¹ Yehoba wendeke kuli Mosesa ngwendi, ² "Endeka kuli banu ba Isalela nakubaleka ngwobe, 'Yange Yehoba Njambi yeni. ³ Kumwapandele kupanga byuma bije banu bakapanga mu Ingitu, omu mwayoyelelele kunima.Kumwapandele kupanga byuma bije banu bakapanga mu Kanana, lifuti eli njili nakumitwala. Kethi kukabengeye mwaya hithemwa chabo. ⁴ Mwapande kupanga mwaya mashiko ange, cho mwapande kunyunga bikambiyo byange, mangana mwendele mu akewo, mwafwa yange Yehoba Njambi yeni. ⁵ Ngachije mwapande kunyunga bingila na mashiko ange. Oshe ngwe munu abitabela, akayoya hamulonga wabyo. Yange Yehoba. ⁶ Kethi ukashwene nakushulula bushelengwa bwa kabushoko kobe, Yange Yehoba. ⁷ Kethi ukashulule bushelengwa bwa nyoko; napu nyoko, kuwapandele kumona bushelengwa bwendi. ⁸ Kethi ukashulule bushelengwa bwa munakathzi wa isho; bunapu bushelengwa bwa isho. ⁹ Kethi ukashulule bushelengwa bwa ndokathzi yobe, apwa muna isho nameme muna nyoko wamunakathzi, apwe wakolelele hembo lyeni nameme ku mwela waha lyala. ¹⁰ Kethi ukashulule bushelengwa bwa muna munobe wamunalume wamunakathzi nameme muna munobe wamunakathzi, mwafwa bushelengwa bwabo bunapu boibe ibenya. ¹¹ Kethi ukashulule bushelengwa bwa muna munakathzi wa isho wamunakathzi, ou nakolela mu naanga ya isho, hakupwa napu ndokathzi yobe. ¹² Kethi ukashulule bushelengwa bwa ndokathzi ya isho; napu kabushoko ka isho. ¹³ Kethi ukashulule bushelengwa bwa ndokathzi ya nyoko, napu kabushoko ka nyoko. ¹⁴ Kethi ukashulule bushelengwa bwa ndolome wa isho, mukemo, kuwapandele kushwana kuli munakathzi wendi; napu teng'athzi yobe. ¹⁶ Kethi ukashulule bushelengwa bwa nyokomweno; napu munakathzi wa munobe; kuwapandele kufukula bushelengwa bwendi. ¹⁵ Kethi ukashulule bshelengwa bwa ndolome yobe; bunapu bushelengwa bwa ndolome yobe. ¹⁷ Kethi ukashulule bushelengwa bwa munakathzi nobu bwa munendi wamunakathzi; cho kuwapandele kwambata muna munendi wamunalume kupwa munakathzi nameme muna munendi wamunakthzi kupwa munakzthi nakukenga bushelengwa bwendi; banapu babushoko; cho bunapu bubi. ¹⁸ Kuwapandele kushombola shongo ya munakathzi wobe kupwa munakathzi wobe wamuchibali nakukenga bushelengwa bwendi thimbu munakathzi wobe achili na mwonyo. ¹⁹ Kethi ukashwene kuli munakathzi na kukenga bushelengwa bwendi muthimbu ya kujeneka kujela chendi. ²⁰ Kethi ukakothe na munakathzi wa mukweni na kulibihitha obe ibenya mungilei. ²¹ Kuwapandele kwecha munobe umo kumwaka mutuhya, mangana ukabakombelele kuli Moleki, mwafwa kuwapandele kushawitha lithzina lya Njambi yobe. Yange Yehoba. ²² Kethi ukalale na bakweni banalume ngwe munakathzi; chinapu chithzila. ²³ Kethi ukalale na kathitu na kulibihitha yobe ibenya nendi. Naumo wahi munakathzi akalyana lyabenya kuli kathitu nakulala nendi; bunapu bunyengwe. ²⁴ Kethi mukalibihithe eni babenya mubingila bili byoshe ebi, mwafwa mubingilebi byoshe mukabihitha mafuti, mafuti awa njikatambula kutunda kuli yeni. ²⁵ Lifuti bethzile nakulibihitha, cho njanyanyamethele bibi byabo, cho lifuti lya tuhwithile batungithi balyo. ²⁶ Yobe, ngachije, wapande kunyunga bikambeyo na bingila byange, cho kuwapandele kupanga byuma ebi byachithzila, chikale kuli ba Isalela banathemukilamo nameme ngenthzi ou akayoyela mukati keni. ²⁷ Mwafwa obu bukebo bubi bubanabulumuna banu ba mulifuti, baje bayoyelele kuno thimbu kanda yeni, cho lifuti oni banalibihitha. ²⁸ Ngachije nyanyameni kutewa lifuti likamibyana lalo hanima yakulibihitha, ngwe muje lyabanene banu bakelemo thimbu kanda yeni. ²⁹ Ou woshe akapanga ebi byuma bya chithzila, owo munu akapanga ngocho bakamutunditha ku banu bendi. ³⁰ Ngachije mwapande kunyunga kukambeya change kwilika kulinga bithemwa ebi bya chithzila ebi bakele nakulinga thimbu kanda yeni, mangana kethi mukalibihithe yeni babenya nabikebyo. Yange Yehoba Njambi yeni"