¹ Omwo owo woshe akanena mulambu wa mbuto kuli Yehoba, mulambu wendi wapande kupwa bunga bwa bubwa, cho aketilamo mathzi na kwakamo isense. ² Akatwala uje mulambu kuli bana ba Aloni baje tupilisitu, kuje baje tupilisitu bakatundithamo liboko lya kushula lya bunga na mathzi naije isense ilimo. Cho baje tupilisitu bakenyeka uje mulambu ha mutula kupwa mulambu wakwimanenako. Ukatuhula bweko bwakutobala bwa Yehoba; ukapwa mulambu banapanga kwitila mu tuhya. ³ Bije byoshe bikathalako ha mulambu wa mbuto bikapwa bya Aloni na bana bendi. Binapu bya kuthzila manene kuli Yehoba kutunditha ha mulambu wa Yehoba banapanga na tuhya. ⁴ Omwo ukana mulambu wa mbuto wakujeneka muthima bakawochela ha liko, lyapande kupwa likende lyalibothi lya bunga bwa bubwa bwa kupandathana na mathzi, nameme likende lya kukola lya kujeneka muthima, eli banakwiti mathzi. ⁵ Oshe mulambu wobe wa mbuto banawochela ha chikango cha chikubo, wapande kupwa wa bunga bwa bubwa bwakujeneka muthima obwo banakumbathana na mathzi. ⁶ Mukabupanga mu bipuka na kwitilaho mathzi. Ou unapu mulambu wa mbuto. ⁷ Oshe ngwe mulambu wobe wa mbuto banauteleka ha chikango, unapande kuupanga na bunga bwa bubwa hamo na mathzi. ⁸ Wapande kunena mulambu wa mbuto ubanapanga nebi byuma kuli Yehoba, cho bakautwala kuli tupilisitu, aba bakaunena ku mutula. ⁹ Cho tupilisitu bakambatako umo ha mulambu wa mbuto kupwa mulambu wakwimanenako, cho ukawenyekela ha mutula. Ukapwa mulambu ubanapanga na tuhya, cho ukatuhula bweko bwakutobala bwa Yehoba. ¹⁰ Ebi bikathalaho ha mulambu wa mbuto bikapwa bya Aloni na bana bendi. Chapwa cha kuthzila manene kuli Yehoba kutunditha ha mulambu wakuli Yehoba ubanapanga kwitila mu tuhya. ¹¹ Kukwethi mulambu wa mbuto ou mukalambula kuli Yehoba ubakapanga na muthima wahi, mwafwa kumwapandele kwenyeka muthima, nameme buki, kupwa mulambu ubanapanga na tuhya kuli Yehoba. ¹² Mukabilambula kuli Yehoba kupwa mulambu wa bushuka bwakulibanga, oloni kubakabipangetha bikatuhule bweko bwakutobala ha mutula embwe. ¹³ Mwapande kutoba mukele mu mulambu weni wa mbuto woshe. Kumwapandele kutabetha mukele wa chithzibathano cha Njambi yeni ukelike kupwa mu mulambu weni wa mbuto. Mu mulambu weni woshe mwapande kulambula na mukele. ¹⁴ Oshe mukalambula mulambu wa mbuto kupwa bushuka bwa kulibanga kuli Yehoba, mukalambule mbuto ya kutonola ije ibakocha mu tuhya cho nakuitwa kupwa bunga. ¹⁵ Cho mwapande kwakamo mathzi na isense. Ou unapu mulambu wa mbuto. ¹⁶ Cho uje kapilisitu akenyeka mbathzubwila ya ije mbuto ya kutwa na mathzi na isense kupwa mulambu wakwimanenako. Ou unapu mulambu ubanapanga na tuhya kuli Yehoba.