¹ Yehoba wendekele kuli Mosesa, ngwendi, ² "Eli lipwa lishiko lya munu wa mushongo halitangwa lya kujelethewa chendi. Napande kumunena kuli kapilisitu. ³ Kapilisitu akatuhuka hanja ya chilombo nakumwilula uje munu athe kukamona ngwe uje mushongo waha chikonde wakulitambwitha unakanyuka. ⁴ Cho kapilisitu akakambeya ngwendi ou apwa ha kujelethewa napande kwambata bya mwonyo bibali, tuthzila bakujela, biti bya kendale, mukole wakubenguluka, na chishamo cha lusope. ⁵ Kapilisitu akamukambeya kuthsiya kathzila umo ha mema akutonola ali mu ndeho ya buma. ⁶ Kapilisitu oni akambata kathzila wa mwonyo na chiti cha kendale, nauje mukole wa kubenguluka na chishamo cha lusope, cho byuma byoshe ebi akabimbwitika, kwakaho nauje kathzila wa mwonyo, mu maninga akathzila uje bana banathsiyilile ha mema akutonola. ⁷ Cho kapilisitu akashamwina awa mema hali ou munu ashaka kumujeletha kutunda ku mushongo katanu na kabali, cho kapilisitu akamuthzimbula kupwa wa kujela. Cho kapilisitu akechela uje kathzila wa mwonyo kuya mushwata. ⁸ Uje munu bali na kujeletha akakusha buthzalo bwendi, kuteula bing'ambu byendi byoshe, na kutana mu mema, choni apwa wa kujela. Hanima yobyo napande kukobela mu chilombo, oloni akayoyela hanja ya tende yendi ha matangwa atanu na abali. ⁹ Halitangwa lya muchitanu na abali napande kuteula bing'ambu byendi byoshe bya kumutwe, cho napande kutenda lalo munjethzi na bing'beyo byendi byoshe, cho napande kukusha buthzalo bwendi na kujwela mu mema; cho akapwa wa kujela. ¹⁰ Halitangwa lyamu chitanu na atatu napande kutwala bimaanga babali ba chinalume ba kwilika katenga, maanga umo wa chinakathzi wa mwaka umo wakujeneka katenga, butatu bwa likumi lya elefa ya bunga bwa bubwa bwa kukumbathana na mathzi kupwa mulambu wa mbuto, na mutumwa umo wa mathzi. ¹¹ Kapilisitu ou akamujeletha akemika ou munu bashaka kujeletha, hamo nabije byuma, kuli Yehoba kubukobelelo bwa tende ya kuliwanena. ¹² Kapilisitu akambata maanga umo wa chinalume na kulambula kupwa mulambu wa mulonga, hamo na mutumwa wa mathzi; akabimwetha kupwa mulambu waku mwetha kuli Yehoba. ¹³ Napande kuthsiya uje maanga wa chinalume mu mwela muje mubaka thsiyila milambu ya bubi na milambu ya kulumba, mu mwela wa tabanakele, mwafwa mulambu wa bubi wapwa wa kapilisitu, hamo ngwe mulambu wa mulonga, mwafwa unapu wa kuthzila manene. ¹⁴ Kapilisitu akambata maninga amo a mulambu wa mulonga nakuwaka hashongo ya litwi lya chilyo lya munu ou bajeletha, ha munye wathsina kuliboko lya chilyo, naha munye wathsina wa kumwanja wa chilyo. ¹⁵ Cho kapilisitu akambata mutumwa wa mathzi na kwitila mu liboko lyendi lya chimoshwe, ¹⁶ nakumbwitika munye wendi waku chilyo mu mathzi aje ali mu liboko lyendi lya chimoshwe, na kushamwina mathzi amo na munye wendi katanu na kabali kuli Yehoba. ¹⁷ Kapilisitu akaka mathzi oshe akulitulaho mu liboko lyendi ha shongo ya litwi lya munu ou ajelethewa, ha munye wa liboko lya kufwila lya chilyo, naha munye wathsina waku mwanja wendi wa chilyo. Napande kwaka mathzi ha kamwa ya maninga akutunda ku mulambu wa mulonga. ¹⁸ Cho ku mathzi anathalaho awa ali mu liboko lya kapilisitu, akawaka ha mutwe wa munu ou ashaka kumujeletha, cho kapilisitu amupangela chilika cha kulijeletha ku mesho a Yehoba. ¹⁹ Cho kapilisitu akana mulambu wa bubi na kumupangela chilika cha kulijeletha chendi ou ashaka kumujeletha ha mulonga wa kwilika kujela chendi, cho hanima akathsiya mulambu wa mulonga. ²⁰ Cho kapilisitu akalambula mulambu wa kulumba nou wa mbuto ha mutula. Kapilisitu akapanga chilika cha kujeletha uje munu, cho akapwa wa kujela. ²¹ Nambe ngocho, oshe munu kahutu cho kathele kuwana ei milambu, cho natha kutwala maanga wa chinalume umo kupwa mulambu wa mulonga wa kumwetha, kupanga chilika cha kujeletha babenya, na kilo imo ya bunga bwabubwa bwa kupandathana na mathzi kupwa bwana bya mbuto, na lita ya mathzi, ²² hamo na tutela babali nameme bana ba liyembe babali, aba banatha kuwana; kathila umo akapwa wa bwana bwa bubi mukwabo wa bwana bwa kulumba. ²³ Halitangwa lyamu chitanu na atatu napande kubanena kuli kapilisitu bya kulijeletha, kubukobelelo bwa tende ya kuliwanena, ku mesho Yehoba. ²⁴ Kapilisitu akatwala maanga kupwa bwana, hamo na lita ya mathzi a olibe, cho akabijundula helu hakubyana kuli Yehoba. ²⁵ Akathsiya maanga wa mulambu wa mulonga, nakwambata maninga amo a mulambu wa mulonga nakubyaka hashongo ya litwi lya kuchilyo lyou apwa wakujeletha, ku munye wathsina ya liboko lyendi lya chilyo na ku munye wathsina waku mwanja wendi. ²⁶ Cho kapilisitu aketila mathzi amo mu liboko lyendi babenya lya chimoshwe, ²⁷ cho akashamwina mathzi amo aje ali mu liboko lyendi lya chimoshwe katanu na kabali kuli Yehoba na munye wa ku chilyo. ²⁸ Kapilisitu akaka mathzi amo ali muliboko lyendi ha shongo ya litwi lya kuchilyo lyou ajelethewa, ha munye wathsina wa kuliboko lyendi lya chilyo, na kumunye wendi wathsina wa kumwanja wendi wa chilyo, myela imolika ei akele maninga a mulambu wa mulonga. ²⁹ Akaka mathzi akulitulaho aje ali mu liboko lyendi ha mutwe wou bajeletha, kumupangela chilika cha kulijeletha kuli Yehoba. ³⁰ Napande kwana katela umo nameme muna liyembe, kwetheka nomu nawanena munu— ³¹ umo kupwa mulambu wa bubi mukwabo mulambu wa kulumba hamo lika na mulambu wa mbuto. Cho kapilisitu akapanga chilika cha kulijeletha hali ou bajeletha kuli Yehoba. ³² Eli linapu lishiko hali munu ou ali na mushongo waha chikonde wakulitambwitha, ou kathele kuwana bwana bwakushula bwakumujeletha nabwo." ³³ Yehoba wendekele kuli Mosesa na kuli Aloni, ngwendi, ³⁴ "Omwo muketa mu lifuti lya Kanana eli njanene kuli yeni kupwa lyeni, cho oshe njikaka mbundu ije ikatanda mu njubo mu lifuti lyeni, ³⁵ cho owo ibenya njubo akaije nakuleketha kapilisitu. Napande kwendeka ngwendi, 'Chinasholoka kuli yange ngwe muli bimo bya kulifwa ngwe mbundu mu njubo yange.' ³⁶ Cho kapilisitu akakambeya ngwendi batundithemo byuma byoshe thimbu kanda akobele nakukenga bunjiho bwa mbundu, mangana kethi kukapwe chuma chakujwaletha mu njubo. Hanima yobyo kapilsitu akakobela nakukenga mu njubo. ³⁷ Akailula ije mbundu akathe kumona oshe ili ha bimbumbe bya njubo, nakumona oshe isholoka bushompo nameme kubenguluka muje munakunakunama ha bimbumbe. ³⁸ Oshe ije njubo ikapwa na mbundu, cho kapilisitu akatuhuka muje mu njubo nakuishoka ha matangwa atanu na abali. ³⁹ Cho kapilisitu akeluka na kuilula lalo ha litangwa lya muchitanu na abali akamone oshe ije mbundu inatanda ha bimbumbe bya njubo. ⁴⁰ Oshe inatanda, cho kapilisitu akakambeya ngwendi bakatundithemo mamanya haje banawana mbundu na kuwombila ku mwela wa hanja ya nganda wakujwala. ⁴¹ Akashaka bimbumbe byoshe bya njubo kubikonga, cho aje mathzilo abakakonga napande kuwatwala hanja ya nganda nakuwombila ku mwela wa kujwala. ⁴² Banapande kwambata mamanya eka nakuwaka mu myela mubatundithile aje mamanya, cho bapande kupangetha buma bweka bwabuha na kuthota ije njubo. ⁴³ Oshe mbundu ikaija lalo nakukobela mu njubo omwo batundithile aje mamanya cho bibumbe babikongele na kubithota, ⁴⁴ cho kapilisitu napande kukobelamo na kwindula ije njubo akathe kumona oshe mbundu inatanda mu njubo. Oshe inatanda, cho inapu mbundu ya kulyaana, cho njubo ipwa yakujwala. ⁴⁵ Ije njubo yapande kuibujula. Mamanya, biti, na buma bwoshe byapande kubitunditha mu nganda kubitwala ku mwela wakujwala. ⁴⁶ Mukwakelaho, ou woshe akakobela muje mu njubo hathimbu ya kuishoka akapwa wakujwala kweta kuthimbu ya mangwethzi. ⁴⁷ Owo woshe alalele muje mu njubo napande kukusha buthzalo bwendi na owo woshe alililile muje mu njubo napande kukusha buthzalo bwendi. ⁴⁸ Oshe kapilisitu akakobela mu njubo nakuilula akathe kumona oshe ngwe mbundu inatanda mu njubo hanima ya kuithota, cho, oshe ije mbundu inai, akathzimbula ije njubo kupwa ya kujela. ⁴⁹ Cho kapilisitu napande kwambata tuthzila babali nakujeletha ije njubo, na chiti cha kendale, na mukole wa kubenguluka, na chithapo cha bisope. ⁵⁰ Akathsiyila kathzila umo hakamwa ya mema akutonola ali mu njaba ya buma. ⁵¹ Akambata chije chiti cha kendale, chithapo cha bisope, uje mukole wa kubenguluka, nauje kathzila wa mwonyo, na kubimbwitika mu maninga auje kathzila ibanthsiyi mu mema akutonola nakushamwina mu njubo katanu na kabali. ⁵² Akajeletha ije njubo na maninga auje kathzila hamo na aje mema akutonola na kathzila uje wa mwonyo, chie chiti cha kendale, chije chithapo cha bisope, na uje mukole wa kubenguluka. ⁵³ Oloni akechela uje kathzila wa mwonyo kuya mushwata kutunda mu nganda. Mungilei napande kupanga chilika cha kujeletha ije njubo, cho ikapwa ya kujela. ⁵⁴ Eli linapu lishiko lya mishongo ya ha chikonde yoshe ya kulitambwitha na byuma bije bikanenetha ei mishongo, nei ya kujwa, ⁵⁵ nei ya mbundu ku buthzalo na mu njubo, ⁵⁶ ya kuhzimbanga, ya bimbulu, na mapelenge akutoka, ⁵⁷ kumona thimbu muka ebi byoshe bipwa bya kujwala nameme bipwa bya kujela. Eli linapu lishiko lya mishongo yaha chikonde ya kulitambwitha na mbundumbundu."