¹ "Kumwapandele kutenga tumponya embwe, cho kumwapandele kujundula chuma choshe chakushonga nameme nguthzi ya limanya kupwa yakulema, cho kumwapandele kutumbika chihanga chimo cha limanya lyakushonga mu lifuti lyeni oku mukathsikamena, mwafwa yange Yehoba Njambi yeni. ² Mwapande kunyunga Sabata yange nakuthingimika mwela wakunjilemethela. Yange njapwa nji Yehoba. ³ Oshe ngwe mukendela mu mashiko ange na kunyunga bikambeyo nakubitabela, ⁴ cho njikamyana nyonthzi mu ngonde yacho; cho lifuti likatuhula bushuka bwalyo, na miti ya mushwata ikema bushuka. ⁵ Bijungwilo byeni bikatwalelela kweta ku thimbu ya kuteja, cho kuteja cha mangilepu chiketa kuthimbu yakukuna. Mukalya makende, na kukuta cho mukayoya mwamubwa oko mukatunga limbo lyeni mu lufuti. ⁶ Njikana kwooloka mu lifuti; mukakotha chakwilika kuthziba lyoba. Njikatunditha tuthitu ba bushonde mu lifuti, cho kumuketi mukwale mu lifuti embwe. ⁷ Mukasheka bitothzi beni, cho bakathsa ku mukwale weni. ⁸ Banu batanu muli yeni bakasheka chita, cho banu chita bakasheka likumi lya makulukathzi; bitothzi beni bakawa ku mukwale weni. ⁹ Njikamitetela na kumipwitha bakwima bushuka na kumitumitha; Njikatakametha chithzibathano change nobe. ¹⁰ Mukalya kulya chakunyunga hathimbu ya ilaja. Mukashakewa kutundithamo chije kulya chimunanyungu mwafwa mukathetela chibatulo chakwaka kuteja chachiha. ¹¹ Njikaaka tabanakele yange mukati keni, cho kunjikamithzilika embwe. ¹² Njikendela mukati keni nakupwa Njambi yeni, cho yeni mukapwa banu bange. ¹³ Yange njinapu Yehoba Njambi yeni, ou wamitundithile mu lifuti lya Ingitu, ngechi mwilike kupwa bindungo babo. Njinabujula nthzili ya bimpango byamikutile na kumyechela mwende nakundikangela. ¹⁴ Oloni oshe kumutolilila kuli yange, nakutabela bikambeyo byoshe ebi, ¹⁵ cho oshe ngwe mubyana kushika change nakulithzilika kumashiko ange, mangana mwilike kutabela kukambeya change choshe, oloni mupokola chithzibathano change— ¹⁶ Oshe mupanga ebi byuma, cho njikalinga echi kuli yeni: Njikanena chakuthzibitha lyoba hali yeni, mishongo na lithikathika lije likanyongetha mesho eni nakumitha myonyo yeni. Mukakuna mbuto yeni cha ngocho, mwafwa bitothzi byeni bakalya kuteja chabo. ¹⁷ Njikatunditha chihanga change kuli yobe, cho bakakulyana kuli bitothzi bobe. Bakakuyula kuli banu aba bakuthzinda, cho ukatewa, nambe kukukakala umo wakukusheka embwe. ¹⁸ Oshe hanima ya byuma byoshebi ku ukanjithzibilila, cho njikakunyanyametha mwakama katanu na kabali ha bubi bwobe. ¹⁹ Njikatunditha likamba lyobe mu mooko yobe. Njikapwitha lilu hali yobe kupwa chikubo na lifuti ngwe bunengu. ²⁰ Nthzili yobe bakaipangetha changocho, mwafwa lifuti lyobe kulikatundu bya kuteja, na miti mu lifuti kuikatuula bushuka bwabyo. ²¹ Oshe nge ukanjitengulukila na kujeneka kunjithzibilila, njikanena bukalu katanu na kabali hali yobe, kwetheka na bubi bwobwe. ²² Njikakutumina tuthitu bamushwata, bakakunyeka bana bobe, kunyongetha bimuna byobe, na kumikehetha mukutuma mangana bingila byeni bikapwe byakupunda. ²³ Oshe nambe hanima ya byuma ebi kumukatabela kumyolola cho mukatwalelela kwendela mukulikanga kuli yange, ²⁴ cho nange njikendela mukulikanga, cho yange ibenya njikamithinika katanu na kabali hamulonga wa bubi bweni. ²⁵ Njikanena mpoko yamukwale ije ikamihitha yeni ha kupokola chikumiyo. Bakamikungulwila hamo mu binganda byeni, cho njikatumamo mushongo, choni baka myana muliboko lya chitothzi cheni. ²⁶ Omu njikatepulula kukwija cha byakulya byeni, ngechi banakathzi likumi bakochela makende eni ha liko limo, cho bakapangela awa makende mukuwapethzeletha. Mukawalya oloni kumukakuta. ²⁷ Oshe kumukanjithzibilila nambe hanima yebi byuma, olojo mukatwalelela kutunda kuli yange, ²⁸ cho njikatunda kuli yeni mu kulubala, cho njikamithinika na kulyana katanu na kabali hamulonga wa bubi bweni. ²⁹ Mukalya thitu ya bana beni babanalume; mukalya thitu ya bana beni babanakathzi. ³⁰ Njikanongetha myela yeni ya helu, njikabujula mitula yeni ya isense, na kumbila bibimbi byeni ha bibimbi bya tumponya tweni, cho mukapwa babunyengwe kuli yange. ³¹ Njikatengulula binganda byeni kupwa bingundu na kunyongetha myela yeni yakulemethela. Kunjikabwahelela na bwengo bwa bing'ambelo byeni. ³² Njikanyongetha lifuti lyoshe. Baka ng'ole beni baje bakayoyelamo bakalikomokela ha kunyongetha echi. ³³ Njikamimwangela mukati ka mafuti eka, cho njikakoka mukwale wange na kumikaba. Mukathzethza lifuti lyeni, cho binganda byeni bikapwa bingundu. ³⁴ Cho lifuti likabwahelela Sabata hakupwa likathala hathimbu imukalithzethza nakupwa mu lifuti lya bitothzi beni. Muthimbu oyo, lifuti likahwima na kubwahelela Sabata. ³⁵ Hakupwa likathala, likakala na kuhwima, echi chikapwa kuhwima chije kulyakele nalyo thimbu mwayoyelelemo. ³⁶ Ngwe kuli yeni bakathethza mulifuti lya bitothzi beni, njikatuma lyoba mu bimbunge byeni mangana mukatewe nambe chililimo cha liputa lili nakupekumuka mu luhunthzi, cho mukatewa ngwe ngwabo munakutewa ku mukwake. Mukalihwila, nambe kukwethi umo ali nakumisheka. ³⁷ Mukatanuka hali umo namukwabo ngwe ngwabo munakushatuka kutunda ku mukwale, nambe kukwethi umo wakumisheka. Kumukapu na nthzili yakwimana ku bitothzi beni. ³⁸ Mukanyonga mukati ka mafuti, na lifuti lya bitothzi beni likamiboletha. ³⁹ Baje bakathalaho mukati keni bakabihila mu bubi bwabo, muje mu lifuti lya bitothzi beni, cho hamulonga wa bibi byabaishabo bakathsilamo lalo. ⁴⁰ Olojo oshe bakatabela ku bubi bwabo nobu bwabaishabo, naku tengulukila kuje kubapwile ba likulahelo kuli yange, na kwenda chabo kutunda kuli yange— ⁴¹ echi chanjinenethele yange kutunda kuli bakebo cho njabanenele mu lifuti lya bitothzi babo— oshe bimbunge byabo bya kwilika kujela bikaya nakulikehetha, na kutabela kuthinika cha bubi bwabo, ⁴² cho njikanuka chikumiyo change na Yehoba, chikumiyo change na Isake, na chikumiyo change na Abulahama; lalo, njikanuka lije lifuti. ⁴³ Lije lifuti bakalithethza, cho likabwahelela na kuhwima chalyo thimbu likapwa lyakuthala likalyalo. Bakapwa bakukuka mulonga wa bubi bwabo mwafwa babyanene kushika change na kulithzilika ku mashiko ange. ⁴⁴ Olojo nambe hamulonga wechi, omu bakapwa mu lifuti lya bitothzi babo, kunjikabyana, nameme njikabathzilike mangana njikabanyongethe nakwibalako chikumiyo change nabakebo, mwafwa yange Yehoba Njambi yabo. ⁴⁵ Oloni hamulonga wabo njikanuka chije chikumiyo njalithzibathanene na bakakulula babo, baje njatundithile mu lifuti lya Ingitu ku mesho a mafuti, mangana njikapwe nji Njambi wabo. Yange njapwa nji Yehoba." Awa akewo makambeyo, bithzila, na mashiko aje Yehoba wapangele mukati kendi ibenya na banu ba Isalela ha munkinda wa Sinai kwitila muli Mosesa. ⁴⁶ 46