¹ Njendekele ngwange, "Ololo tolilileni, eni bantwama ba Yakomba na ba myata ba mu njubo ya Isalela: Kethi chachibwa yeni kuthzibithitha bubwa bwa kubatula milonga. ² Yeni mwathzinda bya bibwa na kuthzema bya bibi, yeni mukajubu bikonde byabo, na mishuni yabo ku bithsiya byabo— ³ yeni lalo mukali thitu ya banu bange na kujuba bikonde byabo na kupokothzola bithsiya byabo mu bipathzu pathzu, ngwe thitu mu ndeho nambe thitu mundeho yakama. ⁴ Cho yeni ba ntwama mukalilila kuli Yehoba, oloni kakamikumbulula. Hathimbu ije Yehoba akashweka chihanga chendi kuli yeni, mwafwa munalingi bilinga bya bibi." ⁵ Yehoba nendekechi, "Ngwe baje tupolofita batwamenena banu bange mungila yaibi, nga umo abana bya kulya, bakebo bambulula, 'Kuunda.' Oloni nga naumo wahi aka bimo mutunwa twabo, cho bakalyana babenya kufweta nthzita kuli ikeye. ⁶ Cho lalo, bupwa buthsiki kuliyeni neni kumu kapu na bimona; kukakala lithuthulungu mangana mukajeneke kwongoloka litangwa likatokela ha tupolofita, cho nali tanya likabalaukila. ⁷ Ba kakumona baka shauka, na baka kumiya nabakebo bakashauka. Boshe ba kafwika tunwa twabo kuulu, omo kukukakala kukumbulula kuunda kuli Njambi." ⁸ Oloni ngechi mwange, njina shulu na nthzili na munthzinthzime wa Yehoba, cho njashulu na maana na thzili, yaku leka Yakomba bubi bwendi, na Isalela bubi bwendi. ⁹ Ololo tolilileni kuli echi, bantwama ba njubo ya Yakomba, na bakakuyula ba njubo ya Isalela, eni mwathzinda bushunga, na kutengulukila byoshe bya bibwa. ¹⁰ Yeni muli nakutunga Ziyoni na maninga na kujeneka bushunga. ¹¹ Ba ntwama beni bakabatula mulongo na mathzika kanwa, tupilisitu tweni bakakongwetha na bimbongo. Oloni mukajendamena hali Yehoba na kwendeka ngweni, "Kumani Yehoba kethi netu ndi? Nachimo cha chibi chahi chija kuli yetu." ¹² Ngechi bene, mwafwa weni, Ziyoni bakailima ngwe lihya, na Yelusalema ikalumuka mutumbo wa numbo, na lilundu lya tembele ikalumuka myela ya shwata ya ya kuthzika.