¹ Oshe umo akombelela mulambu ou unapu mulambu wakulinunga wa kathitu kutunda mu bingombe, ngwe bwa nkomba nameme walwabo, napande kwana ngombe wakujeneka kapenga kuli Yehoba. ² Akakambeka liboko lyendi ha mutwe wa mulambu wendi nakumuthsiyila ku chikolo cha tende yakuliwanena. Cho bana ba Aloni baje tupilisitu bakashamwina maninga endi mu bimbando bya mutula. ³ Owo munu akalambula mulambu wakulinunga kwitila mu tuhya kuli Yehoba. Lyathzi lije lyafwika nameme lyalinunga na bya mwimo, ⁴ na bije bithso bibali na lyathzi lije lyakalako kwitila mu mishisha, na ije shongo ya lishuli, hamo na bithso— akatundithamo byoshe. ⁵ Bana ba Aloni baka byenyekela ha mutula hamo na mulambu wa kulumba, ou uli ha bitale bije bili ha liko. Ebi bikatuhula bweko bwakutobala bwa Yehoba; ukapwa mulambu ubakapanga kwitila mu tuhya kuli likeye. ⁶ Oshe owo mulambu wa munu wa mulambu wa kulinunga kuli Yehoba ukatunda ku bimaanga; nkomba nameme lwabo, napande kwana mulambu wakujeneka ⁷ kapenga. Oshe akanena maanga wa nkomba kupwa mulambu wendi, cho napande kumulambula kuli Yehoba. ⁸ Akakambeka liboko lyendi ha mutwe wa mulambu wendi na kuuthsyila ku tende ya kuliwanena. Cho bana ba Aloni bakashamwina maninga endi mu bimbando bya mutula. ⁹ Munu akalambula mulambu wa kulinunga kupwa mulambu ubakapanga kwitila mu tuhya kuli Yehoba. Aje mathzi, mathzi a mukila oshe abanabatwila hayehi na mutanda, na mathzi aje akafwiki bya mwimo na mathzi oshe aje akala kuyehi na bya mwimo, ¹⁰ na bije bithso bibali na mathzi acho, aje ali ku mushisha, na shongo ya lishuli, hamo na bithso—akatunditha byoshe ebi. ¹¹ Cho uje kapilisitu akabyenyeka byoshe ha mutula kupwa mulambu wa kulumba wa kulya kuli Yehoba. ¹² Oshe nga mulambu wa munu upwa membe, cho akalambula kuli Yehoba. ¹³ Napande kukambeka liboko lyendi ha mutwe wauje membe nakumuthsiyila ku tende ya kuliwanena. Cho bana ba Aloni bakashamwina maninga endi mu bimbando bya mutula. ¹⁴ Uje munu akana mulambu wakupanga kwitila mu tuhya kuli Yehoba. Akatunditha aje mathzi aje afwika bije bya mimo, na mathzi oshe ali kuyehi na bya mwimo. ¹⁵ Akatunditha lalo bije bithso bibali na mathzi acho, aje akala ku mishisha, na shongo ya lishuli hamo na bithso. ¹⁶ Uje kapilisitu akenyeka byoshe ebi ha mutula kupwa mulambu wa kulumba wa kulya, ukatuhula bweko bwakutobala. Mathzi oshe apwa a Yehoba. ¹⁷ Likapwa lishiko lya kutumbama mu chitheminwina cha banu beni mu mwela woshowo mukatunga limbo, ngwabo kumwapandele kulya mathzi nameme maninga."'