¹ Njambi wendekele kuli Mosesa alilundu lya Sinai, na kwendeka ngwendi, ² "Endeka kuli banu ba mu Isalela na kwendeka kuli bakebo ngwobe 'Omo mwija mulifuti lije linji myana, cho lifuti linapande kupwa lya kunyunga Sabata ya Njambi. ³ Mwapande kukuna lihya lyeni amyaka yakupwa itanu naumo, cho mu myaka itanu naumo munapande kuhela binyu byeni na kubikundika. ⁴ Oloni mu mwaka wamuchitunu naibali, Sabata ya kuhwima cha mulifuti munapande kuiikengetha bwino, ikeyo Sabata ya Njambi. ⁵ Kethi mukalikungulule na kuliyongola mwakutejela byoshobyo binalishokela bikebyo bibenya, cho kethi mukalikungulule nakuliyongola mwakutejela mikolobothzi ili yoshe ije yashoko muje munajeneka kuhela binyu byeni. Echi chikapwa mwaka wa kuhwima cha mulifuti. ⁶ Lyosholyo lihya lishoka byakulya athimbu ya mwaka wa Sabata bikapwa byobe. Yobe, bingamba bobe babanalume na babanakathzi, ngamba yobe wakukumuna na metandinda baje bawayoya nabo amo bakungulula kulya, ⁷ na bimuna byobe cho lalo na tithitu bamu shwata amo balya buli bwoshe bushuka butunda mu lihya. ⁸ Cho munapande kuli tandela ma Sabata amyaka itanu naibali, chije chikapwa, bithimbu bya kupwa bitanu na bibali bya myaka, cho mangana bikapwe bi Sabata bitanu nabibali bya myaka, kuakumbathana kupwa makumi awana na myaka itanu naiwana. ⁹ cho munapande kutambakana manene mutolombita kwoshe kwoshe alitangwa lya mulikumi mungonde ya muchitanu naibali. Alitangwa lyakupanga byafwika abubi munapande kutambakana mutolombita mukati ka lifuti lyoshe. ¹⁰ Munapande kuthzilika mwaka wakupwitha likumi na atanu kuli Njambi na kwambulula chiyulo mukati ka lifuti kuli boshe bayoyelamo. Cho ukapwe Yubili yeni, muje bitanga na bindungo binapande kubilwitha kumuyati wabyo. ¹¹ Cho mwaka wakupwitha makumi atanu akapwe wakuthzila kweni. Kethi mukakune nameme kulinga mwakulithzibathanena mwakutejela. Lyeni choshocho chalishokela chikecho babenya, na kukungulula mikolobothzi ije ishoka muje munajeneka kuhela binyu. ¹² Omuoni inapu Yubili, eyi ipwa yakuthzila kweni. Munapande kulya bushuka uje buli nakulishokela bukebwo babenya kutunda mu lihya. ¹³ Aliwoshe napande kwiluka kubitenga byendi a mwaka ou wa Yubili. ¹⁴ Umona ngwe mulandetha libu kuli wakumbweli nameme kulanda libu kutunda kuli wakumbweli, kumwapandele kulikwitha nameme kulibihitha umo namukwabo. ¹⁵ Umona ngwe ulanda libu kutunda kuli wakumbweli, tala amyaka wa bimbuto buje bikajenenewa kwetetha mu Yubili ikwabo. Na wakumbweli wobe alandetha libu nendi napande kutalao lalo. ¹⁶ Amakya yayingi manene athinoni Yubili ikwabo ikakele ndando ya libu, na natheteko yaindende ya myaka athinoni Yubili ikwabo ikatepulule ndando, mwafwa theteko ya byakuhela bije libu likatunditha kuli babenya baololo ya lyeseketha kutheteko ya myaka thimbu kanda Yubili ikwabo. ¹⁷ Kumwapandele kulikwitha nameme kulibihitha umo namukwabo; olojo, munapande kulemetha Njambi yeni, mwafwa yange Yehoba Njambi yeni. ¹⁸ Nameme ngocho munapande kwononokela bilinga byange, nyungeni mathiko ange, na kuambata. Cho mukayoya mulifuti cha kwonowa lyoba. ¹⁹ Cho lifuti likema bushuka, cho mukalya nakukuta na kuyoyela muje chakwonowa lyoba. ²⁰ Amo wendeka ngwobe, "Bika tukalya athimbu ya mwaka wa Sabata? "Kenga, kutwatha kukuna na kuteja mbuto. ²¹ Njikambeya kukwithula change kwija ali yeni mu mwaka wa muchitanu naumo, cho njikatuhula kuteja chakupwamo amyaka itatu. ²² Cho mukakuna mu mwaka wa muchitanu nautatu cho mukatwalelela na kulya kutunda kuli bije mwatuhuthile ku myaka yahanima na kulya chije chimwanyungile. Kwetetha ku mwaka wa muchitanu nauwana uje ukeja, mukapwa na kulya kutunda kuli bije bimwanyungile myaka yakunima. ²³ Cho libu kulyapandele kulilandetha kuli babenya ba ololo myaka yoshe, mafwa libu lapwa lyange. Yeni boshe munapu mumetendinda na banu bakakathimbu kakandondo a libu lyange. ²⁴ Munapande kutalethetha mwamubwa buthunga bwa bwobwoke bwa lije libu mwatondele, munapande kutabetha libu kulilanda lalo kubinanga bije bimwalandeleko. ²⁵ Umona ngwe bakweni baka Isalela bakapwa bakaku utwa cho amulonga wangocho wakulandetha bitenga byendi bimo, cho kabushoko kendi waamuyehi napande kwija na kwobola ndolome yendi kuli bije bya nalandetha. ²⁶ Umona ngwe munu kethi nakabushoko wakubikwata byendi, oloni ngwe nafuku cho ali nanthzili ya kuli kula ikeye babenya, ²⁷ cho amo alaba myaka ibalandethelamo libu nakufweta thupo kuli munu uje yalandetheleko. Cho amo akeluka ku bikwata byendi. ²⁸ Oloni ngwe katha kwilwitha libu lyendi ikeye babenya, cho libu lyana landetha likathala mumaboko auje walandele na kwetetha mu mwaka wa kuthzila. Amwaka wakuthzila, cho libu bakalilwitha kuli uje munu walilandethele, nauje wakulibanga akeluka kubikwata byendi. ²⁹ Umona ngwe munu alandetha njubo ya munganda ibanatungu nakuiithzengulwitha na mihanda, cho amo ailandulula mu mwaka ou bene anima ya kuilandetha. Amwaka wakushula woshe akakala na bwobwoke. ³⁰ Umona ngwe njubo kubaiyobwele mu mwaka ou wakushula, cho njubo ya munganda ibanatungu na kuthzengulwitha na mihanda ikapwa chikwata cha myaka na myaka kuli uje nailanda na batekulwila bendi. Kuiikapu kwiihilwitha mu mwaka wa chilika. ³¹ Oloni manjubo ya mwimbo aje kubathzengulwithile mihanda bakakengetha kupwa ngwe mahya alifuti. Amo bakayobola, naku elwitha athimbu ya mwaka wa chilika cha Yubili. ³² Nameme ngocho, manjubo ali naba Lebitiku mubinganda byabo bakayobola ali thimbu yili yoshe. ³³ Umona ngwe umo muli ba Lebitiku kayobwele njubo yalandethele, cho njubo ije yibayalendethele munganda muje muyatumbamena inapande kuiilwitha mu mwaka wa chilika cha Yubili, mwafwa binjubo ya binganda byaba Levitiku byapwa bikwata bya banu ba Isalela. ³⁴ Oloni mahya anathzenguluka ku binganda byabo kubatha kualandetha mwafwa binapu bikwata bya ba Lebitiku bya myaka na myaka. ³⁵ Umona ngwe mukweni wa mulifuti apwa wa kuhutwa, cho onowa kuli kwatha ikeye babenya, cho munapande kumukwatha ngwe muje mumukwathela uje litandinda nameme uli woshe ali nakuyoya ngwe mungethzi akati keni. ³⁶ Kethi mumwakeleo thotho nameme muwaneo kathetho kamo kutunda kuli ikeye mungila ili yoshe, oloni thingimikeni Njambi yeni mangana ndolome yeni akale na kuyoya neni. ³⁷ Kumwapandele kumwana likongo lya bimbongo nakumwakelao thotho nameme kumilandetha bya kulya byeni mangana muwaneneo thotho embwe. ³⁸ Yange Yehoba Njambi, uje wamitundithile mulifuti lya Ingitu, mangana ngwange njimyane lifuti lya Kanana, cho mangana nji kapwe Njambi yeni. ³⁹ Umona ngwe mukweni wamulifuti apwa wakuutwa nakulilandetha ikeye babenya kuli yeni, kumwapandele kumupangetha ngwe ndungo. ⁴⁰ Mupangetheni ngwe ngamba waku kumuna. Napande kupwa ngwe umo uje najondomana hakuyoya neni. Akakala neni ndoo noho mumwaka wa chilika cha Yubili. ⁴¹ Cho akaya kutunda kuli yeni, ikeye nabana bendi amolika nendi, cho bakeluka ku chikota chabo na kubikwata bya ishe. ⁴² Omo banapu bingamba bange baje njanenele kutunda kulifuti lya Ingitu. Kubakabalandetha kupwa ngwe bindungo embwe. ⁴³ Kumwapandele kubayula ali bakebo nabukalu, oloni munapande kuthingimika Njambi. ⁴⁴ Ngwe omo bindungo bobe babanalume naba babanakathzi, baje bamukatambula kutunda mu mafuti aje amithzenguluka, amo mukatandako bindungo kutunda kuli akeo. ⁴⁵ Mwatha lalo kulanda bindungo kutunda kuli metandinda baje bakele nakuyoya akati keni na kubikota byabo baje bali neni, baje banathemukila mu lifuti lyeni, cho bamo bakapwa bikwata byeni. ⁴⁶ Cho amo mukatholola bindungo bachifwa echi kupwa bufuko bwa bana beni anima yeni, nakukwata kupwa ngwe chikwata, na kuba pwitha bindungo mukuyoya chabo cha myaka yoshe, oloni kupwapandele kuyula ali bandolome beni akati ka banu ba Isalela nabukalu. ⁴⁷ Umona ngwe litandinda nameme woshowo ayoya chakujondomana neni napu wakufuka, cho umona ngwe umo wamuli bakweni baka Isalela napu wakuutwa nakalilandetha ikeye babenya kuli uje litandinda, nameme kuli umo wakuchikota cha kuli litandinda, ⁴⁸ anima yakulanda bakweni baka Isalela, amo baka mwilwitha. Umo mu chithemwa chabo amo akamuyobola. ⁴⁹ Omo napu ngwe inanu yendi, nameme mwana wa munalume wa inanu yendi, uje amutobola, nameme uliwoshe uje ali muchikota chendi. Nameme, umona ngwe napu wakufuka, natha kuliyobola ikeye babenya. ⁵⁰ Napande kulithzibathana na munu wamulandele; banapande kulaba myaka kutunda mu mwaka walilandethelelemo ikeye babenya kuli mukakulanda ndoo noho mwaka wachilika cha Yubili. Cho ndando ya bwoboke bwendi inapande kuiitambula mukuiinyunga amo natheteko yakufweta kuli ngamba wa kukumuna, mu myaka yakulaba yanapandele kutwalelela kupangela uje wamulandele. ⁵¹ Umona ngwe kuchili myaka yaingi ndoo noho mwaka wa chilika cha Yubili, cho napande kwilwithako ndando ya bimbongo yabwoboke wendi buje buli mu chela cha ije myaka. ⁵² Umona ngwe kuli lika myaka yaindondo ya kuchilika cha myaka ya Yubili, cho napande kulithzibathana na wamulandele na kulaba myaka yathalao thimbu kanda mwaka wa chilika cha Yubili, cho napande kufwetela bwoboke bwendi mukunyunga kulaba cha myaka ⁵³ Munapande kumupwitha kupwa ngwe munu uje ibana kumuna amwaka. Kumwapandele kumupangetha mukukaluwa. ⁵⁴ Umona ngwe kayobokele kuli ebi byuma, ho napande kupanga ndo noho mwaka wa chilika cha Yubili, ikeye nabana bendi bali nabo. ⁵⁵ Kuli yange banu bamu Isalela bapwa bingamba. Bapwa bingamba bange baje njatundithile mu lifuti lya Ingitu. Yange Shukulu Njambi yeni.'''