¹ Yehoba wendekele kuli Mosesa, ngwendi, ² "Endeka kuli banu ba Isalela ngwobe, 'Munu ali woshe mukati ka banu ba Isalela, nameme litandinda ali woshe ou akayoyela mu Isalela ou akana umo wa bana bendi kuli Moleki, napande bene kumuthsiya. Banu bamu lifuti bapande kumwasha namamanya. ³ Nange lalo njikakenga chihanga change kuli owo munu cho njikamutunditha mukati ka banu bendi mwafwa naana munendi kuli Moleki, mangana abihithe mwela wange wakuthzila na kushaula lithzina lyange lya kuthzila. ⁴ Oshe ngwe banu ba mulifuti bakafwika mesho abo hali owo munu omwo akana munendi umo kuli Moleki, oshe kubamuthsiyi, ⁵ cho yange babenya njikakenga chihanga change kuli owo munu hamo na muyati wendi, cho njikamubatulako cho munu woshe owo akalyaka mu bukwithzi mangana akehe buthendo na Moleki. ⁶ Omwo munu akatengulukila kuli baje bakendeka na bathsi, nameme kuli baje bakendeka na minthzinthzime mangana bakalinge bukwithzi nabo, njikakenga chihanga change kuli owo munu; njikamubatula kutunda mukati ka banu bendi. ⁷ Ngachije lijeletheni yeni babenya nakupwa bakuthzila, mwafwa yange Yehoba Njambi yeni. ⁸ Mwapande kunyunga kukambeya change na kuchipanga. Yange Yehoba ou akamyangula kupwa bakuthzila. ⁹ Owo woshe akathingi baishe nambe baina napande bene kumuthsiya. Nathingi baishe nambe baina, cho nathsi na mulonga wakutela kuthsa. ¹⁰ Munalume ou alala munakathzi wa mukwabo, chinapu ngwe, owo woshe alala na munakathzi wa munu alyata nendi— owo munalume nauje munakathzi boshe bapande bene kubathsiya. ¹¹ Oshe munalume alala na munakathzi wa ishe, nashulula bushelengwa bwa ishe. Boshe owo mwana hamo na munakathzi waishe bapande bene kubathsiya. Maninga abo apwa hali babenya. ¹² Oshe munalume alala na inamweno, boshe bapande bene kubathsiya. Banathsi na mulonga cho banatela kuthsa. Banalingi kubika. Banathsi na mulonga cho banatela kuthsa. ¹³ Oshe munalume alala na mukwabo munalume, ngwe munakathzi, boshe mwabo banapanga echi chachibi. Bapande bene kubathsiya. Banathsi na mulonga cho batela kuthsa. ¹⁴ Oshe munalume ambata munakathzi wendi, ebi binapu bibi. Bapande kubenyeka, likeye na banakathzi boshe, mangana kukelike kupwa bibi mukati keni. ¹⁵ Oshe munalume alala na kathitu, napande bene kumuthsiya, cho munapande kuthsiya uje kathitu. ¹⁶ Oshe munakathzi akaya kuli kathitu ali woshe na kulala nendi, mwapande kuthsiya owo munakathzi nowo kathitu. Bapande bene kubathsiya. Bali namulonga cho batela kuthsa. ¹⁷ Oshe munalume ambata ndokathzi yendi, mwana wa munakathzi wa ishe nameme mwana wa munakathzi wa ina, cho afukula bushelewa bwendi, nakumona busheleshele bwendi, chinapu chuma cha shwamwa, Bapande kubabatulako ku mesho a bana ba banu babo. Nafukula bushelengwa bwa ndokathzi yendi, cho napande kwambata mulonga wendi. ¹⁸ Oshe munalume akalala na munakathzi muthimbu yaku ngonde yendi nakufukula bushelengwa bwendi, nafukula kwita chendi, lithima lya maninga endi. Munalume na munakathzi boshe bapande kubabatulako ku banu babo. ¹⁹ Kuwapandele kushulula bushelengwa bwa shongo ya nyoko nambe ndokathzi yaba isho, ushaula naanga yobe. Wapande kwambata mulonga wobe. ²⁰ Oshe munalume alala na teng'athzi yendi, nathzibitha shwamwa inanu yendi. Bapwa na thzili ha bubi bwabo, cho bukathsa chakujeneka bana. ²¹ Oshe munalume ambata munakathzi wa ndolome yendi thimbu achili na mwonyo, chinapu kushawitha. Nathzibitha shwamwa ndolome yendi, cho kubana babo njikatundithako byuma byoshe banapande kuthwana kutunda ku bithemi babo. ²² Ngachije mwapande kunyunga mashiko na bilongetha byange byoshe; mwapande kubitabela mangana lifuti omu njinakumitwala na kuyoyela bakajeneke kumibyana. ²³ Kumwapandele kwenda mu bithemwa bya mafuti owo njikakutunditha kuli yeni, mafwa banalingi byuma byoshe ebi, cho njinababyanetha. ²⁴ Njendekele kuli yobe ngwange, "Ukathwana lifuti lyabo; Njikalyana kuli yobe kulitumbama, lifuti linakwita mashwe na buki. Yange Yehoba Njambi yobe, ou nakawandununa kutunda ku banu beka. ²⁵ Ngachijeni wapande kushakula hakati ka tuthitu bakujela naba bakujwala, na hakati ka tuthzila bakujwala naba bakujwela. Kuwapandele kulibihitha yobe babenya na tuthitu bakujwala nameme tuthzila nameme na kathitu woshe ou akakalaba hathi, ou njinandununa kupwa wakujwala kuli yobe. ²⁶ Wapande kuthzila, mwafwa yange , Yehoba njapwa wa kuthzila, cho njinakutunditha ku banu bakwabo, mwafwa yobe wapwa wange. ²⁷ Munalume nambe munakathzi ou akendeka na bathsi nameme ou akendeka na minthzinthzime napande bene kumuthsiya. Banu bapande kubasha namamanya. Bali na mulonga cho batela kuthsa."'