¹ Njambi wendekele kuli Mosesa, ngwendi, ² "Oshe munu umo abulumuna cho asholola bilinga byakwilika likulahelo kuli Njambi kwitila mukukwitha mukwabo ha byuma akwata mukumukulahela, nambe bamuthethzele mukunyunga, nambe chuma chije bebile, nambe oshe nalyatelela mukwabo, ³ nambe mwana chuma echi athzimbalethele mukwabo cho alikwithilaho, nambe ngwe alithingilaho chamakuli, nambe mu bina'nda bili byoshe bya chifwechi omu bakabalumwina banu, ⁴ cho oshe nabulumuna cho banamuwana na mulonga, napande kwilwitha byoshobyo wambatele mukupukula nambe mukulyatelela, nambe chije bathzimbalethele oloni chije awanene. ⁵ Mukwakelaho, mu binanda bili byoshe omu alithingile chamakuli, napande kwilwitha mukushula cho napande kwakelaho chimo mubitanu ya ndando yacho nakuchifwetela kuli ibenya halitangwa eli bakamuwana na mulonga. ⁶ Cho napande kunena mulambu wendi wa mulonga kuli Njambi, manga wa nkomba wakwilika katenga kutunda mubutanga ou afwika ndando iliko olo, ngwe mulambu wa mulonga kuli kapilisitu. ⁷ Kapilisitu akamwanena chikomboyo kumesho a Njambi, cho bakamu konekela kutetha nabyo byoshe wa lingile byamuwanethele mulonga." ⁸ Cho Njambi wendekele kuli Mosesa, ngwendi, ⁹ "Kambeya Aloni na banabendi babanalume, ngwombe, 'Eli likelyo lishiko lya mulambu wakulumba: Mulambu wakulumba unapande kukala ha liko lya mutula buthsiki bwoshe kweta mutondo, cho natuya twaha mutula bakatunyunga nakutwalelela kushukuma. ¹⁰ Kapilisitu akathzala buthzalo bwendi bwa lineni, naikeye akathzala lalo buthzalo bwendi bwakwithi bwa lineni. Akambata lito lije likathala hanima ya tuya kunyongetha mulambu wa kulumba ha mutula, cho akaka lito kuyeyi na mutula. ¹¹ Akashulula buthzalo bwendi nakuthzala buthzalo bweka nakwambata lito kutwala hanja ya chilombo ku chela chije chakujela. ¹² Tuhya twaha utula bakatunyunga na kutwalelela kushukuma. Kutwapandele kuthzima, nauje kapilisitu akenyekaho bitale ha mutondo woshe. Akabwahetha mulambu wakulumba ngwe omu chikashakewa hali ukeko, cho akalumbilaho mathzi a mulambu wa kwooloka. ¹³ Tuhya tunapande kutwalelela kushukuma ha mutula thimbu yoshe. Kutwapandele kuthzima. ¹⁴ Eli likelyo lishiko lya mulambu wa mbuto. Bana ba Aloni bakana mulambu ou kuli Njambi kulutwe lwa mutula. ¹⁵ Kapilisitu akambata liboko lyakushula lya bunga bwa tiliku kumulambu wa mbuto nebi bya mathzi nebi bya bweko obu buli ha mulambu wambuto, cho akabilambwila ha mutula bikatuhule bweko bwa bubwa kupwa mulambu wa kwimanenako. ¹⁶ Aloni na bana bendi bakele na kulya byoshe bije byathaleleho ku mulambu. Binapande kubilya chakwilika muthima mu mwela wakuthzila. Babililile mu chimpaka cha tende ya kuliwanena. ¹⁷ Kubapandele kubinunga na muthima. Njinabyana ngwe mbathzubwila ya mulambu ou banapanga na tuhya. Unapu wakuthzila manene, kupwa mulambu wa bubi na mulambu wa mulonga. ¹⁸ Munalume woshe mu chithemunwino cha Aloni banapande kulyako, ngwe lishiko lya myaka yoshe muchikota chobe choshe, ebi banatunditha ku mulambu wa tuhya kwana kuli Njambi. Ou woshe akwatako akapwa wa kuthzila."' ¹⁹ Cho Njambi wendekele kuli Mosesa lalo, ngwendi, ²⁰ "Ou ukeko mulambu wa Aloni na bana bendi, ou bakana kuli Njambi halitangwa omu mwana woshe bakamuwabetha: Kilo imo ya bunga bwa tiliku kupwa mulambu wa mbuto wama tangwa oshe, mbathzubwiloa yabyo kumatondo na mbathzubwila ikwabo kuchingwethzi. ²¹ Bakaipanga na mathzi muchikombola chakumungila. Omu bakaijabeka, ukainena mukati. Mubimbathzubwila bya kumunga laja mukana mulambu wa mbuto mangana ukatuhule bweko bwabubwa kuli Njambi. ²² Muna kapilisitu wahelu ou anakwizha nakupwa kapilisitu wahelu kutunda mu kati ka bana bendi akaulambula. Ngwe omu banakambeya thimbu yoshe, byoshe baka bilumba kuli Njambi. ²³ Mulambu woshe wa mbuto wa kapilisitu bakaulumba woshe. Kuwapandele kuulya." ²⁴ Njambi wendekele kuli Mosesa lalo, ngwendi, ²⁵ "Endeka kuli Aloni na bana bendi, ngwobe, 'Eli likelyo lishiko lya mulambu wa bubi: Mulambu wa bubi wapande kuuthsiyala ku mwela oku bakathziyila mulambu wa kulumba kumesho a Njambi. Unapu wa kuthzila manene. ²⁶ Uje kapilisitu ou akaulambwila ha bubi akaulya. Unapande kuulila mu mwela wakuthzila mu chimpaka cha tende ya kuliwanenamo. ²⁷ Choshocho chikakwata ku thitu yacho chikapwa chakuthzila, cho oshe maninga bakawashamwina ha buthzalo bwoshe, unapande kuchikusha, mbathzubwila oyo banashamwinineho, mumwela wakuthzila. ²⁸ Oloni ije ndeho ya buma omu banabitelekelele batela kuithsiya. Oshe ngwe bakaiteleka mundeho ya bunengu, inapanda kuikonga na kuikusha na mema itoke. ²⁹ Munalume ali woshe mukati ka tupilisitu atha kulyako imo mwafwa inapu yakuthzila manene. ³⁰ Oloni woshowo mulambu wa bubi obu maninga acho bakanena mu tende yakuliwanenena na kwanenamo chikombeyo mu chela chakuthzila kuyapandele kuilya. Yapande kuilumba.