¹ Yehoba wendekele kuli Mosesa na kuli Aloni, ngwendi, ² "Omwo munu apwa na chithzimba nameme chimbulu nameme mbandu ha chikonde cha mubila wendi, nakwatha kuimuka kupwa mushongo waha chikonde cha mubila wendi, cho napande kumunena kuli kapilisitu wahelu Aloni, nameme kuli umo wa bana bendi baje tupilisitu. ³ Cho kapilisitu akulula hali uje mushongo wa chikonde cha mubila. Oshe ngwe maka ahaje ha mbandu anatenguluka kupwa akutoka, cho oshe ije mbandu isholoka kuloba kutunda ha chikonde, cho ipwa mushongo wa kulitambathana. Hanima ya kumwalula kuli kapilisitu, napande kumwambulula kupwa wakushwala. ⁴ Oshe ngwe ije mbandu yaha chikonde itoka, cho kusholoka chajo kuyalobele kutunda ha chikonde, cho oshe maka aha mbandu kuwatengulukile na kutoka, cho kapilisitu akashondolwetha uje ali na mushongo kupwa kwa likalyendi ha matangwa atanu na abali. ⁵ Halitangwa lya mu chitanu na abali, uje kapilisitu akamwalula na kumona oshe uje mushongo kuwahyanene, cho kuwatandelele mu chikonde. Oshe kuwatandele, cho uje kapiisitu napande ku mushondweletha ha matangwa akwabo atanu na abali. ⁶ Kapilisitu akamwalula lalo ha litangwa lyamu chitanu na abali amone uje mushongo uli mwachili cho kuwatandele kutwalelela mu chikonde. Oshe kuwatandele, cho uje kapilisitu akamupwitha kupwa wa kujela. Binapu bimbulu. Napande kukusha buthzalo bwendi, cho napu wa kujela. ⁷ Oloni oshe bije bimbulu binatanda mu chikonde hanima ya kulisholola kuli kapilisitu mangana alijelethele, napande lalo kulisholola kuli kapilisitu. ⁸ Kapilisitu amwalula amone ngwe oshe bije bimbulu binatwalelela kutanda mu chikonde. Oshe chinatanda, cho kapilisitu napande kumulumbununa kupwa wakujwala. Unapu mushongo wa kulitambwitha. ⁹ Omwo mushongo wa kuitambwitha upwa muli munu, cho napande kumunena kuli kapilisitu. ¹⁰ Kapilisitu aka mwalula amone oshe ngwe hali chithzimbo chakutoka ha chikonde, oshe maka atenguluka kupwa akutoka, nameme oshe ku chithzimbo kuli mbandu yaibishu. ¹¹ Oshe kuili, cho ipwa mbandu ya mukongo, cho kapilisitu napande kumwambulula kupwa wakujwala. Kakamushondolwetha, mwafwa napu laja wa kujwala. ¹² Oshe uje mushongo utanda nameme mu chikonde nakufwika chikonde cha munu na mushongo kutunda ku mutwe wendi kweta ku mendi, ngwe omwo usholoka kuli kapilisitu, ¹³ cho kapilisitu napande kumwalula amone oshe uje mushongo wafwiki mubila woshe. Oshe unapu ngocho, cho uje kapilisitu napande kwambulula uje munu ali namushongo kupwa wa kujela. Oshe woshe unatenguluka kupwa wa kutoka, cho napu wa kujela. ¹⁴ Oloni oshe mbandu yaibishu isholoka hali ikeye, akapwa wakujwala. ¹⁵ Kapilisitu napande kukenga hali ije mbandu yaibishu na kumuthzimbula kupwa wa kujwala mwafwa ije mbandu kuyajelele. Unapu mushongo wa kulitambwitha. ¹⁶ Oloni oshe ije mbandu itenguluka kupwa ya kutoka lalo, cho owo munu napande kuya kuli kapilisitu. ¹⁷ Kapilisitu akamwalula akamone oshe ngwe ije mbandu inatenguluka kupwa ya kutoka. Oshe inatenguluka cho kapilisitu akathzimbu uje munu kupwa wakujela. ¹⁸ Omwo munu apwa na lyute ha chikonde cho chinakanguka, ¹⁹ cho ha mwela wa lyute hali chithzimbo cha kutoka nameme lipelenge lya kujela, kutoka cha kubenguluka, cho chapande ku chimwetha kuli kapilisitu. ²⁰ Kapilisitu akayalula akamone oshe ngwe chisholoka kuloba kwithi ya chikonde, cho na maka aliko oshe anatenguluka kupwa akutoka. Oshe chinapu ngocho, cho kapilisitu napande kumuthzumbula kupwa wakujwala. Unapu mushongo wa kulitambwitha, oshe inatungila ha mwela haje kapwile lije lyute. ²¹ Oloni oshe kapilisitu alula na kumona ngwe kubethi maka akutoka, cho kuyethi mwithi ya chikonde oloni inathzimuka, cho kapilisitu napande ku mushondweletha ha matangwa atanu na abali kwalika lyendi. ²² Oshe inatanda mwakama mu chikonde, cho kapiliitu napande mukuthzimbula kupwa wa kujwala. Unapu mushongo wakulitambwitha. ²³ Oloni oshe lije lipelenge litumbama mu mwela wacho cho kulyatandele, cho inapu chibebe cha lyute, cho kapilisitu napande kumuthzimbula kupwa wa kujela. ²⁴ Omwo chikonde chipwa na kwenya cho mbandu ya kutonola ya kwenya ipwa ya kutoka-cho kubenga nameme lipelenge lya kutoka, ²⁵ cho kapilisitu ayalula akamone oshe ngwe maka amulipelenge linatenguluka kupwa akutoka, cho oshe isholoka kuloba kutunda ha chikonde. Oshe inapu ngocho, cho unapu mushongo wakulitambwitha. Inaija nakwama mu bimbandu bya kwenya, cho kapilisitu napande kumuthzimbula kupwa wa kujela. Unapu mushongo wa kulitambwitha. ²⁶ Oloni oshe kapilisitu akayalula nakuwana ngwe kumwethi maka akutoka mu lipelenge, cho kuyethi mwithi ya chikonde oloni inathzimuka, cho kapilisitu napande kumushondolwetha ha matangwa atanu na abali. ²⁷ Cho kapilisitu napande kumwalula ha litangwa lya mu chitanu na abali. Oshe inatanda manene mu chikonde, cho kapilisitu napande kumuthzimbula kupwa wa kujwala. Unapu mushongo wa kulitambwitha. ²⁸ Oshe ngwe lije lipengele litumbama mu mwela walyo cho kulyatandele mu chikonde oloni linathzimuka, cho inapu chithzimbo cha kutunda ku kwenya, cho kapilisitu npande kumuthzimbula kupwa wa kujela, mwafwa kuchethi chimo oloni chibebe chakwenya. ²⁹ Oshe munalume nambe munakathzi ali na mushongo wakulitambwitha mu mutwe nameme ku chipothzi, ³⁰ cho kapilisitu napande kwalula owo munu ha mushongo athe kumona oshe ngwe usholoka kuloba kutunda ha chikonde, cho oshe kuli buthela, na maka akwokama haikeyo. Oshe hawali, cho kapilisitu napande kumuthzimbula kupwa wakujwala. Chinapu cha kujwa, mushongo wakulitambwitha ha mutwe nameme ku chipothzi. ³¹ Oshe uje kapilisitu akalula uje mushongo wa kujwa na kumona ngwabo kuwethi mwithi ya chikonde, cho oshe kuhethi maka akuthzibala, cho uje kapilisitu akashondolwetha owo munu wa mushongo wa kujwa ha matangwa atanu na abali. ³² Halitangwa lya mu chitanu na abali uje kapilisitu akalula uje mushongo akathe kumona oshe ngwe unatanda. Oshe kukwethi maka abuthela, cho oshe mushongo usholoka kupwa hakamwa ya chikonde lika, ³³ cho napande kumuteula, oloni haje ha mwela hali mushongo kuhapandele kuteula, cho kapilisitu napande kushondolwetha owo munu ali na mushongo wa kujwa ha matangwa akwabo atanu na abali. ³⁴ Halitangwa lyamu chitanu na abali kapilisitu akalula uje mushongo athe kumona oshe ngwe unechela kutanda mu chikonde. Oshe ukasholoka kwilika kuloba ha chikonde, cho kapilisitu napande kumuthzimbula kupwa wa kujela. Owo munu napande kukusha buthzalo bwendi, cho apwa wa kujela. ³⁵ Oloni oshe owo mushongo wa kujwa unatanda manene mu chikonde hanima ya kapilisitu kwendeka ngwendi najele, ³⁶ cho kapilisitu napande kumwalula lalo. Oshe uje mushongo unatanda mu chikonde, kapilisitu kapandele kuthetela maka abuthela embwe. Uje munu napu wa kujwala. ³⁷ Oloni oshe mukumona cha kapilisitu uje mushongo wakujwa unechela kutanda cho ha mwela hanamene maka akuthzibala, cho uje mushongo una kanguka. Najele, cho kapilisitu napande kumithzimbula kupwa wa kujela. ³⁸ Oloni oshe ngwe munalume nambe munakthzi apwa na lipelenge lya kutoka ha chikonde, ³⁹ cho kapilisitu napande kwalula owo munu amone oshe ngwe owo mapelenge anapu a kutoka chakuthzibuluka, awa apwa lika bimbulu ebi binaija mu chikonde. Napu wa kujela. ⁴⁰ Oshe bing'ambu bya munalume binau kutunda ku mutwe wendi, napu na libula, oloni najele. ⁴¹ Oshe bing'ambu byendi binawia ku mutambela wa kulutwe wa mutwe wendi, cho oshe lutwe lwa mutwe wendi lupwa na libula, napu wa kujela. ⁴² Oloni oshe ha mutwe nameme ha luholo lwa mutwe wendi hapwa mbandu ya kutoka cha kube nguluka, inapu mushongo wa kulitambwitha owo unaija. ⁴³ Cho kapilisitu napande kumwalula athe kumona oshe ngwe chithzimbo cha mwela wa mushongo ha mutwe nameme luholo lwendi inapu ya kutoka cha kubenguluka, ngwe kusholoka cha mushongo wakulitambwitha mu chikonde chendi. ⁴⁴ Oshe mukemo, cho ali na mushongo wa kulitambwitha cho napu wa kujwala. Kapilisitu napande bene kumuthzimbula wa kujwala mwafwa wendi. ⁴⁵ Munu ou ali na mushongo wa kulitambwitha napande kuthzala buthzalo bwa kutabuka, bing'ambu byendi byapande kujenjela, cho napande kufwika chihanga chendi kweta mu majulu endi nakuthana, 'Wakujwala, wakujwala.' ⁴⁶ Matangwa oshe aje ali na mushongo wa kulitambwitha akapwa wakujwala. Mwafwa napu wa kujala na mushongo ou watha kutanda, napande kuyoya lika lyendi. Napande kuyoyela hanja ya chilombo. ⁴⁷ Buthzalo obu banabihitha na mbundu, bupwe bwa ulu nameme lineni, ⁴⁸ nameme chuma choshe cha kushonga nameme cha kutunga kutunda kuulu nameme lineni, nameme chilambu nameme chuma choshe cha kupanda na ⁴⁹ chilambu—oshe muli kubihitha cha bushompo nameme kubenguluka mu buthzalo, chilambu, biti nameme naanga ya kutonga, nameme chuma choshe chakupanga na chilambu, cho mbundu ikeyo ikatanda; chapande kuchisholola kuli kapilisitu. ⁵⁰ Kapilisitu napande kwalula ocho chuma cha mbundu; napande kushondolola chuma choshe chije cha mbundu ha matangwa atanu na abali. ⁵¹ Napande lalo kwalula mbundu halitangwa lya muchitanu na abali. Oshe binatanda mu chithzalo nameme chuma choshe cha biti nameme kutunga kutunda ku ulu nameme naanga ya lineni, nameme chilambu nameme chuma choshe chakupanga na chilambu, chuma choshe ocho banapangetha chilambu, cho inapu mbundu yakutenuka, cho na chuma chacho chinapu chakujwala. ⁵² Napande kwenyeka chije chithzalo, nameme chuma choshe cha biti nameme chakutonga kutunda kuulu nameme naanga ya lineni, nameme chilambu nameme chuma choshe cha kupanga na chilambu, chuma choshe omu mbundu yakele yakuwanenewa, mwafwa inatha kutwala ku mishongo. Ocho chuma chapande kuchenyeka bene. ⁵³ Oshe kapilisitu alula ocho chuma cho amona ngwe mbundu kuyatandele mu buthzalo nameme chuma cha biti nameme chakutonga kutunda ku ulu nameme lineni, nameme byuma bya chilambu, ⁵⁴ cho akabakambeya kukusha chije chuma muje bawanene mbundu, cho napande kuchishondolola ha matangwa akwabo atanu na abali. ⁵⁵ Cho kapilisitu akalula chije chuma hanima ya kuchikusha ije mbundu. Oshe ije mbundu kutenguluka bulombo kwahi, nambe kuyatandele, inapu ya kujwala. Mwapande kwenyeka chije chuma, chikale banachibihitha ku mbundu. ⁵⁶ Oshe kapilisitu nalula chije chuma, cho oshe ije mbundu inathzimuka hanima ya kuikusha, cho napande kutabulako uje mutambela babiluthile ha buthzalo nameme kutunda ha chilambu, nameme kutunda ku chiti nameme naanga ya kutonga. ⁵⁷ Oshe ije mbundu ichisholoka ku buthzalo, ipwe ku chikeleko nameme naanga ya kutonga, nameme ku chuma choshe cha kupanga na chilambu, chinakutanda. Mwapande kwenyeka chuma choshe chije chili na mbundu. ⁵⁸ Chije chithzalo nameme chuma choshe cha chikeleko nameme chakutonga na ulu nameme naanga ya lineni, nameme chilambu nameme chuma choshe chakupanga na chilambu—oshe mukusha chije chuma cho mbundu inai, cho chije chuma chapande kuchikusha kamuchibali, cho chipwa chakujela. ⁵⁹ Eli likelyo lishiko ha mbundu iliku buthzalo bwa ulu nameme lineni, nameme chuma choshe chakango nameme cha kutunga kutunda ku ulu nameme naanga ya lineni, nameme chilambu nameme chuma choshe chakupanga na chilambu, mangana mukachithzimbule kupwa cha kujela nameme cha kujwala."