¹ Ngechi likungululeni amo lika na ku lyanganya bya kulwa nthzita, yobe muna mathwalale wa munakathzi! Bana tu thzengeletha! Chojo bana mwashula ntwama wa Isalela a mbange yendi na chibanthzi. ² Oloni yobe, Mbetelehema Efalata, nameme bene wapwa u wa mundondo a kati ka miyati ya Yunda, olojo muli yobe mukemwoni mu katunda ou ya kaija kuli yange na kwandama Isalela, owo chikota chendi cha ku thang'uli, cha mwilile. ³ Chojo Njambi a chika bethelako tai, kweta bene na a thimbu ije uje munakathzi yali mu mishongo ya mwana a a kita mwana, cho na baje bandolome bendi ba keluke ku banu ba Isalela. ⁴ Cho a kemana na ku nyunga bwino butanga bwendi mu binthzili bya Yehoba, mu bukama bwa lithzina lya Yehoba Njambi yendi. Chojo ba ka yoyoni mu kwoloka, mwafwa a kapwa wa kama manene kwoshe kweta na ku mamanethelelo a kaye. ⁵ Ngechi bene a ka twama kwoloka. Omu ba ka Asiliya ba ka ija mu lifuti lyetu, cho nomu ba ka ija na ku pujula bibumbe bya bimpaka byetu, cho tuka lanya tunyungi ba tanu na babli na bantwama ba tanu na batatu ali baje banalume mangana ba ba lwithe. ⁶ Cho baka nyunga lifuti lya Asilya na mukwale, na nganda ya Nimulondi mu bikolo byayo. Chojo chilibene a ka twamena kuli ba Asiliya, omwo mu ba kaija mu lifuti lyetu, omu mu ba kenda mu binginga byetu. ⁷ Ngechi baje ba kulitulaho ali Yakobo ba ka kala mukati ka mayongomena a banu, ngwoni lije lime lya kutunda kuli Yehoba, ngwe mamathe a mbundumbundu a mwila, chojo bakebo kubethi ku bandamena munu, cholalo ku bethi ku bandamena bana ba banu. ⁸ Baje ba kulitulaho ba Yakobo ba kakala a kati ka mafuti a mengi, a kati ka mayongomena a banu, ngwoni uje ndumba yali a kati ka tuthitu ba mushwata, ngwe ka matanga a tununu. Cho omwoni mwa ita mukati kabo, cho a ba lyatangela na kuba thangothzola mu bimbathzubwila, chojo ku ku ka kala nameme umo ya ka ba yobola. ⁹ Olojo liboko lyobe ba ka lithzethzula a kamwa ya bitothzi bobe, chojo likaba nyongetha. ¹⁰ "Chojo chika sholoka mu litangwa lije" oku kukekwo kwendeka kwa Yehoba —" omwoni njika nyongetha tubalo beni a kati keni na ku nyongetha makalu eni. ¹¹ Cho njika nyongetha na binganda bya mu lifuti lyeni na ku thiula bimpaka byeni byoshe. ¹² Chojo njika nyongetha obwo bulothzi bubuli mu liboko lyobe, cho ku uka kala lalo na baka ku taha bingombo. ¹³ Cho njikanyongetha tumonya tweni twa ku shonga na bimanda byeni bya mamanya a kati keni. Ngechi ku muka lemetha lalo byuma bije bimuna lishongela na ku limungila yeni babenya na maboko eni embwe. ¹⁴ Cho njika tukula bithini bya Ashela a kati keni, na ku thiula binganda byeni. ¹⁵ Ngechi mu matoto na kunyengwa nji ka nena kashitiko ku mafuti oshe aje a na byana ku njononokela yange.