¹ Yehoba wendekele kuli Mosesa ngwendi, ² "Leka banu ba Isalela ngwobe, 'Omwo munu ukabulumuna thimbu kashakele kubulumuna, kulinga byuma bimo bije akambeyeye Yehoba kwilika kubilinga, cho oshe akalinga bimo bije babyanetha, mwapande kulinga ngechi. ³ Oshe ngwe kapilisitu wa helu ikeye abulumuna mangana anene mulonga hali banu, cho mwecheleni akalambule muna ngombe ha bubi bwendi obu abulumwine wakujeneka kapenga kuli Yehoba kupwa mulambu wa bubi. ⁴ Napande kunena uje ngombe ku bukobelelo bwa tende ya kuliwanena kuli Yehoba, kukambeka liboko lyendi ha mutwe, nakuthsiya uje ngombe kuli Yehoba. ⁵ Uje kapilisitu wakubwabetha akambata maninga amo a ngombe nakuwatwala ku tende ya kuliwanena. ⁶ Uje kapilisitu akambwitika munye wendi mu maninga nakushamwina amo kuli Yehoba katanu na kabali, ku chibatulo cha uje mwela wa kuthzila manene. ⁷ Cho uje kapilisitu akaka maninga amo ku bimbnga bya mutula wa isense ya lithzimba kuli Yehoba, uje ali mu tende ya kuliwanena, cho aketila aje maninga akathalaho a ngombe kwithi ya mutula bya mulambu wa kulumba, ou uli kubukobelelo wa tende ya kuliwanena. ⁸ Akatetako lyathzi lyoshe lya ngombe wa mulambu wa bubi; lyathzi lije lyafwika bilyo bya mwimo, lyathzi lyoshe lije lyalikwata na bilyo bya mwimo, ⁹ bije bithso bibali na lije lyathzi lyakalako, eli lyakala ha mishisha, na kushongo ya lishuli, hamo na bithso— akabitetko byoshe ebi. ¹⁰ Akabiteta nakubitundithako byoshe, ngwe muje bene mubakabitete kutunda kuli ngombe wa chikombeya wa mulambu wa kwoloka. Cho kapilisitu akalumba ebi bilyo ha mutula kupwa mulambu wa kulumba. ¹¹ Chije chilambu cha ngombe na thitu yoshe ikathalako, na mutwe wacho na mendi acho na bilyo bya mwimo hamo na bufwati bwacho, ¹² na bilyo byoshe bya ngombe— akambata ebi bilyo byoshe hanja ya chilombo kuya ku mwela ubananjijelethela, kuje kubaketila lito; bakenyekela bije bilyo kuje bene ha bitale. Banapande kwenyekela bije bilyo kuje kubakenyekela lito. ¹³ Oshe chikungulwilo choshe cha Isalela chibulumuna chakwilika kushaka kubulumuna, cho chikungulwilo chije kuchathzibukile ngwabo banabulumuna nakulinga bimo bya byuma bije Yehoba wakambeyeye kujeneka kubilinga, cho oshe banathsi nabyo, ¹⁴ cho, omwo bubi bubanabulumuna baija nakubutanekeya, cho chikungulwilo chapande kulambula muna ngombe wa mulambu wa bubi nakumunena ku tende ya kuliwanena. ¹⁵ Bakulunu ba chikungulwilo bakakambeka maboko abo ha mutwe wauje ngombe ku mesho a Yehoba, cho uje ngombe bakamuthsiyila ke mesho a Yehoba. ¹⁶ Kapilisitu uje babwabetha akanena amo maninga a ngombe ku tende ya kuliwanena, ¹⁷ cho uje kapilisitu akambwitika munye wendi muje mumaninga na kushamwina katanu na kabali ku mesho a Yehoba, kuje ku chibatulo. ¹⁸ Amo maninga akawaka ku bimbinga bya mutula uje uli ku mesho a Yehoba, ou uli mu tende ya kuliwanena, cho aketila maninga oshe kwithi ya mutula wa mulambu wa kulumba, ou uli ku bukobelelo bwa tende ya kuliwanena. ¹⁹ Akatetako lyathzi lyoshe na kulilumba ha mutula. ²⁰ Obyo bikebyo napande kupanga na ngombe. Ngwe muje bene alingile na ngombe wa mulambu wa bubi, mukemo lalo mwakapanga nou ngombe, cho kapilisitu akapanga chilika cha kujeletha hali banu, cho bakabakonekela. ²¹ AKambata uje ngombe hanja ya chilombo na kumulumba ngwe muje walumbile uje ngombe wabubanga. Ou unapu mulambu wa bubi wa chikungulwilo. ²² Omwo mukakuyula akabulumuna chakujeneka kushaka kubulumuna, kulinga chimo chabije byoshe byuma bya kambeyeye Yehoba Njambi yendi kwilika kubilinga, nakuthsa nawo, ²³ cho bubi bwendi bwanabulumuna babulingitha kuthzibakana kuli ikeye, napande kunena membe wa chikombeyo, wa nkomba wakujeneka kapenga. ²⁴ Akakambeka liboko lyendi ha mutwe wauje membe na kumuthsiyila mu mwela mubakathsiyila milambu ya kulumba kuli Yehoba. Ou unapu mulambu wa bubi. ²⁵ Kapilisitu akatwala maninga a mulambu wa bubi na kwaka ku mambinga a mutula na munye wendi kupwa mulambu wa kulumba, na kwitila maninga endi kwithi ya mutula wa mulambu wa kulumba. ²⁶ Akalumba lyathzi lyoshe ha mutula, ngwe muje bene akalumbu lyathzi lya chikombeyo cha mulambu wa kwoloka. Kapilisitu akapanga chilika cha kulijeletha cha mukakuyula ha bubi bwendi, cho uje mukakuyula bakamukonekela. ²⁷ Oshe umo munu wangocho akabulumuna chakujeneka kushaka kubulumuna, kulinga chimo chuma chije wakambeyeye Yehoba kwilika kulinga, cho omwo akathzibuka ngwe nathsi nawo, ²⁸ cho bubi bwendi bwanabulumuna babuthzibukitha kuli likeye, cho akanena membe kupwa chikombeyo, wa lwabo wakujeneka kapenga, ha bubi buje bwanabulumuna. ²⁹ Akakambeka liboko lyendi ha mutwe wa mulambu wa bubi nakuthsiya uje mulambu wa bubi ha mwela wa mulambu wa kulumba. ³⁰ Kapilisitu akambata maninga amo na munye wendi nakwaka ku bimbinga bya mutula wa mulambu wa kulumba. Aketila maninga oshe akalitulaho kwithi ya mutula. ³¹ Akatetelako lyathzi lyoshe, ngwe muje bene akatete kutunda ku chikombeyo cha mulambu wa kwoloka. Kapilisitu akabilumbila ha mutula bikatuhule bweko bwakutobala bwa Yehoba. Kapilisitu akapanga chilika chakulijeletha hali uje munu, cho bakamukonekela. ³² Oshe munu akanena maanga wa nkomba kupwa chikombeyo chendi cha mulambu wa bubi, akanena wa lwabo wa kujeneka kapenga. ³³ Akakambeka liboko lyendi ha mutwe wa mulambu wa bubi nakumuthsiya kupwa mulambu wa bubi ha mwela oho bakathsiyila mulambu wa kulumba. ³⁴ Kapilisitu akambata maninga amo a mulambu wa bubi na munye wendi nakwaka ku bimbinga bya mutula wa mulambu wa kulumba, cho aketila maninga oshe kwithi ya mutula. ³⁵ Akatetako lyathzi lyoshe, ngwe muje bene lyathzi lya maanga wa nkomba bakalitunditha ku chikombeyo cha mulambu wa kwoloka, cho kapilsitu akabilumbila ha mutula hakamwa ya mulambu. Kapilisitu akapanga chilika cha kulijeletha hali likye ha bubi bwanabulumuna, cho uje munu bakamukonekela.