¹ Nandibi na Abihu, bana babanalume ba Aloni, umo na umo wambatele chula , nakwamo tuhya, cho nakukakumwina lwengo. cho banene tuhya tuje twajenekele kubaleka kumesho a Njambi, tuje twajenekele kubatumina mangana baane. ² Cho tuhya twatundile ku mesho a Njambi na kubenyeka, cho boshe bathsile ku mesho a Njambi. ³ Cho Mosesa wendekele kuli Aloni ngwendi, "Echi chikecho Njambi wakele na kwendeka omwo wendekele ngwendi, 'Njikamwetha kwononola kwange kuli baje bakaija kuli yange. Bakanji shangathzala ku mesho abanu boshe."" Alonikendekele namme chimo. ⁴ Mosesa wathanene Mishaele na Elizafane, bana babanalume ba Uziele inanu ya Aloni na kwendeka kuli bakebo ngwendi, "Ijeni kuno mangana mwambate ba ndolome beni muba tundithe mu chilombo ku mesho a tabanako" ⁵ Cho bethzile kuyehi na kubambata, oku hanga banathzala buthzalo bwa bupilisitu, na kubatunditha mu chilombo, ngwe muje waba shikile Mosesa. ⁶ Cho Mosesa wendekele kuli Aloni na Elleazale na Itamala, munendi wa munalume ngwendi, " Kethi mwechelele lipupe ku mitwe yeni, cho lalo kethi mutabule buthzalo bweni, ngechi mujejeneke kuthsa, cho lalo Njambi ajeneke kulubala na chibunga cheni choshe. Oloni echeleni ba bushoko beni, njubo ya Idalela, na kulilila baje babana shwameka na tuhya twa Njambi. ⁷ Kethi mutunde mu chikolo chakukobelela mu tende ya kuli wanena, kutewa mukathsa, mwafwa mathzi aku bwaba ali hali yeni. Cho balingile kwetheka muje abashikile Mosesa. ⁸ Njambi wendekele kuli Aloni ngwendi, ⁹ "Kethi munwe binyu nameme kunwa bya kushasha, yeni, nameme bana beni babanalume baje bathalele neni, omwo muya mu tende ya kuli wanena, mangana mujeneka kuthsa. Echi chikapwa chilika cha myaka yoshe mukati ka bikota by banu bobe boshe, ¹⁰ na kwandununa bya kuthzila na bya kujeneka kuthzila, cho lalo nebi bya kujeneka kujela nebi byakujela, ¹¹ mangana mulongethe banu bamu Isalela bilika byoshe bije Njambi washikile kwitila muli Mosesa. ¹² Mosesa wendekele kuli Aloni na Eleazale na kuli Itamala, bana bendi babanalume bathaleleho ngwendi, "Ambateni bimuna bya mulambu bije bya thalele kutunda kumilambu ya kwenyeka ku tuhya ya lambwile kuli Njambi, mangana mu ilye chakujeneka chimbalwila ku mukulo wa mutula, mwafwa unapu wakuthzila manene. ¹³ Munapande ku ulila mu mwela wa kuthzila, mwafwa chinapu chakulipangethzela cha bana bobe babanalume mulambu wakwenyeka ku tuhya kuli Njambi, mwafwa echi chikecho chibanashiki mangana njimilekethe. ¹⁴ Cho ng'undo ije ya kwingitha na lindi lije libanonwetha kuli Njambi, munapande kubilila mu mwela wa kujela uje bana chitabetha kuli Njambi yobe na bana bobe babanalume na bana bobe babanakathzi banapande kukalya bije bimbathzubwila, omwo banabana kupwa ngwe chakulipangethzela chobe na chakulipangethzela cha bana bobe babanalume kutunda mu bikombelo cha biwano bya milambu chakuli banu bamu Isalela. ¹⁵ Cho lindi lije libana mwetha na ng'undo ije yakuwingitha, munapande kubinena na milambu yakwenyeka na mathzi, na kuwinga ku mesho a Njambi. Cho bikapwa byobe na bana bobe babanalume kupwa ngwe chakulipangethzela cha myaka yoshe, ngwe muje mwachishilike Njambi. ¹⁶ Cho Mosesa wewehwile hali membe wa mulambu wa bubi, cho wawanene ngwabo bana mwenyeka laja. Cho walubalele na Eleazale na Itamala, bana babanalume ba Aloni baje atheleho; na kwendeka ngwendi, ¹⁷ "Mwafwa bikajo bimunonowela kulya mulambu wa bubi mu chela cha tabanako, hathimbu inapu ya kuthzila manene, cho thimbu Njambi nachana kuli yeni na kubambatela bubi, nakubathzimanganenabwo ku mesho endi? ¹⁸ Kenga, maninga endi kubanenele mukati ka tabanako embwe, cho chili bene munapandele kumulila mu chela cha tabanako, ngwe muje munjamishilike. ¹⁹ Cho Aloni wakumbulwile Mosesa ngwendi, " Kenga, lelo banapangele milambu yabo ya bubi na milambu ya kwenya ku mesho a Njambi, neli lindi lya sholoka kuli yange lelo. Mona ngwe njalile milambu ya bubi lelo, ngwe ku chabwahethele ku mesho a Njambi?" ²⁰ Omwo Mosesa wachithzibile, cho wabwahelele.