¹ Yehoba wendekele kuli Mosesa, ngwendi, ² "Endeka ku chikungulwilo choshe cha banu ba Isalela nakwendeka ngwobe, 'Mwapande kuthzila, mwafwa yange Yehoba Njambi yeni njathzila. ³ Munu woshe napande kulemetha baina na baishe, cho mwapande kunyunga Sabata yange. Yange Yehoba Njambi yeni. ⁴ Kethi mutengulukile kutumonya twangocho, nameme kulitengela tulunga twa bikubo. Yange Yehoba Njambi yeni. ⁵ Omwo mukana bwana bwa mulambu wa kulinunga kuli Yehoba, mwapande kubwana mangana bakamitabele. ⁶ Bwapande kubulya olyo bene litangwa mu bwana, nameme halikaki. Oshe bimo bikathalaho kweta litangwa lya muchitatu, bwapande kubwenyeka na tuya. ⁷ Oshe ngwe munabili byoshe halitangwa lya muchitatu, inapu thitu yakujeneka kujela; Kuyapandele kuitabela, ⁸ cho owo woshe ailya napande kwambata mulonga wendi mwafwa nalithzilulula echi cha kuthzila kuli Yehoba, cho owo munu napande kumutunditha ku banu bendi. ⁹ Omwo mukateja kuteja cha lifuti lyeni, kumwapandele kumanethelela mu bimbango bya lihya, nameme kumanethelela kukungulula bije bimunateje. ¹⁰ Kumwapandele kukungulula ma ngilepu oshe kutunda mu lihya, nameme kukungulula ma ngilepu awila hathi mu lihya. Mwapande kuwathethzela tuhutu na metandinda. Yange Yehoba Njambi yeni. ¹¹ Kethi mukaibe, Kethi mukakwithe. Kethi mukalilenye na bakweni. ¹² Kethi mukalithingile ha lithzina lyange chamakuli nakutambula lithzina lya Njambi yeni. Yange Yehoba. ¹³ Kethi mukalyatelele mukweni nameme kumwibila. Fweto ya ngamba wakukumuna kuyapandele kutumbama nobe buthsiki bwoshe kweta ku mutondo embwe. ¹⁴ Kethi mukathinge kashendamatwi nambe kwakela chimbundi kapuputwa. Olojo mwapande kuthziba lyoba Njambi yeni. Yange Yehoha. ¹⁵ Kethi mukanenethe kubatula chamakuli. Kethi mukasholole kulyapula kuli munu hamulonga wa kupwa kahutu, cho kethi mukasholole kulyapula kuli munu ha mulonga wa kulema chendi embwe. Olojo, batwileni mukweni mwakuthzangama. ¹⁶ Kethi mukende nakwambulula makuli mukati ka banu beni, oloni theteleni kukinga mwonyo wa mukweni. Yange Yehoba. ¹⁷ Kethi mukathzindile ndolome yeni mumbunge. Nabuthunga woshe mwapande kubyanetha mukweni mangana kethi mukalipangele bubi ha mulonga wendi. ¹⁸ Kethi mukelwithile bubi nameme kupwa na chitela hali umo mubanu beni, oloni thzemeni mukweni ngwe omwo mwalithzema yeni babenya. Yange Yehoba. ¹⁹ Mwapande kunyunga kukambeya change. Kethi muketheke kulitha bimuna beni hamo na miyati yeka ya tuthitu. Kethi mukapandathane miyati yeka ya mbuto omwo mukapwa nakukuna lihya lyeni. Kethi mukathzale buthzalo bubanapanga na miyati yeka ya kukumbathana. ²⁰ Ou woshe akalala na ndungo ou banakulahetha kuli munalume, oloni kanda bamukule nambe kumwechela, napande kumushitika. Kubapandele kumuthsiya ha mulonga wa kujeneka kukutunuka. ²¹ Owo munalume napande kunena bwana bwendi bwa mulonga kuli Yehoba ku bukobelelo bwa tende ya kuliwanena— maanga wa nkomba kupwa mulambu wa mulonga. ²² Cho kapilisitu akapanga chilika cha kulijeletha chendi na maanga wa nkomba wa mulambu wa mulonga kuli Yehoba, ha bubi buje bwanabulumuna bakabukonekela. ²³ Omwo mukaija mu lifuti cho mukuna miyati yoshe ya miti ya kulya, cho mwapande kwambata bushuka bwoshe bwimako kupwa bwakuthzilika kulya. Obu bushuka bwapande kubuthzilika kuli yeni ha myaka itatu. Kubwapandele kubulya. ²⁴ Oloni mu mwaka wabuwana bushuka bwoshe bukapwa bwa kuthzila, mulambu wa kulemetha kuli Yehoba. ²⁵ Mu mwaka wa butanu munatha kulya obu bushuka, hanima ya kubandamena mangana ije miti ikathe kwima bwabungi. Yange Yehoba Njambi yobe. ²⁶ Kethi mukalye thitu ili yoshe na maninga muikeyo. Kethi mukehule bakakutaha ha byuma bya kulutwe, cho kethi mukathetele kwolola bakweni na thzili ya kujwala embwe. ²⁷ Kumukathzengulwitha bimbango bya bing'ambu mumikulo ya mitwe yeni nameme kuteula bishongo bya minjethzi yeni embwe. ²⁸ Kethi mukabatwile mibila yeni hali bathsi nameme kwaka bing'ato ha mibila yeni. Yange Yehoba. ²⁹ Kethi mukashaule muneni wa munakathzi ha kumupwitha chikwithzi, ngochongocho lifuti likawila mu bukwithzi cho lifuti likashula na bibi. ³⁰ Mwapande kunyunga masabata ange na kubumbika muje mwakuthzila mwamu tabanakele yange. Yange Yehoba. ³¹ Kethi mukatengulukile kuli baje bakendeka na bathsi nameme minthzinhzime. Kethi mukabatundithemo, ngochongocho bakamibihitha. Yange Yehoba Njambi yeni. ³² Mwapande kwimana ku mesho a banu ba mitwe ya bwele na kubumbika kakulakathzi aliho. Munapande kuthziba lyoba Njambi yeni. Yange Yehoba. ³³ Oshe ngwe litandinda ayoyela mukati keni mu lifuti lyeni, kumwapandele kumulinga cha chibi embwe. ³⁴ Owo litandinda akayoyela muli yeni napande kupwa kuli yeni nge mu Isalela nathemukila muli yeni ou akayoyo neni, cho mwapande kumuthzema ngwe yeni babenya, mwafwa mwapwile binthzinda mu lifuti lya Ingitu. Yange Yehoba Njambi yeni. ³⁵ Kethi mukapangethe theteko ya makuli ha kupethzeletha kwama, kulema, nameme kutuma. ³⁶ Mwapande kupangetha chipethzeletho lika, kulema lika, lilonga lika, na nganja. Yange Yehoba Njambi yeni, ou wamitundithile mu lifuti lya Ingitu. ³⁷ Mwapande kutabela bilongetha byange byoshe na mashiko ange oshe, nakulingamo. Yange Yehoba.'''