¹ Njambi wendekele kuli Mosesa , ngwendi , " ² Kambeya banu ba mu Isalela ba kunenele mathzi amabwa a ku kamuna ku mibinyu a ku pangetha mundeya , mangana itwaleleleo kumunika . ³ Anja ya libamba lili alutwe lwa chikasha cha mashiko chili mu tendeya chiwano , Aloni napande thimbu yoshe , kushanguka na chingwethzi kweta na mutondo ,kushukumitha manongo ali ku mesho a Shukulu . Eli likapwa lishiko lya ku kalelela thimbu yoshe mu biyhemwinina bya banu bobe . ⁴ Kapuisitu wa mukulunu napande biyhimbu byoshe a shukumithe bindeya bili alutwe lwa Shukulu , bindeya ebi bili na mathanda a ngolinde ya kujela . ⁵ Wapande kwambata bunga bwa ku theneta bwa bubwa cho wocheo mikasha likumi na ibali . Mwapande kukala bya bulikumi bya efani mu mukasha na mukasha . ⁶ Cho uyake mu mikana ibali , mikasha itanu na umo mu mukana , a mesa ya ngolinde ya kujela ili kumesho a Shukulu . ⁷ Wapande kwaka isense a mukana umo na umo wa mikasha ngwe mulambu . Eyi isense ba ka yenyekele Shukulu . ⁸ A litangwa lya Sabsta lyoshe kapulisitu wa mukulunu napande kwaka makende kumesho a Shukulukwimanenako banu ba mu Isalela , ngwe chimwetho cha chikumiyo cha myaka yoshe . ⁹ Obu bwana bukapwa bwa Aloni na baana bendi ba banalume , cho na kulila mumwela wa kujela , omwo inapu mbathzubwila ya kutunda ku mabwana a kutuya a kuli Shukulu. " ¹⁰ Cho chasholokele echi kwakele mwana wa munalume muna ka Isalela wa munakathzi , ou ishe wa pwile ka Injipiti , waile mukati ka banu ba mu Isalela . Ou mwana wa munalume wa kuthemuka muli ka Isalela wa munakathzi wa lwile wa munalume wa ka Isalela muje mu chilombo . ¹¹ Uje mwana wa munalume wa ku thema kuli ka Isalela wa munakathzi wa shawile lithzina lya Shukulu na kuthinga Njambi , cho ba munenele kuli Mosesa . Lithzina lya ina lyapwile Shelomi , muna Ndibili wa munakathzi , wa ku muyati wa Ndani. ¹² Ba mwakele mu kamenga noo ibenya Shukulu a ba leka bya ku mulinga . ¹³ Cho Shukulu wendekele kuli Mosesa , ngwendi , ¹⁴ " Mutunditheni mu chilombo ou munalume na thingile Njambi . Boshe ba muthzibile banapande ku kambeka maboko a mutwe wendi , cho oni mbunga yoshe yapande ku mwasha mamanya . ¹⁵ Wapande kulumbununa ku banu ba mu Isalela na kwendeka ngwobe , ' Woshe athinga Njambi yendi napande kulyambatela bubi bwendi . ¹⁶ Woshe ashaula lithzina lya Shukulu chili bene napande ku muthsiya . Chili bene mbunga yoshe ikunguluka yapande kumwasha mamanya, apwe litandinda nambe mundambo wa kuthemukila mu Isalela. Ali woshe a shaula a lithzina lya Shukulu , napande kumuthsiya , ¹⁷ Woshe athsiya mukwabo munu , chili bene napande kuthsiyiwa . ¹⁸ Ali woshe athsiya chimuna cha mukwabo , napande ku mwingithilamo weka , mwonyo ku mwonyo . ¹⁹ Ali woshe munu abulumuna mukwabo , chilingiwe kuli ikeye ngechi mwana chilingila mukwabo : ²⁰ Kupokola na kupokola , lisho na lisho ,liyo na liyo . Nge omu mwana betwetha mukwabo munu, cho chapande kulingiwa kuli ikeye. ²¹ Ali woshe athsiya kathitu napande ku mwingitha , cho ali woshe athsiya munu naikeye napande kumuthsiya . ²² Munapande kukala na lishiko limo lika kuboshe maitandinda na banu ba muIsalela , mwafwa yange Shukulu Njambi yeni . '" ²³ Omo Mosesa wendekele kuli banu ba Isalela , cho banu bambatele uje munu na ku mutuwitha anja ya chilombo , uje wa thingile Shukulu . Ba muthsiyile na mamanya . Banu ba mu Isalela ba pangethele lishiko lya Shukulu kwitila muli Mosesa .