¹ Olojo chikasholoka mu matangwa a ku mamanethelelo ngechi lilundu lya njubo ya Yehoba ba kali pwitha lya kama manene kutubakana akwabo malundu oshe. Chojo bakali jundula ngechi lika tubakana minkinda yoshe, cho na banu babengi baka thindumukila kuli likelyo. ² Ngechi mafuti amengi akaya nakwendeka ngwabo, "Ijeni, tuyeni tu kanduke a lilundu lya Yehoba, ku njubo ya Njambi wa Yakomba. Cho a katu longetha bilinga byendi, chojo netu tukendoni mu bingila byendi." Mwafwa bilongetha bya Njambi bika tunda ku Ziyoni, cho lalo na lijwi lya Yehoba lika tunda ku Yelusalema. ³ Cho aka yongola na kuyula milonga a kati ka mayongomena a banu na ku manetha bing'anda mukati ka mafuti a mengi aje ali a lyala. Chojo baka fula mikwale yabo kupwoni matemo na makunga abo kupwoni bimoko bya ku shaletha miti. Cho lifuti kuli kalu nthzita na lifuti likwabo, chojo kubaka lilongetha kulwa nthzita lalo embwe. ⁴ Na mukujeneka kulinga lelo ngocho, chojo baka tumbamoni munu na munu mwithi ya muti wendi wa mubinyu na muti wendi wa mukuyu . Chojo na umo wai yaka ba thzibitha lyoba, ⁵ mwafwa echi chikecho kanwa ka Yehoba wa mayongomena ka nendeka. Mwafwa banu boshe ba kenda umo na umo, mu lithzina lya tulunga twabo. Olojo yetu tukende mu lithzina lya Yehoba Njambi yetu ku myaaka yoshe. ⁶ "Cho a litangwa" bene lije—oku kukekwo kulithinga kwa Yehoba—" Njika kungukulula amolika biyanga boshe naku nena hamo boshe baje ba yengula, baje boshe banja yandetha. ⁷ Chojo nji kalumuna baje biyanga na kubapwitha ba ku litulaho, na baje boshe ba shekela ku lyala kubapwitha lifuti lije lya nthzili, cho yange babenya Yehoba, njika bandama a lilundu lya Ziyoni, kutunda bene a thimbu ije na ku myaaka yoshe. ⁸ Ngwe ngechi mwobe, kaposhi ka ku mwenaho butanga —bwendi, lilundu lya mwana wa munakathzi wa mu Ziyoni—echi chili na kwija kuli yobe, buje bumwene bwobe bwa kulibanga buka kwilukila lalo, ije nganda iyapandama kuli mwana wa munakathzi wa mu Yelusalema. ⁹ Cho, omu bikoni muli na kutambekela na majwi a ku kanguka ngachije? Kumani ku mwethioni na mwene a kati keni tai ndi? Indi uje mu ka ku minangula ikeyoni nathsi? Kumani echi chikechoni chichili na ku nenetha yeni kuthziba kubabala chakama ngachije ngwe oni uje munakathzi ali a funga ndi? ¹⁰ Kumani thziba bene kubabala na kukala a funga ngechi ukite, mwana wa munakathzi wa mu Ziyoni, ngwe uje munakathzi ali a funga. Mwafwa ololo yobe u tuhuka oni mu nganda, na ku ka kala mu Shandangala ya ngocho, na kuya ku Mbambiloni. Kuje baka njamena. Kuje Yehoba a ka miyobola ku liboko lya bitothzi beni. ¹¹ Chojo ololo mafuti a mengi a nali kungulula ngechi ba mi lwithe yeni; bali na kwendeka ngwabo, 'Echeleni bai biithe; echeleni mesho a limwene naku lithamba a mulonga wa ku nyonga kwa Ziyoni.' ¹² Olojo kuba tanekeyeye bithinganyeka bya Yehoba cho lalo kubatha ku thzubuka biyongola byendi, mwafwa na ba nene na kuba lundika hamo ngwe aje maanda a binona aje bana bwahethela ku twala kuje kwa ku wa jungwila. ¹³ Kumani katukoni ngechi ujungule, yobe mwana wa munakathzi wa mu Ziyoni, mwafwa njilingitha mbunga yobe kupwoni ya butale, cholalo nji lingitha bimbemba byobe kupwoni bya bunengu. Chojo wathoni ku thsena mayongomena a banu na ku fungulula bufuko bwabo buje ba wanene mu bingila bya kwilika ku fwilalamo ngechi ubwane kuli Yehoba, buje bufuko bwabo kuli mwene wa kaye koshe."