¹ Eli likelyo lishiko lya mulambu wa mulonga. Unapu wakuthzila manene. ² Bapande kuthsiya mulambu wa mulonga mumwela omu bakathsiyila, cho bapande kushamwina maninga mubimbango byoshe bya mutula. ³ Mathzi oshe alimo bakawalambula: mathzi a mukila, mathzi awa ali mubilyo byamukati, ⁴ bintho byoshe bibali na mathzi acho aliko, awa alikuyeyi na chitatamila, nabije byoshe byafwika lishuli, hamo na bintho-- byoshebi byapande kubitundithamo. ⁵ Kapilisitu napande kulumba bilyo byoshebi ha mutula kupwa mulambu banana hamo na tuhya kuli Njambi. Ou anapu mulambu wa mulonga. ⁶ Munalume woshe hakati ka tupilisitu banatha kulya bimo byou mulambu. Yapande kuilila mu mwela wakuthzila mwafwa yapwa yakuthzila manene. ⁷ Mulambu wa bubi unapu ngwe mulambu wa mulonga. Mashiko amolika akwata kuli boshe. Binapu nya kapilisitu ou akalingi chikombeyo hamo nabo. ⁸ Kapilisitu ou akana mulambu wa kulumba wa munu natha kukala kuli ibenya kushweka kwa mulambu ou. ⁹ Mulambu wa mbuto woshe uje banamungu nakwocha, na mulambu woshe ou bateleka mu chikango nambe muchikombola cha kufwatwilamo ukapwa wa kapilisitu ou akawana. ¹⁰ Mulambu woshe wa mbuto, ukale wakuma nameme wakukumbathana na mathzi, ukapwe waboshe ba chithemunwina cha Aloni. ¹¹ Eli likelyo lishiko lya kwana bwana bwa mulambu wa kwooloka ou banu bakana kuli Njambi. ¹² Oshe ngwe munu ali woshe ana mangana ane kukandelela, cho napande kwanena hamo nabwana bwakulya na bwa likende banamungu chakujeneka muthima, oloni banakumbathana na mathzi, amakende akumunga chakujeneka muthima, oloni banawetila mathzi, cho nawa na makende banatungu na bunga bwa tiliku bwakukumbathana na mathzi. ¹³ Lalo hamulonga wakwana kukandelela, napande kulambula mulambu wa kwooloka likende lya kumunga na muthima. ¹⁴ Akulambula chimo chachifwa cha kulyana kupwa mulambu ou banalambula kuli Njambi. Ukakala wa kapilisitu ou akashamwina maninga a mulambu wa kwooloka ha mutula. ¹⁵ Munu ou anakwana mulambu wa kwooloka hamulonga wakwana kukandelela napande kulya thitu ya mulambu wendi halitangwa lya kulyana. Kapandele kuthethzaho chimo kweta na kumutondo halikaki. ¹⁶ Oloni oshe bwana bwana bwakalitombola bwa mulambu wendi bunapu bwa mulonga wa kulithinga, nambe hamulonga wakwana mulambu wa chakumbunge, thitu inapande kuilya halitangwa eli akalambula bwana bwendi bwa kulitombola, oloni obyo byoshe bikathalaho natha kubilya halikaki. ¹⁷ Nambe ngocho, yoshoyo thitu ya bwana bwakulitombola ikathalaho halitangwa lya muchitatu inapande kuilamba. ¹⁸ Oshe thitu yaingi ya bwana bwa kulitombola ya mulambu wa kwoolola baulwa hali tangwa lya muchitatu, kuikapu yakutabela, nameme kuulabela kuli uje naulambwile. Ikakala chuma chabunyengwe, cho namunu akaulya akambataho mulonga wa bubi. ¹⁹ Thitu yoshe ei ikakwata chuma chakujeneka kujela kuyapandele kuilya. Yapande kuilumba. Hamulonga wathitu ikathalaho, munu woshe wakujela natha kuilya. ²⁰ Nambengocho, munu wakujeneka kujela ou alya thitu itunda ku bwana bwakulitombola bwa mulambu wa kwooloka ei yapande kupwa ya Njambi--owo munu napande kumubatulako kutunda ku banu bendi. ²¹ Oshe umo akwata byuma bya kujeneka kujela--chikale mukujeneka kulijeletha cha munu nameme kujeneka kujela cha kathitu nameme bimo byakujeneka kujela, chuma chabunyengwe--cho oshe ngwe alya imo thitu ya bwana bwakulitombola bwa mulambu wakwooloka ou unapande kukala bwa Njambi, owo munu napande kumubatulako kutunda ku banu bendi."' ²² Cho Njambi wendekele kuli Mosesa, ngwendi, ²³ "Endeka ku banu ba Isalela ngwobe, 'Kumwapandele kulya mathzi a ngombe, manga, nambe bimembe. ²⁴ Mathzi a kathitu uje nathsile chakujeneka kupwa bwana bwakulitombola, nambe mathzi a kathitu banatabuthzola ku kathitu wamushwata, banatha kumupangetha ku bilika bikwabo, oloni kumwapandele bene kumulya. ²⁵ Owo woshe akalya mathzi akathitu uje banena banu kupwa bwana bwakulitombola mu tuhya kuli Njambi, owo munu napande kumubatulako kutunda ku banu bendi. ²⁶ Kumwapandele kulya maninga oshe mubinjubo byeni, apwe akutunda ku kathzila nambe kukathitu. ²⁷ Owo woshe akalya maninga, owo munu bakamubatulako kutunda ku banu bendi."' ²⁸ Cho Njambi wendekele kuli Mosesa ngwendi, ²⁹ "Endeka kubanu ba Isalela ngwobe, 'Ou akana bwana bwa kulitombola bwa mulambu wa kwooloka kuli Njambi napande kunena mbathzubwila ya bwana bwendi bwa kulitombola kuli Njambi. ³⁰ Mulambu wa Njambi bakaulinge na tuhya, maboko endi ibenya anapande kunena. Napande kunena mathzi hamo na n'undo, mangana n'undo bakaipwithe bwana bwabubwa kuli Njambi. ³¹ Kapilisitu napande kulumba mathzi ha mutula, oloni n'undu ikapwa ya Aloni na chithemunwina chendi. ³² Wapande kwana kathapo kakuchilyo kuli kapilisitu kupwa mulambu bananene kutunda ha bwana bwa kulitombola bwa mwambu wa kwooloka. ³³ Uje kapilisitu, umo mu chithemunwina cha Aloni, ou akana maninga kupwa mulambu wa kwooloka na aje mathzi--akatabula kaje kathapo kakuchilyo kupwa mbathzubwila yendi yaha mulambu. ³⁴ Mwafwa njinambata kutunda ku banu ba Isalela, n'undo ya mulambu waubwa, na kathapo aka kanapu chakukungulula, cho banabyana kuli Aloni uje kapilisitu na bana bendi kupwa mbathzubwila yaba yamatangwa oshe. ³⁵ Ei ikeyo mbathzubwila ya Aloni na chithemunwina chendi kutunda ku milambu ya Njambi ei banapanga na tuhya, halitangwa omu Mosesa wabinenele nakwana Njambi muchipangi cha kapilisitu. ³⁶ Ei ikeyo mbathzubwila oyo Njambi wa kambeyeye kubanayo kutunda ku banu ba Isalela, halitangwa lije wabwabethele tupilisitu. Ikapwa mbathzubwila yabo mu bikota byabo byoshe. ³⁷ Awa akeo mashiko a mulambu wakulumba, a mulambu wa mbuto, a mulambu wa bubi, a mulambu wa mulonga, a mulambu wa kujeletha, na bwana bwakulitombola ha milambu ya kwooloka, ³⁸ ei Njambi wanene kukambeya kuli Mosesa ha Munkinda wa Sinai halitangwa lije wakambeyeye banu ba Isalela kwana ma bwana akulitombola kuli Njambi mu mambo ya Sinai."'