¹ Osho munu umo abulumuna mwafwa kambulwile omu bamutondele kwambulula ha bukaleho bwa chuma, nambe nachimwene nameme kuchithziba, akathsa nawo. ² Nambe oshe munu umo akwata chuma chili choshe echi Njambi natumbula kukala chakujeneka kujela nambe ikale thitu ya chimuna nameme byakutanga byakujeneka kujela bije bikende hathi, nambe kathzibukile obyo alingile, naija nakupwa wakujeneka kujela ou ali namulonga. ³ Nambe oshe ngwe munu akwata kujeneka kujela cha munu, kujeneka kujela mungila iliyoshe, cho oshe ngwe kathzibukile, cho akakala na mulonga omu mwakathzibuka. ⁴ Nambe oshe ngwe munu athzambula kulithinga na kanwa kendi kulinga mwamubi, nameme kulinga mwamubwa, mungila iliyoshe omu munu athzambwilamo kulithinga chithingo, nambe kathzibukile, omu mwalilongethacho, cho akakala na malonga, mubyuma byoshe ebi. ⁵ Omu munu akakala na mulonga muli chimo chebi byuma, napande kulitabela bubi bwoshe obu nabulumuna. ⁶ Cho napande kunena mulambu kuli Njambi ha bubi buje nabulumuna, chimuna wa lwabo kutunda mubutanga, chipwe muna manga nameme membe, kukala mulambu wa bubi, cho kapilisitu akapanga chikombeyo hamulonga wa bubi bwendi. ⁷ Oshe ngwe katha kulanda muna manga, cho kunena tutela babali nambe bana ba mayembe kukala mulambu wa mulonga wa bubi kuli Njambi, umo hamulonga wa bubi namukwabo kukala mulambu wakulumba. ⁸ Napande kubinena kuli kapilisitu, ou akana umo wakulibanga kukala mulambu wa bubi - cho akathongonona mutwe wendi kutunda kuthingo oloni kakautundithako kumubila. ⁹ Cho akashamwina maninga amo amulambu wabubi mumbango ya mutula, nakuamwina aje maninga akathala hathi ya mutula. Ou unapu mulambu wa bubi. ¹⁰ Cho napande kwana kathzila wa muchibali kupwa mulambu wa kulumba, ngwe omu banalumbununa mu kulongetha, cho kapilisitu akapanga chikombeyo chendi ha bubi buje abulumwine, cho nauje munu bakamukonekela. ¹¹ Oloni oshe ngwe katha kulanda tutela babali nambe bana ba mayembe babali, cho napande kunena kilo imo ya bunga bwa tiliku kupwa mulambu wakulyana ha bubi bwendi kupwa mulambu wa bubi. Kapandele kwaka mathzi nambe bya bweko byoshe ha bukeko, mwafwa unapu mulambu wa bubi. ¹² Napande kubinena kuli kapilisitu, na kapilisitu akambatamo liboko limo kupwa chakwimanenako mulambu cho nakubilumbila ha mutula, helu ya mulambu banapanga na tuya kuli Njambi. Ou unapu mulambu wa bubi. ¹³ Kapilisitu akana chikombeyo ha bubi buli bwoshe buje nabulumuna uje munu, cho uje munu bakamukonekela. Bije bikathalaho kutunda ku mulambu bikapwa bya kapilisitu, ngwemulambu wa bimbuto." ¹⁴ Cho Njambi wendekele na Mosesa, ngwendi, ¹⁵ "Oshe ngwe munu abulumuna na kumwetha bilinga bya kwilika likulahelo kutala ku byuma bya Njambi, oloni wachilingile mukujeneka kuthzibuka, cho napande kunena mulambu wa mulonga kuli Njambi. Ou mulambu unapande kupwa manga wa nkomba wakwilika katenga kutunda ha butanga; ndando yendi inapande kuipwitha mu mashekele a siliva - mashekele aku mulili wakuthzila - kupwa mulambu wa mulonga. ¹⁶ Napande kubwaheletha Njambi mu byuma bije nabulumuna kutala kuli bije bya kuthzila. Cho napande kwakelaho chimo mubutanu nakubyana kuli kapilisitu. Cho kapilisitu akana chikombeyo kumwimanenako na manga wa nkomba kukala mulambu wa mulonga , cho uje munu bakamukonekela. ¹⁷ Oshe ngwe munu nabulumuna nakulinga bili byoshe bije akambeyeye Njambi ngwe kethi akabilinge, nambe kathzibukile, chimolika ali namulonga cho napande kwambata mulonga wendi ibenya. ¹⁸ Napande kunena manga wa nkomba wakwilika katenga kutunda mubutanga, wakwilika na ndando iliko, kupwa mulambu wa mulonga kuli kapilisitu. Cho uje kapilisitu akana chikombeyo hali ikeye kwetheka na bubi obu nabulumuna, obu kathzibukile, cho bakamukonekela. ¹⁹ Unapu mulambu wa mulonga, cho chili bene ali namulonga kumesho a Njambi."