ Cho njatwalele nakupanga a mbango, cho kutwalandele libu, na bingamba bange boshe balikungulwile kuje kubipangi. ¹⁷ Ametha yange akele ba Yundeya na baka bipangi bakupwa chita chimo na makumi atanu, muli baje kwethzile kuli yetu mafuti aje anathzenguluka yetu. ¹⁸ Bije bibabwahethele alitangwa byapwile ngombe, bimanga bakwangula, natuthzila lalo, alikumi lya matangwa oshe binyu bya bingi bya kulithzethzathzetha babinenele, oloni ali echi kunjashakele kulya cha ngunelunu mwafwa bipangi byalemene ali aba banu. ¹⁹ Njakeni ku mbunge, Njambi yange, mwamubwa, mwafwa wa byoshe bije njabalingile aba banu.